ލޫކް ޝޯ އަށް އަނިޔާވެ، ޔުނައިޓެޑަށް ހާސްކަން އިތުރުވެއްޖެ!

މެންޗެސްޓަރ ޔުނައިޓެޑުގެ ލޫކް ޝޯ އަށް އަނިޔާވެ ކުޅުމާ ދުރަށް ދާންޖެހުމުން، ޓީމަށް ހާސްކަން އިތުރު ވެއްޖެއެވެ.

ޝޯގެ ބަދަލުގައި އެ މަގާމަށް ކުޅެން ހުރި ޓައިރެލް މަލާސިއާވެސް ހުރީ އަނިޔާގެ ސަބަބުން ކުޅުމާ ދުރުގައެވެ. އަދި ތިންވަނަ ޗޮއިސް ލެފްޓް ބެކް، ބްރެންޑަން ވިލިއަމްސްވެސް ވަނީ ލޯނު އެއްބަސްވުމެއްގެ ދަށުން އިޕްސްވިޗް ޓައުންއަށް ބަދަލުވެފައެވެ.

އަނިޔާވެފައިވާ މިންވަރު ޔުނައިޓެޑުން އަދިވެސް ބަލަމުން އަންނަ އިރު، އުމުރުން 28 އަހަރުގެ ލެފްޓް ބެކް ގިނަ ހަފުތާތަކަކަށް ކުޅުމާ ދުރުގައި ހުންނާނެ ކަމަށް ބެލެވެއެވެ. އަންނަ މަހު ޔޫކްރެއިން އާއި ސްކޮޓްލޭންޑާ ދެކޮޅަށް އިންގްލެންޑް ކުޅޭ މެޗުތައްވެސް ޝޯ އަކަށް ނުކުޅެވޭނެއެވެ.

ޑިއޯގޯ ޑަލޮޓް ވަނީ މީގެ ކުރިން ވާތްފަރާތުގައި ކުޅެފައެވެ. ނަމަވެސް، މިއީ ޔުނައިޓެޑުގެ ދަށް ފެށުމާއެކު ޓެން ހާގް އަށް އެންމެ ރަންގަޅު ގޮތެއްވެސް ނޫނެވެ. ހޫނުމޫސުމުގައި ޔުނައިޓެޑަށް ސޮއިކުރި ރަސްމުސް ހޮއިލުންޑާއި މޭސަން މައުންޓަށްވެސް ވަނީ އަނިޔާވެފައެވެ.

ލީގުގެ ފުރަތަމަ މެޗުގައި ޔުނައިޓެޑު ވަނީ ވޮލްވްސް ކައިރިން 1-0 ން މޮޅުވެފައެވެ. ނަމަވެސް، ދެވަނަ މެޗުގައި ޓޮޓެންހަމް ކައިރިން ވަނީ 2-0 ން ބަލިވެފައެވެ. ހޮނިހިރު ދުވަހު ޔުނައިޓެޑު ނިކުންނާނީ އަމިއްލަ ދަނޑުގައި ނޮޓިންހަމް ފޮރެސްޓް އާ ދެކޮޅަށެވެ.