ޗެލްސީއަށް ބަދަލުނުވެ، އޮލީސޭ ކްރިސްޓަލް ޕެލެސް އާއެކު އެއްބަސްވުން އައުކޮށްފި

ޗެލްސީއަށް ގެންދިޔުމަށް މަސައްކަތް ކުރި މައިކަލް އޮލީސޭ، ކްރިސްޓަލް ޕެލެސް އާއެކު އިތުރު ހަތަރު އަހަރު ދުވަހުގެ އެއްބަސްވުމެއްގައި ސޮއިކޮށްފިއެވެ.

ރިޕޯޓުތައް ބުނާގޮތުން ޗެލްސީން އަންގާރަ ދުވަހު ވަނީ އޮލީސޭގެ ރިލީޒް ކްލޯޒް ކަމަށްވާ 35 މިލިއަން ޕައުންޑް ދެއްކުމަށް އެއްބަސްވެފައެވެ. ނަމަވެސް، 21 އަހަރުގެ ކުޅުންތެރިޔާ ވަނީ ބުރާސްފަތި ދުވަހު ކްރިސްޓަލް ޕެލެސް އާއެކު އެއްބަސްވުން އައުކޮށްފައެވެ. އޭނާ ރެޑިން އިން ކްރިސްޓަލް ޕެލެސްއަށް 2021 ވަނަ އަހަރު ބަދަލުވީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. ޗެލްސީގެ ޔޫތު ޓީމުގައި ކުޅުމަށްފަހު އޭނާ އެ ކުލަބު ދޫކޮށްލީ އުމުރުން 14 އަހަރުގައެވެ.

ކްރިސްޓަލް ޕެލެސްގެ ކޯޗު ރޯއީ ހޮޖްސަން ބުނީ، ޗެލްސީ ފަދަ ބޮޑު ކުލަބަކުން އޮލީސޭ ހޯދުމަށް މަސައްކަތް ކުރުމުން ޖެހިލުންވި ކަމަށެވެ. ނަމަވެސް،، އޮލީސޭއަށް ފައިދާ ވާނެ ކުލަބަކީ ކްރިސްޓަލް ޕެލެސްކަން އޭނާ އަށް ވިސްނޭނެކަމަށް އުއްމީދުކުރިކަމަށް ހޮޖްސަން ބުނެފައިވެއެވެ.

މިއަހަރު ކުރިޔަށްދިޔަ 21 އަހަރުން ދަށުގެ ޔޫރޯ މުބާރާތުގައި އަނިޔާވެ، އޮލީސޭ މިވަގުތު ހުރީ ކުޅުމާ ދުރުގައެވެ. މިދިޔަ ސީޒަނުގައި އޭނާ ވަނީ ކްރިސްޓަލް ޕެލެސްއަށް 37 މެޗު ކުޅެދީ، ދެ ލަނޑު ޖަހައި، 11 ލަނޑު ޖެހުމަށް އެހީތެރިވެދީފައެވެ. ކްރިސްޓަލް ޕެލެސްގެ މޮޅު ކުޅުންތެރިޔަކަށް ހޮވިފައިވަނީވެސް އޮލީސޭ އެވެ.

މި ހޫނުމޫސުމުގައި ވިލްފްރެޑް ޒަހާވެސް ވަނީ ޓީމް ދޫކޮށްލާފައެވެ. ނަމަވެސް، ކްރިސްޓަލް ޕެލެސް އައު ސީޒަން ފެށީ މޮޅަކާއެކުއެވެ.