އެމްއެންޑީއެފް ނޮދަން އޭރިއާ ކޮމާންޑު ހެޑްކުއާޓަރޒް ހަނިމާދޫއަށް ބަދަލުކުރާތީ 5 ރަށެއްގައި ޕެރޭޑް ބާއްވަނީ
މި ޕެރޭޑުތައް ފަށާނީ މިއަދު ހަވީރު ހަނިމާދޫއިން
އެމްއެންޑީއެފް ޕެރޭޑް
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ނޮދަން އޭރިއާ ކޮމާންޑް ހެޑްކުއާޓާޒް ހދ. ހަނިމާދޫއަށް ބަދަލުކުރާތީ، އެކަން ފާހަގަކުރުމުގެ ގޮތުން އުތުުރުގެ ފަސް ރަށެއްގައި މިލިޓަރީ ޕެރޭޑް ބާއްވަން ނިންމައިފިއެވެ.
އެމްއެންޑީއެފުން ބުނެފައިވާ ގޮތުގައި މި ޕެރޭޑުތައް ފަށާނީ މިއަދު ހަވީރުއެވެ. އެގޮތުން މިމަހުގެ 29ގެ ނިޔަލަށް ކުރިއަށްގެންދާ މިޕެރޭޑް ހދ. ހަނިމާދޫ، ހދ. ކުޅުދުއްފުށި، ހއ. ދިއްދޫ، ހއ. އިހަވަންދޫ އަދި ހދ. ނޮޅިވަރަންފަރުގައި އޮންނާނެއެވެ.
ހދ. ހަނިމާދޫގައި ޕެރޭޑް ފަށާނީ މިއަދު ހަވީރު 4:30ގައެވެ. ކުޅުދުއްފުށީގައި ޕެރޭޑް ބާއްވާނީ 26 ވަނަ ދުވަހުއެވެ. އަދި ދިއްދޫގައި 27 ވަނަ ދުވަހު ޕެރޭޑް ބާއްވާއިރު އިހަވަންދޫގައި މިމަހުގެ 28 ވަނަ ދުވަހު އަދި ނޮޅިވަރަންފަރުގައި 29 ވަނަ ދުވަހު ޕެރޭޑް ކުރިއަށްދާނެއެވެ.
މި ޕެރޭޑުތަކަށްފަހު ސިފައިންނާއެކު ފޮޓޯ ނަގަން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާ ކަމަށް އެމްއެންޑީއެފުން ބުނެއެވެ.
