މޫސަގެ މަރު: 30 ދުވަސްތެރޭގައި ޙުކުމް ކުރައްވާނެ
މިހާރު މި މައްސަލައިގެ ގަޒިއްޔާތައް ބައްލަވަމުން ގެންދަވަނީ އެ ކޯޓުގެ ދެ ސެކްޝަނަކުން
ވ. ކެޔޮދޫ ދޭލިއާގޭ، މޫސާ އަހުމަދު މަރާލި މައްސަލަ
ތޫނު އެއްޗަކުން ހަމަލާދީ ވ. ކެޔޮދޫ ދޭލިއާގޭ، މޫސާ އަހުމަދު މަރާލި މައްސަލައިގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ކްރިމިނަލް ކޯޓުގައި މި މައްސަލަ ބައްލަވަމުން ގެންދެވީ ގާޒީ ޙަސަން ސައީދެވެ. ނަމަވެސް ގާޒީ ޙަސަން ސައީދު ރިޓަޔަރ ކުރެއްވުމަށްފަހު މިހާރު މި މައްސަލައިގެ ގަޒިއްޔާތައް ބައްލަވަމުން ގެންދަވަނީ އެ ކޯޓުގެ ދެ ސެކްޝަނަކުންނެވެ.
އޭގެ ތެރެއިން ބުރާސްފަތި ދުވަހު ކުރިއަށް ގެންގޮސްފައިވަނީ ސ. ހިތަދޫ މުޑުދާސް، އަލީ ހަސަން އާއި ނ. ޅޮހީ ކަނީރުމާގޭ، މުހައްމަދު ރިޔާޒް އަދި މ. ދިއްގަރު ދެބުދާރުގޭ، އަހުމަދު އީޖާދު މުހައްމަދުގެ މައްޗަށް ކުރާ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގައި ބައިވެރިވުމުގެ ކުށުގެ ދައުވާއާއި، ސ ހިތަދޫ ގުލްބަކާގޭ މުޙައްމަދު ނާޒިޝް ނާޒިމްގެ މައްޗަށް ކުރާ މީހަކަށް ނުރައްކާތެރި ހާނިއްކައެއްވާގޮތަށް ތޫނު އެއްޗެއް ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.
މި މައްސަލަތަކުގައި މިހާރު ވަނީ ހެކިބަސް ނަގައި ޚުލާސާ ބަޔާންވެސް އިއްވާފައެވެ.
މި މައްސަލައިގައި ޚުލާސާ ބަޔާން އިއްވިފަހުން ވަނީ ސިއްރު ހެކިވެރިއަކު އޭނާ ހެކިބަސް ދިނީ ނުފޫޒުގެ ދަށުންކަމަށް ބުނެ ފޮނުވާފައިވާ ސިޓީއަކާ ގުޅިގެން އަޑުއެހުމެއް ބާއްވާފައެވެ. އޭރު އެ ސިޓީއާ ގުޅިގެން ތަފްސީލީ ގޮތެއްގައި ވާހަކަ ދެކެވިފައިވާއިރު، ސިޓީއާ ގުޅިގެން ކަށަވަރު ކުރަންޖެހޭ ކަންތައްތަކެއް ހުރުމާއެކު އެކަންކަން ކުރަމުންދާކަމަށް ކޯޓުން އޭރު ވަނީ ބުނެފައެވެ.
އެ ހެކިވެރިޔާ ސިއްރު ހެކިބަސްދެއްވީ ގާޒީގެ ކުރިމަތީގައި ކަމަށާއި، އޭރު ހެކިބަސްދެއްވީ ނުފޫޒެއްގެ ދަށުންކަން ދައުލަތަށް ޤަބޫލު ނުކުރެވޭކަމަށް ދައުލަތުގެ ވަކީލު ވިދާޅުވިއެވެ. އެއީ ހެކިބަސް އަދާކުރިތާ އަހަރެއް ފަހުން ފޮނުވި ސިޓީއެއްކަމަށްވެސް ދައުލަތުގެ ވަކީލު ވިދާޅުވިއެވެ.
ދައުލަތުގެ ވަކީލު ވިދާޅުވީ، އެކަމާ ގުޅިގެން ކޯޓުން އަމަލު ކުރެއްވި ގޮތާއި ގުޅޭ މައުލޫމާތެއް ފަހުން ދައުލަތަށް ކޯޓުން ހިއްސާކޮށްފައިނުވާކަމަށެވެ.
އެ ނުކުތާއަށް ދައުލަތާއި ދިފާއުންވެސް ބުރާސްފަތި ދުވަހުގެ އަޑުއެހުމުގައި ވާހަކަ ދައްކާފައިވެއެވެ.
ގާޒީ އަލީ ނަދީމް ވިދާޅުވީ، މި މައްސަލަތަކުގައި ދެން އޮންނާނީ ޙުކުމް ކުރެއްވުން ކަމަށެވެ. އެގޮތުން 30 ދުވަސް ތެރޭގައި މި މައްސަލައިގެ ޙުކުމް ކުރައްވާނެކަމަށް ގާޒީ އަލީ ނަދީމް ވިދާޅުވިއެވެ.
މި މައްސަލައާ ގުޅިގެން މީގެ އިތުރުންވެސް މަގްބޫލު ސަބަބެއް ނެތި އާންމު ތަނެއްގައި ތޫނު އެއްޗެއް ގެންގުޅުމުގެ ދައުވާއެއް އިބްރާހީމް ސައްމާހު އަހުމަދު ފަތުހީއާއި، ސ. ހިތަދޫ ގުލްބަކާގޭ، މުހައްމަދު ނާޝިޒް ނާޒިމްގެ މައްޗަށް ވަނީ ކޮށްފަ އެވެ. އެ މައްސަލަ ކުރިއަށް ގެންދަވަނީ ގާޒީ އިބްރާހިމް އިޙްސާންއެވެ. އެ މައްސަލައިގައިވެސް ދެން އޮންނާނީ ޙުކުމް ކުރުމެވެ.
އަދި މި މައްސަލަގައި ދައުލަތުން ދައުވާކޮށްފައިވާ މާމިގިލީ ސޭޑީގްރޯވް، އިބްރާހިމް ސައްމާހު އަހުމަދު ފަތުހީގެ ބައިގައި ދެން އޮންނާނީ ދައުލަތުގެ ސިއްރު ހެކިންތަކެއްގެ ހެކިބަސް ނެގުމެވެ. އެ މައްސަލަވެސް ބައްލަވަނީ ގާޒީ އިޙްސާންއެވެ.
