ގުރުނެގުމުގެ ކަންތައްތައް ކުރިއަށްދަނީ ދެފުށް ފެންނަ ގޮތަށް، ނާންނަ މީހުންގެ ގުރެއް ނުނަގާ!
މިއީ ރައްޔިތުންނާއި ގުޅުން ހުރި ވަރަށް ހައްސާސް މައްސަލައެއް
"ބިންވެރިޔާ ސްކީމް"ގެ ދަށުން ގޯތި ލިބޭ މީހުންނަށް ދޫކުރާ ގޯތިތަކުގެ ގުރުއަތުލުން ފެށުން
ބިންވެރިޔާ ސްކީމް"ގެ ދަށުން ބިން ލިބުނު މީހުންގެ މެދުގައި ގުރުނެގުމުގެ ކަންތައްތައް ކުރިއަށްދަނީ ދެ ފުށް ފެންނަ ގޮތަށް ކަމަށާއި ގުރު ނަގަން ނާންނަ މީހުންގެ ކަރުދާސް ކޮޅުތައް އޮފިޝަލުން ނުނަގާ ކަމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގެ ސީނިއަރ އެގްޒެކެޓިވް ޑިރެކްޓަރު މުހައްމަދު އާރިފް ވިދާޅުވެއްޖެއެވެ.
ހުކުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމެއްގައި އާރިފް ވިދާޅުވީ މިއީ ރައްޔިތުންނާއި ގުޅުން ހުރި ވަރަށް ހައްސާސް މައްސަލައެއް ކަމަށެވެ. ބިންވެރިޔާ ސްކީމުގެ ދަށުން ގުރު ނެގުމުގެ ކަންތައްތައް ކުރިއަށްދާ ގޮތާމެދު ބައެއް ފަރާތްތަކުން ދޮގު ތުހުމަތުތައް ކުރަމުންދާ ކަމަށެވެ.
ވަކި ގަޑިއެއްގައި، ވަކި މީހަކާ ބައްދަލުކުރުމަށްފަހު ގުރު ނަގަން އަންނަ މީހުންނަށް ވަކި ޚާއްސަ ކަރުދާހެއް ދޭކަމަށް ބުނެ މީޑިއާއަކުން ދޮގު މައުލޫމާތު ފަތުރާފައިވާކަން ފާހަގަކުރައްވާ އާރިފް ވިދާޅުވީ ޕްލޮޓް ކަރުދާސް ޕްރިންޓްކޮށްފައިވާނީ އާދައިގެ A4 ކަރުދާހުގައި ކަމަށާއި ފުރަތަމަ ދުވަހު ފޮށިތަކަށް ކަރުދާސްތައް އެޅި ގޮތަށް، ފޮށިތަކުގައި ހުރި ކަމަށެވެ.
އާރިފް ވިދާޅުވީ މި މަސައްކަތުގައި މިނިސްޓްރީގެ މުވައްޒަފުންގެ އިތުރުން އާރބަންކޯގެ މުވައްޒަފުން ވެސް ހަރަކާތްތެރިވާ ކަމަށެވެ. ފޮށި ބަންދު ކުރަނީ ވެސް އެންމެ ފަހުން ގޯތި ޕްލޮޓް ނަގާ މީހުންގެ ހާޒިރުގައި، ފޮށި ސީލްކުރުމަށްފަހު ކަމަށް ވެސް ވިދާޅުވިއެވެ. ފޮށި ސީލްކޮށް، ބަންދުކުރުމަށްފަހު މިނިސްޓްރީގެ މުވައްޒަފުންނާއި ފުލުހުން ފޮށިތައް ބަލަހައްޓާ ކަމަށާއި އޭގެ އަނެއް ދުވަހު އަނެއްކާވެސް ފޮށި ކަނޑަނީ މީހުންގެ ހާޒިރު ގައިކަމަށް ވިދާޅުވިއެވެ.
ގުރު ނެގުމުގެ ކަންތައްތައް މި މަހުގެ 15 ދުވަހުން ފެށިގެން ޔެސް ޓީވީން މަންޒަރުތައް ލައިވް ކުރަމުންދާ ކަމަށް ވެސް ވިދާޅުވިއެވެ. އެހެންކަމުން ރައްޔިތުންނަށް ހުރިހާ މަންޒަރެއް ވަގުތުން ފެންނާނެ ކަމަށް ވެސް އާރިފް ވިދާޅުވިއެވެ.
ގުރުނެގުމުގެ ކަންކަން ފެށުމުގެ ކުރިން ރައީސް އެދިވަޑައިގެންނެވީ ރައްޔިތުންގެ އިތުބާރު އޮންނަ ގޮތަކަށް ކުރުމަށްކަން ފާހަގަކުރައްވާ އާރިފް ވިދާޅުވީ ގުރުއަތުން ނެގޭ ޕްލޮޓް ކަރުދާހުގައި ހުންނަ މައުލޫމާތުތައް ބަދަލުނުވާނެ ކަމަށެވެ. އަދި އެމީހަކަށް ދިމާވާ ތަނަކުން ގޯތި ލިބިގެންދާނެ ކަމަށެވެ. ގުރުއަތުލުން ނިމޭނީ 20 ވަނަ ދުވަހުގެ ރޭ 19:00 ޖަހާއިރު ކަމަށް ވެސް ވިދާޅުވިއެވެ.
ބިންވެރިޔާ ސްކީމުގެ ދަށުން ޝަރުތު ހަމަވާ ދާއިމީ ލިސްޓްގައި 19639 މީހުންގެ ނަން ވަނީ ހިމަނާފައެވެ. މީގެތެރެއިން މި ދައުރުގައި ގޯތި ދޭނީ 18955 މީހުންނަށެވެ. މީގެ އިތުރުން މިދައުރުގައި ގޯތި ނުދެވޭ 684 މީހުންނަށް ބިން އިތުރަށް ހަމަޖެހުމުން ގޯތި ދިނުމަށް ވަނީ ހަމަޖެހިފައެވެ.
