މުއިއްޒު އަށް މާރިޔާގެ ފާޑުވިދާޅުވުން - އުޅުއްވަނީ އެލްބޯޑު ޖައްސަވައިގެން، ރޭވުންތެރިކަމާއި އަގުކުރުމެއް ނެތް
22 އޯގަސްޓު 2023 | އަންގާރަ 09:38މުއިއްޒު މަސައްކަތެއް ކުރިޔަސް އެ މަސައްކަތެއް އަލުން ކުރަން ޖެހޭ ކަމަށް މާރިޔާ ވިދާޅުވި
އެމްޑީޕީގެ ރިޔާސީ ކެމްޕެއިންގެ ތަރުޖަމާނު މާރިޔާ އަހުމަދު ދީދީ
އިދިކޮޅު ކެންޑިޑޭޓް ޑރ.މުހައްމަދު މުއިއްޒު އުޅުއްވަނީ އެލްބޯޑު ޖައްސަވައިގެން ކަމަށާއި އެއްވެސް ކަމެއްގައި ރޭވުންތެރިކަމާއި އަގުކުރުމެއް ނެތް ކަމަށް އެމްޑީޕީގެ ރިޔާސީ ކެމްޕެއިންގެ ތަރުޖަމާނު މާރިޔާ އަހުމަދު ދީދީ ވިދާޅުވެއްޖެއެވެ.
މާރިޔާ މިފަދައިން ވިދާޅުވީ އާދިއްތަ ދުވަހު ސޯލްޓް ކެފޭގައި ބޭއްވެވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުންނެވެ.
މުއިއްޒުގެ ރޭވުންތެރިކަމެއް ނެތް ކަމަށާއި ރަށްރަށަށް ވަަޑައިގެން ވެސް ރައްޔިތަކު އޭނާގެ ކަންފަތް ބުޑުގައި އެއްޗެއް ދެންނެވުމުން، އެ ވާހަކަ އެ ރަށެއްގައި ދައްކަވަމުންގެންދަވާ ކަމަށް މާރިޔާ ވިދާޅުވިއެވެ. މާރިޔާ ވިދާޅުވީ އެލްބޯޑު ޖަހައިގެން މުއިއްޒު އުޅުއްވާ ކަަމަށް އާއްމުން ބުނަމުންދާ ކަމަށާއި ސަބަބަކީ މުއިއްޒު ކޮންމެ މަސައްކަތެއް ކުރެއްވިޔަސް އެ މަސައްކަތެއް އަލުން ކުރަން ޖެހުން ކަމަށެވެ.
މުއިއްޒުގެ ވެރިކަމެއްގައި ކުރީގެ ރައީސް އަބްދުﷲ ޔާމިނުގެ ވެރިކަމާއި އެއްގޮތަށް ކައުންސިލަރުން ކައުންސިލަށް ވަނަނުދޭނެ ކަމަށްވެސް މާރިޔާ ވިދާޅުވިއެވެ. ސިޓީ ކައުންސިލްތަކުގެ ބާރު ސަރުކާރުން ނަގަން ޖެހުނީ ރައްޔިތުންނަށް ދޭން ޖެހޭ ޚިދުމަތްތަތައް ދަތިވުމުން ކަމަށް ޔާމީން ވިދާޅުވެފައިވާ ކަމަށް މާރިޔާ ވިދާޅުވިއެވެ. އަދި ވެރިކަން ކުރެވޭނީ ހުރިހާ ބާރެއް އޮވެގެން ކަމަށް އޭރު ވިދާޅުވެފައިވާކަން މާރިޔާ ފާހަގަކުރެއްވިއެވެ. 2018އިގެ އިންތިޚާބާއި ދިމާކޮށްވެސް ޔާމީން ވާހަކަފުޅުދެއްކެވީ ލާމަރުކަޒީ ނިޒާމާއި ދެކޮޅަށް ކަމަށް މާރިޔާ ވިދާޅުވިއެވެ. މުއިއްޒު އަކީ ވެސް ޔާމީނާއި އެއްފަދައަކުން އަމަލުކުރައްވާނެ ބޭފުޅެއް ކަމަށް ސިފަކުރައްވާ މާރިޔާ ވަނީ މުއިއްޒު އަކީ ލާމަރުކަޒީ ނިޒާމާއި އެއްގޮތަށް އަމަލުކުރައްވާނެ ބޭފުޅެއް ނޫން ކަމަށް ވިދާޅުވެފައެވެ.
މީގެ އިތުރުން ސިޓީ ކައުންސިލްގެ މޭޔަރުކަމުގައި ހުންނަވައިގެންވެސް މުއިއްޒު މަސައްކަތް ކުރައްވަނީ ޤާނޫނު އަސާސީ އާއި ޚިލާފަށް ކަމަށް މާރިޔާ ވިދާޅުވިއެވެ. ސަރުކާރުން މިހާރުވެސް ކަންކަން ކުރަނީ ވާދަވެރިންނަށް ފަހިވާ ގޮތަށް ނަމަވެސް މުއިއްޒު މަސައްކަތް ކުރައްވަނީ އެމްޑީޕީގެ ކެމްޕެއިނަށް ހުރަސް އަޅުއްވަން ކަަމަށް ވެސް މާރިޔާ ވިދާޅުވިއެވެ. އާބާދީ އެއްފަސްކުރުމާއި، ރަށްރަށް މަދު ކުރުމަށް މުއިއްޒު ކުރިން ވަކާލާތުކުރައްވާފައިވާ ކަމަށާއި އެއީ ސުވާލު އުފެދޭ ކަމެއް ކަމަށް މާރިޔާ ވިދާޅުވިއެވެ. އެހެންކަމުން ލާމަރުކަޒީ ނިޒާމް ހަރުދަނާކުރައްވާނެ ކަަަމަށް މުއިއްޒު ވިދާޅުވި ނަމަވެސް މުއިއްޒު އެކަން ނުކުރައްވާނެ ކަމަށް މާރިޔާ އިތުރަށް ވިދާޅުވިއެވެ.
