ގުޅީފަޅުން މިހާރުވެސް 400 ގޯތި ދޫކުރެވޭ ވަރަށް ބިން އެބައޮތް، ނޮވެމްބަރު 11 ގެ ކުރިން 2200 ގޯތި ދޫކުރާނެ: އަކްރަމް
19 އޯގަސްޓު 2023 | ހޮނިހިރު 16:07މިބިމާ ގުޅޭގޮތުން ބައެއް ފަރާތްތަކުން ދަައްކަމުން ދަނީ ހަގީގަތާއި ހިލާފު ވާހަކަތަކެއް
ގުޅީފަޅުން ހިއްކާފައި އޮތް ސަރަހައްދު
ގުޅީފަޅުން މިހާރުވެސް 400 ގޯތި ދޫކުރެވޭވަރަށް ބިން އެބައޮތް ކަމަށާއި، ނޮވެމްބަރު 11 ގެ ކުރިން 2200 ގޯތި ދޫކުރާނެ ކަމަށް މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.
ހޮނިހިރު ދުވަހުގެ ހަވީރު ނޫސްވެރިން ވަނީ އެމަސައްކަތް ކުރާ ގޮތް ދައްކާލުމަށް ސައިޓަށް ގެންގޮސްފައެވެ. ސައިޓުގައި ހުންނަވާ ނޫސްވެރިންނަށް މައުލޫމާތު ދެއްވަމުން އަކްރަމް ވިދާޅުވީ ގުޅީފަޅުން މިހާރު ހިއްކާފައިވާ ބިމުން ވެސް 400 ގޯތި ކަނޑާފައިދެވޭނެ ކަމަށާއި، މިބިމާ ގުޅޭގޮތުން ބައެއް ފަރާތްތަކުން ދަައްކަމުން ދަނީ ހަގީގަތާއި ހިލާފު ވާހަކަތައް ކަމަށެވެ. އަދި ނޮވެންބަރު މަހުގެ ނިޔަލަށް ގުޅީފަޅުން ގޯތި ލިބުނު މީހުންނަށް ބިން ހަވާލުކުރާނެ ކަމުގެ ޔަގީންކަން އަކްރަމް ދެއްވިއެވެ.
ގުޅީފަޅު ބިން ހިއްކުމުގެ އަމަލީ މަސައްކަތް ފަށާފައިވަނީ 02 ޖުލައި 2023 ގައެވެ. ރައީސުލްޖުމްހޫރިއްޔާގެ ވައުދުފުޅާއި އެއްގޮތަށް ގުޅީފަޅުން 2200 ބިން ދޫކުރުމަށް ހަމަޖެހިފައިވެއެވެ.
މީގެ އިތުރުން ތިލަމާލެ ބްރިޖަށް އިޝާރާތް ކުރައްވައި އަކްރަމް ވިދާޅުވީ ގުޅީފަޅުން ގޯތިދޫކުރަން ބިން ހިއްކަމުންދާ ސަރަހައްދަކީ ތިލަމާލެ ބްރިޖް އައިސް ގުޅޭ ސަރަހައްދު ކަމަށެވެ. އަދި ބްރިޖާއި ގުޅޭ ސަރަހައްދު މިހާރު އޮތީ ހިއްކާ ނިމިފައި ކަމަށެވެ. ތިލަމާލެ ބްރިޖް މަޝްރޫއުގެ ދަށުން ޖުމްލަ 3 ބްރިޖްގެ މަސައްކަތް ކުރިއަށްދާކަން ފާހަގަކުރައްވައި އަކްރަމް ވިދާޅުވީ މާލެ އާއި ވިލިމާލެ އާއި ގުޅީފަޅާއި، ތިލަފުށި އަދި ގިރާވަރު ފަޅު ބްރިޖުން ގުޅާލުމުގެ މަސައްކަތް މިހާރު ވެސް ކުރިޔަށްދާ ކަމަށެވެ.
ބްރިޖް އަދި ހައިވޭގައި ހަތަރު ލޭން ހިމެނެއެވެ. އެއީ ފަޅިއެއްގައި 2 ލޭން އެވެ.
ތިލަމާލެ ބްރިޖު މަޝްރޫއުގެ ދަށުން 3 ބުރިޖާއި، ކޯޒުވޭ އަދި މަގުތަކުގެ ނެޓްވޯކު ހަދާއިރު ދިގުމިނުގައި 6.7 ކިލޯމީޓަރު ހުންނާނެއެވެ. މީގެއިތުރަށް ގުޅާލާ ކޮންމެ ރަށަކަށް އަރާ ފޭބުމަށް އިންޓަރޗޭންޖް ޕޮއިންޓްތަކާއި، ޕާކިންގ ސަރަހައްދުތައް ވެސް މި މަޝްރޫއުގެ ދަށުން ހަދާނެއެވެ.
މުޅި މި މަޝްރޫއަށް 500 މިލިއަން ޑޮލަރު ހޭދަވެއެވެ. މި މަޝްރޫއު ކުރިއަށްގެންދަނީ އިންޑިއާ ސަރުކާރުން ދޭ 100 މިލިއަން ޑޮލަރުގެ ގްރާންޓާއި 400 މިލިއަން ޑޮލަރުގެ ލައިން އޮފް ކްރެޑިޓްގެ ދަށުންނެވެ.
މާލެއިން ތިލަފުއްޓަށް އަޅާ ބްރިޖުގެ މަސައްކަތް މި އަންނަ އަހަރުގެ ތެރޭގައި ނިމި، ބޭނުންކުރަން ފެށޭނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަނީ ވިދާޅުވެފައެވެ. އަދި އެއަށްފަހު ބްރިޖް ގިރާވަރާ ހަމައަށް ގުޅާލާނެ ކަމަށްވެސް އެމަނިކުފާނު ވިދާޅުވިއެވެ.
ތިލަމާލެ ބްރިޖުގެ މަސައްކަތް ރަސްމީކޮށް ފަށާފައިވަނީ 02 އޮގަސްޓް 2022 ގައެވެ.
