ބ. ދަރަވަންދޫ އެއަރޕޯޓް ބޮޑުކޮށް، ރަށުން ލިބެން ހުރި ހިދުމަތްތައް ފުޅާކޮށް އިތުރު ވައުދުތައް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް އެރަށަށް ވެވަޑައިގަންނަވައިފިއެވެ.
"އުފާވެރި އަމާންރާއްޖެ" ކެމްޕޭން ޖަލްސާގައި ބ. ދަރަވަންދޫގައި ވާހަކަފުޅުދައްކަވަމުން ރައީސް ޞާލިހް ވިދާޅުވީ ދަރަވަންދޫއަށް ކުރިއަށް އޮތް ދައުރުގައި ކުރަން ނިންމާފައިވާ ކަންކަން އެބަހުރި ކަމަށެވެ. އެެގޮތުން ދަރަވަންދޫއަކީ އެއަރޕޯޓެއް އޮތްތަނެއް ކަމަށާއި، އެހެންކަމުން މުޅި ހިސާބާ ގުޅުވާލަދޭ މަރުކަޒެއްގެ ގޮތުގައި ދަރަވަންދޫ ވެފައިވާ ކަމަށް ރައީސް ވިދާޅުވިއެވެ. އަދި ދަރަވަންދޫ އެއަރޕޯޓަކީ އެ ސަރަހައްދުގެ އެންމެ ބިޒީ ޑޮމެސްޓިކް އެއަރޕޯޓް ކަމަށާއި، އަދި އެންމެ ރަނގަޅު ފައިދާވެސް ވާ އެއަރޕޯޓް ކަމަށް ރައީސް ވިދާޅުވިއެވެ.
ރައީސް ވިދާޅުވީ އެތަނުގައި އިތުރު ހިދުމަތްތައް ގާއިމްކުރައްވާނެ ކަމަށެވެ. އަދި ސިއްހީ ހިދުމަތް މިހާރަށްވުރެ ރަނގަޅުކުރުމަށްޓަކައި ހެލްތް ސެންޓަރަށް ގެންނަންޖެހޭ ބަދަލު ގެނެސް އިތުރު ހިދުމަތް އެތަނުން ލިބޭނެ ގޮތް ހަދައިދެއްވާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ރަށުގެ ރައްޔިތުންނަަށް ބޭނުންވާ ބޯހިޔާވަހިކަމުގެ މައްސަލައަށް ހައްލެއް ހޯދައި ދިނުމަށްޓަކައި ރޯ ހައުސް ނުވަތަ ފުލެޓް ކުރިއަށް އޮތް ދައުރުގެ ތެރޭގައި އަޅާދެއްވާނެ ކަމަށެވެ. އަދި ބ. އަތޮޅު މަދުރަސާގައި ބޭނުންވެފައިވާ އިތުރު ވަސީލަތްތައް ހޯދުމަށްޓަކައި ސްކޫލަށް ބޭނުންވާ އޮފީހާއި ކްލާސް ރޫމްތައް އަޅައިދެއްވާ ބޮޑެތި ހުރިހާ މަގެއް ޒަމާނީ ފެންވަރަށް ހަދާ ތާރުއަޅައިދެއްވާނެ ކަމަށް ރައީސް ވިދާޅުވިއެވެ. ރައީސް ވަނީ ދަރަވަންދޫ ރައްޔިތުން ދަތުރު ދިއުމަށްޓަކައި ރަށާ ކައިިރިން ފަޅު ރަށެއް ޕިކްނިކް އައިލެންޑެއްގެ ގޮތުގައި ހަމަޖައްސައިދެއްވާނެ ކަމަށް ވިދާޅުވެފައެވެ.
ރައީސް ވަނީ ރަށް ހިމާޔަތްކުުރުމަށްޓަކައި ކުރަންޖެހޭ މަސައްކަތް ފޭސް ދޭއްގެ ތެރެއިން ކުރައްވާނެ ކަމަށާއި، ރަށުގެ އޮފީސްތައް ހިންގުމަށް އޮފީސް ކޮމްޕްލެކްސް އަޅައިދީ، އެއަރޕޯޓް ބޮޑުކޮށް އިތުރަށް ތަރައްގީކުރައްވާނެ ކަމަށް ވިދާޅުވެފައެވެ. އަދި ބަޔޮސްފިޔަރ ރިޒަވްގެ ގޮތުގައި އޮތް ހަނިފަރުބޭގެ އައުޓް ޕޯސްޓެއް ދަރަވަންދޫގައި ގާއިމްކޮށްދެއްވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ މިއީ މިހާތަނަށް ދަރަވަންދޫއަށް ކުރުމަށް ނިންމާފައިވާ ބައެއް ކަންކަން ކަމަށެވެ. އަދި ކުރިއަށް އޮތްތަނުގައި ރައްޔިތުންނާއި މަޝްވަރާކޮށް ކަންކަން އިތުރުކުރެވޭނެ ކަމަށެވެ.
