2021 ވަނަ އަހަރުގެ ޑިސެމްބަރު މަހުގެ ތެރޭގައި ފުލުހުންގެ މުއައްސަސާގެ އޮނިގަނޑަށް ގެނައި ބަދަލަކީ އެހާ ފަސޭހަ ބަދަލެއް ނޫން ކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.
ކޮމިޝަނަރ އޮފް ޕޮލިސް އެފަދައިން ވިދާޅުވީ ސެންޓްރަލް ޕޮލިސިންގ ކޮމާންޑު، އަވައްޓެރި ފުލުހުންގެ ޚިދުމަތުގެ ރިވިއު ފޯރަމުގައެވެ. ސަރޖަންޓް އާދަމް ހަލީމް ކްރިމިިނަލް އިންވެސްޓިގޭޝަން ބިލްޑިންގގައި ބޭއްވި އެ ފޯރަމް ޝަރަފުވެރި ޝަރަފުވެރިކޮށްދެއްވައި ވާހަކަފުޅު ދައްކަވަމުން ސީޕީ ވިދާޅުވީ ފުލުހުންގެ މަސައްކަތްތައް ދެމެހެއްޓުމުގައި ފަހި ވިސްނުމެއް ބޭނުންވާކަމަށެވެ. އެހެންކަމުން މުއައްސަސާގެ މަސައްކަތްތައް ތަރައްގީކުރުމުގެ މަސައްކަތުގައި ބައިވެރިވެވޭނީ ކިހިނެއްތޯ ވިސްނައި ބައިވެރިވެވޭ ފެންވަރުގެ މީހަކަށް ކޮންމެ ފުލުހަކުވެސް ވުމަށްޓަކައި މަސައްކަތްކުރަންޖެހޭ ކަމަށް ސީޕީ ވިދާޅުވިއެވެ. އަދި ކޮންމެ ރޭންކެއްގެ ފުލުހަކަށް ވިޔަސް މިކަންކަމާމެދު ވިސްނައިގެން ނޫނީ މުއައްސަސާގެ ގާބިލުކަމާއި މުއައްސަސާއާ މެދު ރައްޔިތުންކުރާ އުންމީދާ ހަމައަށް ނުދެވޭނެކަމަށް ވެސް ވިދާޅުވިއެވެ.
މުއައްސަސާގެ ކުރިމަގަށްޓަކައި ކޮންމެ މުވައްޒަފަކު ކުރަމުންމިދާ މަސައްކަތްތަކުގެ އިތުރަށް މަސައްކަތްކޮށްގެން ނޫނީ ލަނޑުދަނޑިތައް ހާސިލުނުވާނެކަމަށް ފާހަގަކުރައްވާ ސީޕީ ވިދާޅުވީ ހަރުދަނާ ވިސްނުމަކާއެކު މަސައްކަތްކުރުމަކީ ކޮންމެ ފުލުހެއްގެ އަޒުމަކަށް ހަދަން ޖެހޭ ކަމަށެވެ.
މީގެއިތުރުން ފުލުހުންގެ މުއައްސަސާގެ ތެރޭގައި ރައްޔިތުންނާ ގާތުން ފުލުހުން މަސައްކަތްކުރަން ގެންގުޅޭ ވިސްނުމަށް ނުވަތަ އޮންނަ ސަގާފަތަށް ވަރަށް ބޮޑެތި ބަދަލުތަކެއް އައިސްފައިވާ ކަމަށް ވެސް ސީޕީ ވިދާޅުވިއެވެ. 2018 ވަނަ އަހަރު އަވައްޓެރި ފުލުހުންގެ މަސައްކަތް ފެށިގެން އައުމާއެކު، މުއައްސަސާގެ ތެރޭގައި ރައްޔިތުންނާ ގާތުން ފުލުހުން މަސައްކަތްކުރަން ގެންގުޅޭ ވިސްނުމަށް ވަރަށް ބޮޑު ބަދަލެއް އައި ކަމަށެވެ. މީގެ އިތުރުން މާލެ ސަރަހައްދާއި އަތޮޅުތެރޭގައި ވަރަށް ސާފުކޮށް މި ފަލްސަފާގެ މައްޗަށް ތަރުތީބުވެ ކަންކަން ރޭވިގެން މަސައްކަތް ކުރެވިގެންދާ ކަމަށް ވިދާޅުވިއެވެ. ހަމައެހެންމެ މިކަމުގެ ސަބަބުން ފުލުހުންނާއި ރައްޔިތުންގެ ގުޅުން އިތުރަށް ހަރުދަނާވެގެންދާ ކަމަށާއި ރައްޔިތުންގެ ހިތުގައި ފުލުހުންނާއި މެދު އިތުބާރާއި ޔަގީންކަން އުފެދިފައިވާ ކަމަށް ސީޕީ ވިދާޅުވިއެވެ. އަދި ރައްޔިތުންގެ ކަންބޮޑުވުންތަކަށް އަޅާލެވޭ މިންވަރު އިތުރުވެގެން ގޮސްފައިވާކަން ފާހަގަކުރެވޭކަމަށް ވިދާޅުވިއެވެ.
ސީޕީ ވިދާޅުވީ އެންމެބޮޑު އާބާދީއެއް އޮތް މާލެ ސަރަހައްދުގައި ފުލުހުންގެ މަސައްކަތް އަވައްޓެރި ފުލުހުންގެ ފަލްސަފާގެ މައްޗަށް ތަރުތީބުކޮށް، އެ ފަލްސަފާއަށް އެންމެ އެކަށީގެންވާގޮތަށް އިންސާނީ ވަސީލަތް ގާއިމުކުރަމުންދާ ކަމަށެވެ. ކުރިއަށް އޮތް ތަނުގައި ހާއްސަ ސަމާލުކަމެއް ދީގެން ސެންޓްރަލް ޕޮލިސިންގ ކޮމާންޑުން މަސައްކަތްތައް ތަރުތީބުކޮށް ބައްޓަން ކުރަން ޖެހޭ ކަމަށް ވެސް ސީޕީ ވިދާޅުވިއެވެ. އޭގެ އިތުރުން، އަވައްޓެރި ފުލުހުން ކުރަމުންދާ މަސައްކަތްތަކުގެ ތެރެއިން މިހާރު މަސައްކަތްކުރެވިފައިވާ މިންވަރު ދެނެގަނެ ކުރިއަށް އޮތްތަނުގައި މި މަސައްކަތްތައް އިތުރަށް ހަރުދަނާ ކުރުމަށްޓަކައި ކުރެވިދާނެ ކަންތައްތަކަކީ ކޮބައިތޯ ބަލައި ދިރާސާކުރަން ޖެހޭ ކަމަށް ސީޕީ ވިދާޅުވިއެވެ.
ޕެނަލް ޑިސްކަޝަނާއި ގްރޫޕް މަސައްކަތްތައް އަދި ޕްރެޒެންޓޭޝަންތަކާ އެކު ކުރިއަށް ގެންދިޔަ މިފޯރަމްގައި، ގްރޭޓަރ މާލެ އޭރިއާގެ އަވައްޓެރި ފުލުހުން ވޭތުވެ ދިޔަ ފަސް އަހަރު ކޮށްފައިވާ މަސައްކަތްތަކާއި، އަވައްޓެރި ފުލުހުންގެ މަސައްކަތްކުރުމުގައި ދިމާވާ ގޮންޖެހުންތަކާއި ކުރިއަށް އޮތްތަނުގައި އަވައްޓެރި ފުލުހުންގެ މަސައްކަތްތައް އިތުރަށް ހަރުދަނާކުރުމަށް ކުރެވިދާނެ މަސައްކަތްތަކާ ގުޅޭގޮތުން މަޝްވަރާކޮށް ވިލަރެސް ކުރުމުގެ މަސައްކަތްކޮށްފައިވެއެވެ. މާލެ އޭރިއާގައި އަވައްޓެރި ފުލުހުންގެ މަސައްކަތްތައް ތަރުތީބުކޮށް ގެންނަން ޖެހޭ ބަދަލުތައް ގެނައުމަށް ހިޔާލު ބަދަލުކޮށް މަޝްވަރާކޮށްފައިވެއެވެ. އަދި އަވައްޓެރި ފުލުހުން ކުރަމުންގެންދާ މަސައްކަތްތައް ފުރިހަމަގޮތެއްގައި ކުރިއަށް ގެންދާނެގޮތާ ގުޅޭގޮތުން މި ފޯރަމްގެ ތެރެއިން ހިޔާލު ބަދަލުކޮށް މަޝްވަރާކޮށްފައިވެއެވެ.
ސެންޓްރަލް ޕޮލިސިންގ ކޮމާންޑު، އަވައްޓެރި ފުލުހުންގެ ޚިދުމަތުގެ ރިވިއު ފޯރަމް 2023ގައި ފުލުހުންގެ އެގްޒެކެޓިވް އޮފިސަރުންނާއި ކޮމިޝަންޑު އޮފިސަރުން އަދި ސެންޓްރަލް ޕޮލިސިންގ ކޮމާންޑުގެ ޕޮލިސް ސްޓޭޝަންތަކުގެ ޝިފްޓް އިންޗާޖުން، ރެސްޕޯންސް އެންޑް ޕެޓްރޯލް، އިންވެސްޓިގޭޝަން ޔުނިޓް އަދި އަވައްޓެރި ފުލުހުންނާއި ފްރަންޓްލައިން ފުލުހުން ހިމެނޭ ގޮތަށް ގިނަ އަދަދެއްގެ ފުލުހުން ވަނީ ބައިވެރިވެފައެވެ. ދިވެހި ފުލުހުންގެ ޚިދުމަތް ރައްޔިތުން އެދޭގޮތަށް ރައްޔިތުންނާ ގާތުން ދިނުމަށްޓަކައި އަވައްޓެރި ފުލުހުންގެ ޚިދުމަތް ތައާރަފުކޮށްފައިވަނީ 2018 ޑިސެމްބަރު 17 ވަނަ ދުވަހުއެވެ.
