އާދީއްތަ ދުވަހު ނ. މާފަރު ފަޅުތެރެއަށް ވަތް ކަންނެލި އައިނެއް ހިފައި އެ ރަށުގެ ހުރިހާ ގެތަކަށް ބަހައިފިއެވެ.

މާފަރުން "ރާއްޖެ އެމްވީ" އާ ވާހަކަދެއްކި މީހަކު ބުނީ ކަންނެލި އައިން އެ ރަށުން އިރުވައިމަތި ފަޅުތެރެއަށް ވަދެގެން އުޅޭކަން އެނގުނީ އާދީއްތަ ދުވަހުގެ މެންދުރު 1:40 އެހާއިރު ކަމަށެވެ. އެކަން އެނގުމުން ރަށުގެ ހުރިހާ އެންމެންވެގެން އެ މަސްތައް ހިފުމަށް މަސައްކަތް ފެށި ކަމަށް އޭނާ ބުންޏެވެ.

ދާ ޖަހައިގެން ކުރި މަސައްކަތުން ގިނަ އަދަދެއްގެ ކަންނެލި ހިފުނު ކަމަށް އޭނާ ބުންޏެވެ. ކަންނެލި ހިފުން ހުއްޓާލަން ޖެހުނީ އިރުއޮއްސި އަނދިރިވުމުގެ ސަބަބުން ކަމަށް އޭނާ ބުންޏެވެ.

އޭނާ ބުނި ގޮތުގައި ކަންނެލި ހިފުމަށްފަހު ރަށުގެ ހުރިހާ ގެއަކަށް ވަނީ ބަހައިފައެވެ. އެގޮތުން ރަށުގެ ކޮންމެ ގެއަކަށް ކަންނެއްޔަކާއި ކަންނެއްޔެއްގެ ފަޅިއެއް ބެހިކަމަށް އޭނާ ބުންޏެވެ. އަދި 29 ކަންނެލި އެ ރަށުގައި ދިރިއުޅޭ ބިދޭސީންނަށް ބެހި ކަމަށް ވެސް އޭނާ ބުންޏެވެ.

މާފަރުން މައުލޫމާތު ދޭ ގޮތުގައި އާދީއްތަ ދުވަހު އެ ރަށު ފަޅުތެރެއިން ހިފި ކަންނެލިތަކަކީ 25 ކިލޯ އާއި 40 ކިލޯއާ ދެމެދުގެ ކަންނެލިތަކެކެވެ. މިއީ މިގޮތަށް އެ ރަށުގެ ފަޅުތެރެއަށް ކަންނެލި ވަދެގެން ރައްޔިތުން ގުޅިގެން ނުކުމެ ކަންނެލި ހިފި 3 ވަނަ ފަހަރުކަން ވެސް އެ ރަށުން މައުލޫމާތު ދިން މީހާ ބުނެފައި ވެއެވެ.