ދުވާފަރުގެ ބައެއް މަޝްރޫޢުތަކުގެ ނިމުން ރައީސުލްޖުމްހޫރިއްޔާ ފާހަގަކޮށްދެއްވައިފި
24 އޯގަސްޓު 2023 | ބުރާސްފަތި 07:17ދުވާފަރު މަގުހެދުމުގެ މަޝްރޫޢުގެ ދަށުން އެރަށުގައި 5.7 ކިލޯމީޓަރުގެ މަގު ވަނީ ޒަމާނީ ފެންވަރަށް ހަދާފައި
ދުވާފަރުގެ ބައެއް މަޝްރޫޢުތަކުގެ ނިމުން ރައީސުލްޖުމްހޫރިއްޔާ ފާހަގަކޮށްދެއްވައިފި
ދުވާފަރުގައި މި ސަރުކާރުން ކުރިއަށް ގެންދެވި ބައެއް މަޝްރޫޢުތަކުގެ ނިމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ފާހަގަކޮށްދެއްވައިފިއެވެ.
ތަރައްޤީގެ ބައެއް މަޝްރޫޢުތަކުގެ ތެރެއިން މި ދެ ރަށުގައި ނިމިފައިވާ މަސައްކަތްތައް ރައީސް އިފްތިތާހުކޮށްދެއްވީ މިހާރު އެމަނިކުފާނު ރ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިންނެވެ. އެގޮތުން ދުވާފަރުގައި ފުޓްބޯޅަ ދަނޑު ހުޅުއްވައިދެއްވިއެވެ.
އެ މަސައްކަތުގެ ސަބްބޭސް ޤާއިމްކުރީ އެމް.ޓީ.ސީ.ސީއާ ހަވާލުކޮށްގެންނެވެ. އަދި ދަނޑުގެ ޓަރފް އެޅުމުގެ މަސައްކަތް ވީ.އޭ.އެމް ކޮމްޕެނީ ޕްރައިވެޓް ލިމިޓެޑާއި ހަވާލުކޮށްގެންނެވެ. މީގެ އިތުރުން ލައިޓިންގ ސިސްޓަމުގެ މަސައްކަތްކޮށްފައި ވަނީ ކޯލައިން މޯލްޑިވްސް ޕްރައިވެޓް ލިމިޓެޑާއި ހަވާލުކޮށްގެންނެވެ.
މި ދަތުރުފުޅުގެ ތެރެއިން ދުވާފަރުގެ ބިން އިތުރުކުރުގެ މަޝްރޫޢު އާއި މަގުހެދުމުގެ މަޝްރޫޢުގެ ނިމުން ވަނީ ފާހަގަކޮށްދެއްވާފައެވެ.
ދުވާފަރު ބިން އިތުރުކުރުމުގެ މަޝްރޫޢުގެ މަސައްކަތްކޮށްފައި ވަނީ އެމް.ޓީ.ސީ.ސީއާ ހަވާލުކޮށްގެންނެވެ. މި މަޝްރޫޢުގެ ދަށުން ދުވާފަރުގައި ވަނީ 22.2 ހެކްޓަރުގެ ބިން ވަނީ އިތުރުކޮށްދީފައެވެ. އަދި ބޮޑުހިލައިގެ ރިވެޓްމެންޓަކާއި ބޭރުތޮށި ވަނީ ޖަހާފައެވެ.
މީގެ އިތުރުން ދުވާފަރު މަގުހެދުމުގެ މަޝްރޫޢުގެ ދަށުން އެރަށުގައި 5.7 ކިލޯމީޓަރުގެ މަގު ވަނީ ޒަމާނީ ފެންވަރަށް ހަދާފައެވެ. މި މަޝްރޫޢު ކުރިއަށް ގެންދިޔައި ދެ ފިޔަވައްސަކަށް ބަހާލައިގެންނެވެ. މި މަޝްރޫޢުގެ މަސައްކަތްކޮށްފައި ވަނީ އެމް.ޓީ.ސީ.ސީއާ ހަވާލުކޮށްގެންނެވެ.
