ސްޕެއިންގެ ތަޖުރިބާކާރު ޑިފެންޑަރު ސާޖިއޯ ރާމޯސް ހޯދުމަށް ކުރަމުން އައި މަސައްކަތް ތުރުކީގެ ބެސިކްޓާސް އިން ހުއްޓާލައިފި އެވެ.
ސްޕެއިންގެ ރެއާލް މެޑްރިޑު ދޫކޮށް ރާމޯސް ޕީއެސްޖީ އަށް ބަދަލުވީ 2021 ވަނަ އަހަރު އެވެ. އެ ކުލަބާއެކު އޭނާ ސޮއި ކުރި ދެ އަހަރުގެ އެއްބަސްވުން މިދިޔަ ސީޒަންގެ ނިޔަލަށް ހަމަވުމާއެކު، އޭނާ ވަނީ އެ ކުލަބު ދޫކޮށްލަން ނިންމައިފަ އެވެ. އެއާއެކު އޭނާ ހޯދުމުގެ ޝައުޤުވެރިކަން ތުރުކީގެ ބެސިކްޓާސް އިން ވަނީ ފާޅުކޮށްފަ އެވެ. އެ ކުލަބުން އައީ ރާމޯސްއާއެކު އެކަމުގެ މަޝްވަރާތައް ކުރަމުންނެވެ. މަޝްވަރާތަކަށްފަހު އެ ކުލަބަށް ބަދަލުވާން ރާމޯސް އަނގަ ބަހުން އެއްބަސްވެފައިވާ ކަމަށް ރިޕޯޓުތައް ވަނީ ބުނެފަ އެވެ. ނަމަވެސް، ބެސިކްޓާސް އިން ވަނީ އެ ކުލަބުން ރާމޯސް ހޯދުމަށް ކުރަމުން އައި މަސައްކަތް ހުއްޓާލިކަން ހާމަކޮށްފަ އެވެ. އެގޮތުން އެ ކުލަބުން ބުނީ، މިހާތަނަށް އެކަމުގައި އެއްވެސް ކަހަލަ އެއްބަސްވުމެއް އެކުލަވާލާފައި ނުވާނެ ކަމަށެވެ. އަދި ރާމޯސް ހޯދުމުގެ މަސައްކަތް ހުއްޓާލަން ޖެހުނީ މާލީ ގޮތުން ކުރިމަތިވި ގޮންޖެހުންތަކާ އެކު ކަމަށް ވެސް އެ ކުލަބުން ވަނީ ބުނެފަ އެވެ.
އެހެންކަމުން ރާމޯސް ދެން ގުޅޭނެ ވަކި ކުލަބެއް މިހާތަނަށް އެނގިފައެއް ނުވެ އެވެ. އުމުރުން 37 އަހަރުގެ ކުޅުންތެރިޔާ އޭނާގެ ސީނިއާ ކެރިއަރު ފެށީ ސެވިއްޔާ އެތުލެޓިކޯ އިންނެވެ. އެއަށްފަހު ދެން އޭނާ ބަދަލުވީ ސެވިއްޔާ އަށެވެ. ސެވިއްޔާގައި އެއް އަހަރު ހޭދަ ކުރުމަށްފަހު އޭނާ ރެއާލް މެޑްރިޑާ ގުޅުނީ 2005 ވަނަ އަހަރު އެވެ. އޭގެ ފަހުން އެ ކުލަބާއެކު ހޭދަ ކުރި 16 ސީޒަންގެ ތެރޭގައި ރާމޯސް ވަނީ ރެއާލަށް 671 މެޗު ކުޅެދީ 101 ލަނޑު ޖަހައިފަ އެވެ. ރެއާލާއެކު އޭނާ ވަނީ 22 ތައްޓެއް ކާމިޔާބުކޮށްފަ އެވެ. ރާމޯސް ވަނީ 2005 އިން 2021 އަށް ސްޕެއިންގެ ޤައުމީ ޓީމަށް ވެސް ކުޅެފަ އެވެ. ޤައުމީ ޓީމަށް ކުޅެދިން 180 މެޗުގައި އޭނާ ވަނީ 33 ލަނޑު ޖަހައިފަ އެވެ. ޤައުމީ ޓީމާއެކު އޭނާ ވަނީ ފީފާ ވޯލްޑް ކަޕް އަދި ޔުއެފާ ޔޫރޯ މުބާރާތް ދެ ފަހަރު ކާމިޔާބުކޮށްފަ އެވެ.
