ކެމްޕެއިން ކުރާ އިރު ތިމާވެއްޓަށް ގެއްލުން ލިބޭ ފަދަ ކަންކަން ކުރާތީ އީޕީއޭގެ ކަންބޮޑުވުން
އެ އިދާރާ އިން ވަނީ އެފަދަ އަމަލުތައް ހުއްޓާލުމަށް އިލްތިމާސްކޮށްފަ
އީޕީއޭގެ ޑިރެކްޓަރ ޖެނެރަލް އިބްރާހިމް ނަޢީމް
ކުރިއަށް އޮތް ރިޔާސީ އިންތިޚާބަށް ކެމްޕެއިން ކުރާ އިރު ބައެއް ފަރާތްތަކުން ތިމާވެއްޓާއި ދިރޭތަކެއްޗަށް ގެއްލުން ލިބޭ ފަދަ އަމަލުތައް ހިންގާތީ އެންވަޔަރަމަންޓަލް ޕްރޮޓެކްޝަން އެޖެންސީ، އީ.ޕީ.އޭއިން ކަންބޮޑުވުން ފާޅުކުރައްވައިފިއެވެ.
އެކަމާއި ގުޅިގެން އީ.ޕީ.އޭއިން ނެރުނު ބަޔާނެއްގައި ބުނީ ކެމްޕެއިން ހަރަކާތްތައް ކުރިއަށް ގެންދިޔުމުގައި ރާއްޖޭގެ ތިމާވެއްޓަށާއި ދިރޭތަކެއްޗަށް ގެއްލުންވާގޮތްގޮތަށް ކެމްޕެއިންގެ ކަންކަން ހިންގާކަން އެ އިދާރާ އަށް ފާހަގަކުރެވޭ ކަމަށެވެ. އެގެ ތެރޭގައި ރާއްޖޭގެ ބައެއް ރަށްރަށުގައި ހެދިފައިވާ ހިމާޔަތްކޮށްފައިވާ ގަސްގަހާގެއްސަށާއި ދުވަސްވީ ބޮޑެތި ގަސްގަހާގެއްސަށް ގެއްލުންވާ ގޮތަށް މޮހޮރުފަދަ ތަކެތި ޖެހުމަށް ފަހު ކެމްޕެއިން ބެނާތައް ހަރުކުރަމުންދާ ކަމަށް ވަނީ ބުނެފައެވެ. މީގެ އިތުރުން ޖަނަވާރާއި ރުއްގަހަށް ސްޕްރޭކުރުމާއި އެތަކެތީގައި ދަވާދު އުނގުޅުން ފަދަ ކަންކަން ކުރަމުންދާ ކަމަށް ވެސް ވަނީ ބުނެފައެވެ. ހަމައެހެންމެ ކެމްޕެއިން ހަރަކާތްތަކަށް ބޭނުންކުރާ ބައެއް ލުއިފޮތްތަކާއި ޕޯސްޓަރުތަކާއި ކަރުދާސްތައް މަގުމައްޗަށް އުލާކާފައިވާކަން އެ އިދާރާ އަށް ފާހަގަކުރެވޭ ކަމަށް ވަނީ ބުނެފައެވެ.
ހަމައެހެންމެ ކެމްޕެއިން އިވެންޓްތަކުގައި ސިންގަލް ޔޫސް ޕްލާސްޓިކް ފެންފުޅި ބޭނުންކުރާތީ އެކަމާއި މެދު ކަންބޮޑުވުން ފާޅުކޮށްފައިވެއެވެ. އީޕީއޭއިން ބުނީ ކުނީގެ ގޮތުގައި އުކާލުމަށްފަހު އެ ތަކެތި ރަނގަޅަށް މެނޭޖްނުކުރާކަމަށެވެ. އެ އިދާރާ އިން ބުނީ މުރަކަތަކަށް ގެއްލުންވާގޮތަށް ފަރުތައް ތޮރުފުމާއި، ފަރުތައް ހަލާކުކޮށްގެން ދިދަ ޖެހުމުގެ ބޭނުމުގައި ދަގަނޑު ހޮޅި ޖެހުން ފަދަ ކަންކަން ކުރާ ކަމަށެވެ. އެހެންކަމުން އެ އިދާރާ އިން ވަނީ އެފަދަ އަމަލުތައް ހުއްޓާލުމަށް އިލްތިމާސްކޮށްފައެވެ.
