ސަނަދު ޤަބޫލު ކުރުމާބެހޭ މައުލޫމާތުތައް ފޯރުކޮށްދިނުމުގެ ބޭނުންތެރިކަން ބޮޑު: އެމްކިއުއޭ
މިއީ އެމްކިއުއޭ އުފެދުނު ފަހުން މިހާތަނަށް މި މަސައްކަތުގެ ދަށުން ބާއްވާ ފުރަތަމަ ކޮންފަރެންސް
އެމްކިއުއޭގެ ސީއީއޯ ޑރ އަބްދުލްހަންނާން ވަހީދު
ސަނަދު ޤަބޫލު ކުރުމާބެހޭ މައުލޫމާތުތައް ފޯރުކޮށްދިނުމުގެ ބޭނުންތެރިކަން ބޮޑުކަމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ބުނެފިއެވެ.
ހޮނިހިރު ދުވަހު ކުރިއަށްދިޔަ ކޮލިފިކޭޝަން ރިކޮގްނިޝަން ކޮންފަރެންސް ނިންމަވާލެއްވުމަށްފަހު ރާއްޖެއެމްވީއާ ވާހަކަ ދައްކަވަމުން އެމްކިއުއޭގެ ސީއީއޯ ޑރ އަބްދުލްހަންނާން ވަހީދު ވިދާޅުވީ، މިއީ ސަނަދު ޤަބޫލުކުރުމާ ބެހޭގޮތުން ބޭއްވޭ ކޮންފަރެންސެއް ކަމަށެވެ.
އަދި މިއީ އެމްކިއުއޭ އުފެދުނު ފަހުން މިހާތަނަށް މި މަސައްކަތުގެ ދަށުން ބާއްވާ ފުރަތަމަ ކޮންފަރެންސްކަންވެސް ޑރ ހަންނާން ފާހަގަ ކުރެއްވިއެވެ.
މި އިދާރާ ހިންގަމުން އަންނަތާ ދުވަސްތަކެއް ވެފައިވާކަން ފާހަގަ ކުރައްވައި އޭނާ އިތުރަށް ވިދާޅުވީ، ސަނަދު ޤަބޫލުކުރުމުގެ ޚިދުމަތަކީ އިދާރާ ފެށުނީއްސުރެ ދެމުން އަންނަ ޚިދުމަތެއް ކަމަށެވެ.
އަދި މިއީ ވަރަށް ގިނަ ދިވެހިންގެ އިހުސާސްތަކާވެސް ގުޅޭ ކަމެއްކަމަށް އޭނާ ވިދާޅުވިއެވެ.
ޑރ ހަންނާން ވިދާޅުވީ، ސަނަދު ޤަބޫލު ކުރުމާބެހޭ އެކިއެކި މައުލޫމާތުތައް ފޯރުކޮށްދިނުމަކީ މުހިއްމު ކަމެއްކަމަށް އެމްކިއުއޭއަށް ޤަބޫލު ކުރެވޭ ކަމަށެވެ. އެގޮތުން ދިވެހިންނާއި، ރާއްޖެއިން ބޭރުން ކިޔަވައިގެން އަންނަ ފަރާތްތަކުންވެސް ސަނަދު ޤަބޫލު ކުރުމާބެހޭ މައުލޫމާތުތައް ހޯދާލުމަށް މި ކޮންފަރެންސްގެ ބޭނުންތެރިކަން އޭނާ ފާހަގަ ކުރެއްވިއެވެ.
ޑރ ހަންނާން ވިދާޅުވީ، އޭގެ ތެރޭގައި ކޮލެޖުތަކާއި ޔުނިވަރސިޓީތަކުގެ ދަރިވަރުން ހިމެނޭ ކަމަށެވެ.
