އަންހެނެއްގެ ބޮލުގައި ދަގަނޑުބުރިއަކުން ޖެހި ލަންކާ މީހަކު ހައްޔަރުކޮށްފި
މި މައްސަލައިގައި ހައްޔަރުކޮށްފައިވަނީ އުމުރުން 28 އަހަރުގެ ލަންކާ ފިރިހެނެއް
ކްރިމިނަލް ކޯޓް
އަންހެނެއްގެ ބޮލުގައި ދަގަނޑުބުރިއަކުން ޖެހި ލަންކާ މީހަކު ހައްޔަރުކޮށް، އޭނާ ބަންދު ކުރުމަށް ކްރިމިނަލް ކޯޓުން އަމުރުކޮށްފިއެވެ.
މާރާމާރީގެ މި މައްސަލައިގައި ހައްޔަރުކޮށްފައިވަނީ އުމުރުން 28 އަހަރުގެ ލަންކާ ފިރިހެނެކެވެ.
އޭނާ 10 ދުވަހަށް ބަންދު ކުރުމަށް ކްެރިމިނަލް ކޯޓުން އަމުރުކޮށްފައިވާއިރު، އޭނާގެ ބަންދުގެ މުއްދަތު ހަމަވާނީ 4 ސެޕްޓެމްބަރު 2023ގައެވެ.
ކޯޓު އަމުރުގައި ބަޔާންކޮށްފައިވާ ގޮތުގައި އޭނާގެ މައްޗަށް ތުހުމަތު ކުރެވޭ ކުށް އޭނާ ކުރިކަމަށް އެކަށީގެންވާ ހެކި ހުށައެޅިފައިވެއެވެ. ޙާދިސާ ރިޕޯޓުގައިވެސް ދަގަނޑުބުރިއަކުން އޭނާ މީހެއްގެ ގައިގައި ޖެހިކަމަށް ބަޔާންކޮށްފައިވެއެވެ.
އޭނާ ބަންދުކޮށްފައިވަނީ މުޖުތަމައުގެ ސަލާމަތާއި ރައްކާތެރިކަމަށްޓަކައެވެ.
ކޯޓު އަމުރުގައި އިތުރަށް ބުނެފައިވަނީ އޭނާ ދަގަނޑުބުރިއަކުން ޖެހުމުގެ ސަބަބުން އަންހެންމީހާގެ ބޮލުން ދޮޅު އިންޗި ހުންނަވަރުގެ ތަނެއް ފަޅައިގެން ގޮސްފައިވާ ކަމަށް އައިއޯ ބުނެފައިވާކަމަށެވެ.
އަދި އޭނާއަކީ ޤަވާއިދާ ޚިލާފަށް ރާއްޖޭގައި އުޅެމުންދާ މީހެއްކަމަށްވެސް އައިއޯ ވަނީ ފާހަގަކޮށްފައެވެ.
އޭނާ ވަނީ ވަކީލަކު ބޭނުންވާކަމަށް ބުނެފައެވެ.
