މުއިއްޒު ވެރިކަމަށް ވަޑައިގެންފިނަމަ ޔާމީން ނޫނީ މުއިއްޒު އޮންނާނީ 5 އަހަރުވަންދެން ޖަލުގައި: އިމްރާން
22 އޯގަސްޓު 2023 | އަންގާރަ 02:15ރައީސް އާއި އެމަނިކުފާނުގެ ރަނިންމޭޓަކީ މިހާތަނަށް ވާދަކުރައްވާ އެންމެ ތަޖުރިބާހުރި ދެ ބޭފުޅުން
އަދާލަތު ޕާޓީގެ ރައީސް އިމްރާން އަބްދުﷲ
މިއަހަރުގެ ރިޔާސީ އިންތިޚާބުގައި ޕީއެންސީން ވާދަކުރައްވާ ކެންޑިޑޭޓް ޑރ. މުޙައްމަދު މުއިއްޒު ވެރިކަމަށް ވަޑައިގެންފިނަމަ އޭނާ ނުވަތަ ކުރީގެ ރައީސް އަބްދުﷲ ޔާމީން ފަސް އަހަރު ވަންދެން ޖަލުގައި ހުންނަވާތަން ފެނިވަޑައިގަންނަވާކަމަށް އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވެއްޖެއެވެ.
އިމްރާން މިފަދައިން ވިދާޅުވީ ބ. ތުޅާދޫގައި ހޯމަ ދުވަހުގެ ރޭ ކުރިއަށްގެންދިޔަ "އުފާވެރި އަމާން ރާއްޖެ" ޖަލްސާގައި ވާހަކަފުޅު ދައްކަވަމުންނެވެ. އިމްރާން ވިދާޅުވީ ރިޔާސީ އިންތިޚާބަށް ކުޑަ ދުވަސްކޮޅަކަށް ވެފައިވާއިރު މި އޮތް މުއްދަތުގެ ތެރޭގައި އެމްޑީޕީ އާއި އެމްޑީއޭ އަދި އަދާލަތު ޕާޓީގެ މެންބަރުންނާއި މި ސަރުކާރަށް ތާއީދު ކުރާ ހުރިހާ ރައްޔިތުން ވަރަށް ސަމާލުވެ، ހޭލައި ތިބެން ޖެހޭ ކަމަށެވެ. އެގޮތުން، މިއަދު މި ބޭނުންވާ މަންޒިލަށް ރާއްޖެ ގެންދިއުމަށް ހުރަސް އެޅޭނެ ހުރިހާ ކަމަކުން ރާއްޖެ ސަލާމަތް ކުރަން ފާރަވެރިވާން ޖެހޭ ކަމަށް އޭނާ ވިދާޅުވިއެވެ.
މި ސަރުކާރުން ކުރަމުން އަންނަ މަސައްކަތަކީ މުޅި ރާއްޖޭގެ ރައްޔިތުންގެ މުސްތަގުބަލާ ގުޅުންހުރި މުހިންމު މަސައްކަތެއްކަން ފާހަގަކުރައްވައި އިމްރާން ވިދާޅުވީ ޤައުމު ތަރައްގީ ވާނީ އެ ޤައުމެއްގެ ރައްޔިތުން ދިރިއުޅޭ ހުރިހާ ތަނެއް ތަރައްގީ ކޮށްގެން ކަމަށެވެ. އެގޮތުން ހުރިހާ ރަށަކަށް ކުރިއެރުން ހޯދައިދީ، ރައްޔިތުންގެ ދިރިއުޅުމުގެ ފެންވަރު މަތިކުރަން ޖެހޭކަމަށާއި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ކުރައްވާ ހުރިހާ ކަމެއް ވެސް ވަށާ ޖެހޭ ސިޔާސަތެއްގެ ދަށުން ކޮށްދެއްވަމުން ގެންދަވަނީ އެ ބޭނުމުގައި ކަމަށް އޭނާ ވިދާޅުވިއެވެ.
އިމްރާން ވިދާޅުވީ ރައީސް ޞާލިހާ ވާދަވެރި ކެންޑިޑޭޓުންގެ ތަރައްގީގެ ފުރިހަމަ ތަސައްވުރެއް ނެތް ކަމަށާއި އެ ކެންޑިޑޭޓުން ބޭނުންވަނީ އެންމެ ތަނެއް ތަރައްގީ ކުރުމަށް ކަމަށެވެ. ނަމަވެސް ތަސައްވުރެއް އޮތް ހަމައެކަނި ކެންޑިޑޭޓަކީ ރައީސް ޞާލިހުކަމަށް އިމްރާން ފާހަގަކުރެއްވިއެވެ.
އިދިކޮޅު ޕީއެންސީން ވާދަކުރައްވާ ކެންޑިޑޭޓު ޑރ. މުއިއްޒު ދައްކަވާ ވާހަކަފުޅުތަކާ ގުޅޭގޮތުން އިމްރާން ވިދާޅުވީ ވެރިކަމަށް ވަޑައިގަންނަވަން ބޭނުންފުޅުވީ ވަކި ބޭފުޅަކަށްޓަކައި ކަމަށާއި އެ ބޭފުޅާ ޖަލުން ނެރެދެއްވާނެ ކަމަށާއި އެ ބޭފުޅާގެ ސިޔާސަތުތަކާ އެއްގޮތަށް ވެރިކަން ކުރައްވާނެ ކަމަށް ވިދާޅުވި ނަމަވެސް، އޭނާއަށް ފެނިވަޑައިގަންނަވަނީ އެހެން މަންޒަރެއް ކަމަށެވެ. އެގޮތުން، ދެ ބޭފުޅުންގެ މާޒީގެ ޓްރެކް ރެކޯޑަށް ބަލާއިރު މުއިއްޒު ވެރިކަމަށް ވަޑައިގެންފިނަމަ ދެ ބޭފުޅުންގެ ތެރެއިން ކޮންމެވެސް އެއް ބޭފުޅަކު ހުންނަވާނީ ޖަލުގައި ކަމަށް އިމްރާން ވިދާޅުވިއެވެ.
އިމްރާން އިތުރަށް ވިދާޅުވީ އެހެން ކެންޑިޑޭޓުންނާ އަޅާބަލާއިރު ރައީސް ޞާލިހު ހުންނެވީ މާ ކުރީގައި ކަމަށެވެ. އައި ވައުދުތަކަށް ބެލި ނަމަވެސް އެމަނިކުފާނާ ގާތް ކުރެވޭނެ ބޭފުޅަކު ނެތް ކަމަށާއި މިހާރު ވެސް ކޮންމެ ރަށަކަށް ވެވަޑައިގެންނެވި ވައުދުތަކުގެ އިތުރަށް ވެސް ކަންކަން ކޮށްދެއްވާކަމަށް ވިދާޅުވިއެވެ.
ރައީސުންގެ ރައީސްކަން ވަރުގަދަކުރުމަށް ރަނިންމޭޓުންގެ މުހިންމުކަމަށް ވެސް އިމްރާން އަލިއަޅުއްވާލެއްވިއެވެ. އެގޮތުން، ރައީސް ޞާލިހުގެ ރަނިންމޭޓު މުޙައްމަދު އަސްލަމަކީ ތަޖުރިބާ ހުރި ބޭފުޅެއް ކަމަށާއި ރާއްޖޭގެ ދިގު ތާރީޙުގައި ވެސް ގުޅިފައިވާ ސިޔާސީ ޕާޓީތަކުގެ ކެންޑިޑޭޓާއި ރަނިންމޭޓުވަރުގެ ތަޖުރިބާ ހުރި ބޭފުޅުންތަކެއް އެ މަގާމުތަކަށް ކުރިމަތިނުލައްވާ ކަމަށް އިމްރާން ވިދާޅުވިއެވެ.
