ގުރުނެގުމަށް ހާޒިރުނުވާ މީހުންގެ ގޯތީގެ ގުރުނެގުން ހޯމަ ދުވަހު
މި ސްކީމްގެ ދަށުން ޖުމްލަ 18955 މީހުންނަށް ގޯތި ލިބޭ
"ބިންވެރިޔާ ސްކީމް"ގެ ދަށުން ގޯތި ލިބޭ މީހުންނަށް ދޫކުރާ ގޯތިތަކުގެ ގުރުއަތުލުން
"ބިންވެރިޔާ ސްކީމުގެ" ދަށުން މާލޭ ސަރަހައްދުން ގޯތި ލިބޭ ފަރާތްތަކުގެ ތެރެއިން, 20 އޯގަސްޓް 2023ގެ ނިޔަލަށް ގުރުނެގުމަށް ހާޒިރުނުވާ ފަރާތްތަކުގެ ގުރުނެގުން ހޯމަ ދުވަހު ބާއްވަން ނިންމައިފިއެވެ.
ޕްލޭނިން މިނިސްޓްރީން ބުނީ ގުރު ނަގަން ނުދާ މީހުންނަށް ގޯތި ލިބޭ ތަން ކަނޑައެޅުމަށް ގުރުނެގުމަށް ހަމަޖެހިފައިވަނީ ގަލޮޅު ދަނޑުގައި ގުރުނެގުމަށް ހަމަޖެހިފައިވާ ތަނުގައި ކަމަށާއި، ހޯމަ ދުވަހުގެ (21 އޯގަސްޓް 2023)ގެ ހެދުނު 10:00ގައި ގުރުނެގުން ކުރިޔަށް ގެންދިއުމަށް ހަމަޖެހިފައިވާ ކަމަށެވެ. އެ މިނިސްޓްރީން ބުނީ އެވަގުތަށް ގުރުނެގުމަށް ހާޒިރުނުވާ ފަރާތްތަކުގެ ގުރުނެގުމަށް ހަމަޖެހިފައިވަނީ މީޑިއާގެ ކުރިމަތީގައި، މި މިނިސްޓްރީގެ ފަރާތުން ކަމަށެވެ. އެހެންކަމުން ޕްލޭނިން މިނިސްޓްރީން ވަނީ އެކަން އާއްމުކޮށްއަންގާ އިއުލާނުވެސް ކޮށްފައެވެ.
ބިންވެރިޔާ ސްކީމުގެ ދަށުން ޝަރުތު ހަމަވާ ދާއިމީ ލިސްޓްގައި 19639 މީހުންގެ ނަން ވަނީ ހިމަނާފައެވެ. މީގެތެރެއިން މި ދައުރުގައި ގޯތި ދޭނީ 18955 މީހުންނަށެވެ. މީގެ އިތުރުން މިދައުރުގައި ގޯތި ނުދެވޭ 684 މީހުންނަށް، ބިން އިތުރަށް ހަމަޖެހުމުން ގޯތި ދިނުމަށް ވަނީ ހަމަޖެހިފައެވެ.
މާލޭ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދައިދިނުމަށް ފަށާފައިވާ "ބިންވެރިޔާ ސްކީމް"ގެ ދަށުން، މިބުރުގައި 6،200 ގޯތި ދޫކުރުމަށް ނިންމަވާފައިވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވަނީ ވިދާޅުވެފައެވެ. މާލޭ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކުރުމަށް ސަރުކާރުން އެންމެ ފުރަތަމަ ނިންމީ 5،000 ގޯތި ދޫކުރުމަށެވެ. އެއީ ހުޅުމާލެއިން 1،000 ގޯތި، ގުޅީފަޅުން 2،000 ގޯތި އަދި ގިރާވަރުފަޅުން 2،000 ގޯއްޗެވެ. އެހެންނަމަވެސް ގުޅީފަޅު ބިން ހިއްކުމުގެ މަޝްރޫއު ފައްޓަވައިދެއްވައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވަނީ، މާލޭ ސަރަހައްދުން މި ބުރުގައި 6,200 ގޯތި ދޫކުރަން ނިންމަވާފައިވާކަން އިއުލާނުކުރައްވާފައެވެ.
