ރައީސް ޞާލިހަށްވުރެ ވަކި އެކުގައި މަސައްކަތްކުރަން ފަސޭހަ، އިތުބާރުހުރި ވެރިއެއް ނުހޯދޭނެ: ދުވާފަރު ދާއިރާގެ މެންބަރު
24 އޯގަސްޓު 2023 | ބުރާސްފަތި 02:31ދުވާފަރުގެ ބިން ހިއްކާނެ ވާހަކަ އެންމެ ފުރަތަމަ ސަރުކާރުން ބުނުމުން އިދިކޮޅު ފަރާތްތަކުން ބުނަމުންދިޔައީ އެއީ ވޯޓަށް ވާ ވައުދެއްކަމަށް
ދުވާފަރު ދާއިރާގެ މެންބަރު އިސްމާއީލު އަހުމަދު
ދުވާފަރާއި ރާއްޖޭގެ ރައްޔިތުންނަށް ދޭން އޮތް ޔަގީންކަމަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށްވުރެ ވަކި އެކުގައި މަސައްކަތްކުރަން ފަސޭހަ، ރަނގަޅު، އިތުބާރު ހުރި ވެރިއެއް ނުހޯދޭނެކަންކަމަށް ދުވާފަރު ދާއިރާގެ މެންބަރު އިސްމާއީލު އަހުމަދު ވިދާޅުވެއްޖެއެވެ.
ރައީސް މިހާރު ރ އަތޮޅަށް ކުރައްވަމުން ގެންދަވާ ދަތުރުފުޅުގައި ރ. ދުވާފަރުގައި ބުދަދުވަހުގެ ރޭ ބޭއްވި "އުފާވެރި އަމާން ރާއްޖެ" ޖަލްސާގައި ވާހަކަފުޅު ދައްކަވަމުން އިސްމާއީލު ވިދާޅުވީ އެމަނިކުފާނަކީ ރައީސް ޞާލިހުއާ ގާތުން މަސައްކަތްކުރި މީހެއްކަމަށެވެ. ދުވާފަރުގެ ބިން ހިއްކާނެ ވާހަކަ އެންމެ ފުރަތަމަ ސަރުކާރުން ބުނުމުން އިދިކޮޅު ފަރާތްތަކުން ބުނަމުންދިޔައީ އެއީ ވޯޓަށް ވާ ވައުދެއްކަމަށާއި އެއީ ފެން ނުހިފާނެ ވައުދެއްކަމަށެވެ.
އިންތިޚާބަށްފަހު ރައީސްއާ ބައްދަލުވި ފުރަތަމަ ފަހަރު އެދިވަޑައިގަތީ ދުވާފަރުގެ ބިން ހިއްކާ ބޯހިޔާވަހިކަން ހޯދައިދެއްވުމަށްކަމަށް އިސްމާއީލު ވިދާޅުވިއެވެ.
އިސްމާއީލު ވިދާޅުވީ ރައީސް އަބްދުﷲ ޔާމީންގެ ވެރިކަމުގެ ފަސް އަހަރު ދުވާފަރުގައި ހިންގި ތަރައްގީގެ މަޝްރޫޢުތައް 15 މިލިއަން ރުފިޔާއަށްވެސް ނާރާކަމަށެވެ. އެއީ ދުވާފަރު ރައްޔިތުން ބަދަލަކަށް ބޭނުންވި މައިގަނޑު ސަބަބުކަމަށާއި ނަމަވެސް މިފަސް އަހަރުގެ ތެރޭގައި ދުވާފަރުގައި ހިންގި ތަރައްގީގެ މަޝްރޫޢުތައް 300 މިލިއަން ރުފިޔާއާ ކައިރިކުރާކަމަށެވެ.
އެހެންކަމުން ރައީސް ޞާލިހު ނޫން ގޮތެއް ހޯދުން އުޅުން އެއީ ޒާތީވުން ނުވަތަ އެމީހަކު ހާސިލުކުރަން އުޅުނު އަމިއްލަ އެދުމެއް ހާސިލުމުވުމުން ނޫނީ ކުރާނެ ކަމެއް ނޫންކަމަށް އިސްމާއީލު ވިދާޅުވިއެވެ.
އިސްމާއީލު އިތުރަށް ވިދާޅުވީ ރައީސް ޞާލިހު ރަށްތަކަށް ކުރިއެރުމާއި ތަރައްޤީ ގެނެެސްދެއްވައިފި ކަމަށާއި އެހެންކަމުން ރައީސަށް ދެވަނަ ދައުރެއް ހައްގުކަމަށެވެ. އަދި ދުވާފަރުން ރައީސަށް ދެވަނަ ދައުރެއް ހޯދައިދޭނެކަމުގެ ޔަގީންކަން ވެސް މެންބަރު އިސްމާއީލް ދެއްވިއެވެ.
