ދެވަނަ ދައުރެއްގައި މީޑިއާތަކައް މާލީ އެހީތެރިކަން ދޭން މެނިފެސްޓޯގައި ހިމަނައިފި
ވަކި ޝަރުތުތަކެއް ފުރިހަމަވާ ފުރިހަމަވާ މީޑިއާތަކަށް ދައުލަތުގެ ބަޖެޓުން ކަނޑައެޅޭ އިންސައްތައެއްގެ ފައިސާ އެލޮކޭޓްކުރާނެ
ނޫސްވެރިންތަކެއް
ދައުލަތުގެ ބަޖެޓުން މީޑިއާތަކަށް ފައިސާ ހަމަޖައްސައި، ރޭޓިން ނިޒާމެއްގެ ތެރެއިން އެ ފައިސާ ދޫކުރަން އެމްޑީޕީގެ މެނިފެސްޓޯގައި ހިމަނައިފިއެވެ.
މިކަން އިއުލާން ކޮށްފައިވަނީ އަންގާރަ ދުވަހުގެ ރޭ ބ. ދަރަވަންދޫގައި ކުރިއަށްގެންދިޔަ "އުފާވެރި އަމާން ރާއްޖެ" ޖަލްސާގައި އިފްތިތާހު ކުރި "ހެޔޮވެރިކަން" ސިޔާސަތުގެ ތެރެއިންނެވެ. އެގޮތުން މީޑިއާ ދާއިރާތަރައްގީ ކުރުމަށް ތަފާތު ކަންކަން ކުރުމަށް މި ސިޔާސަތުގެ ތެރޭގައި ވަނީ ހިމަނައިފައެވެ.
އެ ސިޔާސަތުގައި ބުނީ، މާލީ ގާބިލްކަން ހޯދުމަށް ވަކި ފަރާތަކަށް ބަރޯސާވުން ހުއްޓާލުމަށް ގާނޫނުގައި ކަނޑައަޅާ ވަކި ޝަރުތުތަކެއް ފުރިހަމަވާ ފުރިހަމަވާ މީޑިއާތަކަށް ދައުލަތުގެ ބަޖެޓުން ކަނޑައެޅޭ އިންސައްތައެއްގެ ފައިސާ އެލޮކޭޓްކުރާނެ ކަމަށެވެ. އެ ފައިސާ ދޫކުރާނީ، މެނިފެސްޓޯގައިވާ ގޮތުން ހަމަހަމަކަމާއި ނުފޫޒުން އެއްކިބާވެފައިވާ ނިޒާމަކުންކަން ކަށަވަރުކުރުމަށް، ބައިނަލްއަގުވާމީ މިންގަނޑުތަކާއި އުސޫލްތަކާއި އެއްގޮތަށް އޮންނަ ރޭޓިންގް ނިޒާމެއް ކަނޑައަޅައި އޭގެ ދަށުން ކަމަށް ވެސް ވަނީ ބުނެފައެވެ.
މީޑިއާތަކުގެ ސެލްފް ގަވާނަންސް އަދި ރަޖިސްޓްރޭޝަން ޕްރޮސެސްގައި ހުރި މައްސަލަތައް ހައްލުކުރުމަށް މީޑިއާގެ ދަފްތަރުގައި ހުރި މައްސަލަތައް ހައްލުކުރާނެ ކަމަށް ވެސް މި ސިޔާސަތުގައި ވަނީ ބުނެފައެވެ. އަދި ކޮމިއުނިޓީ-ބޭސްޑް ޖާނަލިޒަމާއި ފްރީލާންސް ޖާނަލިޒަމާއި ޑިޖިޓަލް ކޮންޓެންޓް ކްރިއޭޝަން ފަދަ ދާއިރާތަކުން ކުރިއެރުމަށް ބެނުންވާ، ތަމްރީނާއި، ތައުލީމީ ފުރުސަތު ފަހިކޮށްދިނުން ވެސް މި ސިޔާސަތުގެ ތެރޭގައި ވަނީ ހިމަނައިފައެވެ.
މީގެ އިތުރުން ނުކުޅެދުންތެރިކަން ހުންނަ ފަރާތްތަކަށް ހާއްސަ ކޮންޓެންޓު ދައުލަތުގެ މީޑިއާއިން އުފެއްދުމާއި ދިވެހި ސްޓްރީމިން ސާވިސްތަކާއި ޕޮޑްކާސްޓިން އަދި އެހެނިހެން އޮންލައިން މީޑިއާ ޕްލެޓްފޯމްތަކުގައި ކޮންޓެންޓް އުފައްދާ މީހުންގެ ކުރިއެރުމަށް ބޭނުންވާ ގާނޫނީ ރައްކާތެރިކަމާއި އެހީތެރިކަން ފޯރުކޮށްދިނުމާއި އެ މީހުންނަށް ބޭނުންވާ މާލީ އެހީތެރިކަން އެސްޑީއެފްސީ މެދުވެރިކޮށް ފޯރުކޮށްދޭނެ ކަމަށް މެނިފެސްޓޯގައި ވަނީ ބަޔާން ކޮށްފައެެވެ.
