ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ އިގްތިސާދީ ބޮޑު ބަދަލު ސިޔާސަތުގެ ދަށުން، ވަޒީފާ ހޯދާ މީހުންނަށް "އަންއެމްޕްލޯއިމަންޓް އިންޝުއަރަންސް" ސްކީމެއް ތައާރަފްކުރަން ނިންމައިފިއެވެ.

ބުރާސްފަތި ދުވަހު ހާމަކުރި އިގްތިސާދީ ބޮޑު ބަދަލު ސިޔާސަތުގެ ތެރޭގައި ހިމެނޭ އިގްތިސާދީ ރައްކާތެރިކަމުގެ ނިޒާމު ހަރުދަނާކުރުމުގެ ދަށުން ގިނަ ކަންތައްތަކެއް ވަނީ ހިމަނާފައެވެ. އޭގެ ތެރޭގައި ވަޒީފާ ގެއްލިފައިވާ ފަރާތްތަކާއި ވަޒީފާ ހޯދުމަށް މަސައްކަތްކުރަމުންދާ ފަރާތްތަކަށް އާމްދަނީއެއް ކަށަވަރުކޮށްދިނުމުގެ ގޮތުން "އަންއެމްޕްލޯއިމަންޓް އިންޝުއަރަންސް" ސްކީމެއް ތައާރަފްކުރުމަށް ވަނީ ހިމަނާފައެވެ. މީގެ އިތުރުން އިންޝުއަރަންސް ދާއިރާ ރެގިއުލޭޓްކޮށް ތަރައްގީކުރުމަށް ޓާރގެޓެޑް ޕޮލިސީތައް ހަދައި، ތަންފީޒުކުރުމަށް ވަނީ ހަމަޖެހިފައެވެ.

މީގެ އިތުރުން ރަށްރަށާއި، ސިޓީތަކަށް ދިމާވާ އެކިއެކި ކާރިސާތަކުން ރައްކާތެރިކަން ފޯރުކޮށްދިނުމަށްޓަކައި ނޭޝަނަލް ހޯމް ތަކާފުލް/ އިންޝުއަރެންސް ސްކީމް ތައާރަފްކުރުމަށް ވަނީ ހަމަޖެހިފައެވެ. ޑިޖިޓަލް ޒަމާނަކަށް އިގްތިސާދީ މިސްރާބު ބަދަލުވަމުންދާ ދަނޑިވަޅުގައި، ސައިބަރ ސެކިއުރިޓީއާއި ޑޭޓާ ޕްރޮޓެކްޝަންގެ މުހިންމުކަން ދެނެގަނެ، ރައްކާތެރި ޑިޖިޓަލް އިންފްރާސްޓްރަކްޗަރެއް ގާއިމުކުރުމަށް ބޭނުންވާ އިންސާނީ އަދި އެހެނިހެން ވަސީލަތް ގާއިމުކުރުމަށް އިސްކަންދިނުމަށް ވެސް ވަނީ މި ސިޔާސަތުގައި ހިމަނާފައެވެ.

އަދި މީގެ އިތުރުން ޖަޒީރާވަންތަ ރާއްޖެއާ ގުޅޭގޮތަށް ކާބޯތަކެތީގެ ރައްކާތެރިކަން ޔަގީންކުރުމުގެ ގޮތުން، ތިމާވެށްޓާއި ރަހުމަތްތެރި ޓެކްނޮލޮޖީ ބޭނުންކޮށްގެން ރާއްޖޭގައި އުފައްދާ ތަކެތީގެ އުފެއްދުންތެރިކަން އިތުރުކުރުމަށް ވަނީ ހަމަޖެހިފައެވެ.

އިންޝުއަރަންސް، ފައިނޭންޝަލް ކޮންސިއުމަރ ޕްރޮޓެކްޝަނާއި އެހެނިހެން މާލީ ޚިދުމަތްތަކާބެހޭ ގާނޫނުތަކާއި ގަވާއިދުތައް ހިމެނޭގޮތަށް އެތެރޭގެ މާލީ ނިޒާމު ހިންގުމުގެ ގާނޫނީ އޮނިގަނޑު ހަރުދަނާކުރުމަށާއި، ރައްޔިތުންނާއި، އިންވެސްޓަރުންނާއި، ވިޔަފާރިވެރިންނަށް، ކުރިމަތިވެދާނެ ދަތި އުނދަގޫ ދަނޑިވަޅުތަކުގައި އެކަންކަމުން އަރައިގަތުމަށް، އިގުތިސާދީ ރައްކާތެރިކަން ކަށަވަރުކޮށްދޭ ނިޒާމެއް ގާއިމްކުރުމަށް ވެސް ވަނީ ހިމަނާފައެވެ.