ނައިކީގެ ނިންމުން ބަދަލުކޮށް ކީޕަރު ޖާޒީ ވިއްކަން ފަށައިފި
8 ޖެނުއަރީ 2024 | ހޯމަ 08:16ޖާޒީ ވިއްކަން ނިންމީ ޕެޓިޝަން ހެދުމުން
އިނގިރޭސި ގައުމީ ކީޕަރު މޭރީ އާޕްސް
އިނގިރޭސި ގައުމީ އަންހެން ފުޓްބޯޅަ ކީޕަރުގެ ޖާޒީ ވިއްކަން ގައުމީ ޓީމުގެ ކިޓް ތައްޔާރުކޮށްދޭ ނައިކީ ކުންފުނިން ނިންމައި, އެކަން ފަށައިފި އެވެ.
އެކުންފުނިން މި ގޮތަށް ނިންމީ އަންހެން ކީޕަރު ޖާޒީ ވިއްކުމަކީ އެޖުންފުނީގެ ޕޮލިސީއާ ހިލާފު ކަމެއް ކަމަށް ބުނުމަށްފަހު އެވެ. ނަމަވެސް މިކަމާ ދެކޮޅަށް އިނގިރޭސިން ޕެޓިޝަން ހަދައި ސޮއިކުރަން ފެށުމުން ނައިކީން ވަނީ އިއްޔެ ބަޔާނެއް ނެރެފަ އެވެ. އެ ބަޔާނުގައި ބުނެފައިވަނީ އެކުންފުންޏަށް ލިބުނު ހިޔާލުތަކަށް ފަހު އަންހެން ކީޕަރުގެ ޖާޒީ ވިއްކަން ނިންމާފައިވާ ކަމަށެވެ. އިނގިރޭސިން ތައްޔާރު ޕެޓިޝަނުގައި ދޮޅުލައްކައަށް ވުރެ ގިނަ މީހުން ސޮއިކުރި އެވެ.
ކުޅިވަރު ސާމާނު ވިއްކާ މަޝްހޫރު ނައިކީ ކުންފުންޏަކީ އިނގިރޭސި ގައުމީ ޓީމުގެ ޖާޒީ އުފައްދާ ފަރާތެވެ. ނަމަވެސް އެ ކުންފުނިން ވަނީ ގައުމީ އަންހެން ޓީމުގެ ކީޕަރު ޖާޒީ އާއްމުކޮށް ވިއްކަން ނުބަހައްޓާ ގޮތަށް ނިންމީ މިދިޔަ ހަފުތާގައި ނިމުނު އަންހެނުންގެ ވޯލްޑްކަޕާ ދިމާކޮށެވެ. މިކަމާ އިނގިރޭސި ކީޕަރުންނާއި ނޫސްވެރިން ވަނީ ނައިކީއާމެދު ވަރަށް ބޮޑަށް ނުރުހުން ފާޅުކޮށްފައެވެ.
އިނގިރޭސި ގައުމީ ކީޕަރު މޭރީ އާޕްސް ބުނީ އެހެން ކުޅުންތެރިންގެ ޖާޒީ ވިއްކާފައި ކީޕަރު ޖާޒީ ނުވިއްކުމަކީ ބަލައިގަނެވޭނެ ކަމެއް ނޫންކަމަށެވެ.
އުމުރުން 30 އަހަރުގެ އިނގިރޭސި ކީޕަރު އާޕްސްއަކީ ހުސްވި އަހަރު ފީފާއިން ހޮވި ދުނިޔޭގެ އެންމެ މޮޅު ކީޕަރެވެ. އަދި ވޯލްޑްކަޕުގެ އެންމެ މޮޅު ކީޕަރަކީ ވެސް އޭނާ އެވެ. ކުލަބު ލެވެލްގައި ވެސް އޭނާގެ ވިދުން ގަދައެވެ. މިހެންވެ އޭނާއަށް ސަޕޯޓްކުރާ ފަރާތްތައް ވެސް ގިނައެވެ.
އާޕްސް ބުނީ ގައުމީ ޓީމުގެ އެހެން ކުޅުންތެރިން އެމީހުންގެ އާއިލާއާއި ރަހުމަތްތެރިންނަށް ދިނުމަށް ގިނަ އަދަދަކަށް ޖާޒީއަށް އޯޑަރުކޮށްފައި ވާކަމަށެވެ.
