"ގޯތި ލިބުނު މީހުންގެ ގުރުއަތުލުމުގެ ސްޕީޑް އަވަސްކޮށް ގަޑިއިރަކަށް ގެންނަ މީހުން ވަނީ އިތުރުކޮށްފައި"
އާރިފް ވަނީ ގުރުލުމުގެ އިންތިޒާމްތައް އާއްމުންނަށް ވީހާވެސް ފަސޭހަ ގޮތަކަށް ހަމަޖައްސަވަން އިސްކަން ދެއްވާފައިވާކަން ފާހަގަކުރައްވާފައި
"ބިންވެރިޔާ ސްކީމް"ގެ ދަށުން ގޯތި ލިބޭ މީހުންނަށް ދޫކުރާ ގޯތިތަކުގެ ގުރުއަތުލުން ފަށުން
"ބިންވެރިޔާ ސްކީމް"ގެ ދަށުން ބިން ލިބުނު މީހުންގެ މެދުގައި ގުރުއަތުލުން ކުރިއަށް ދާ ސްޕީޑަށް ބެލުމަށް ފަހު ގަޑިއިރެއްގެ ތެރޭގައި ގުރުލުމަށް ގެންނަ މީހުންގެ އަދަދު އިތުރުކޮށްފައިވާ ކަމަށް ހައުސިންގ މިނިސްޓްރީން ބުނެފިއެވެ.
ރާއްޖެ އެމްވީ އަށް މައުލޫމާތުދެއްވަމުން މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގެ ސީނިއަރ އެގްޒެކެޓިވް ޑިރެކްޓަރު މުހައްމަދު އާރިފް ވިދާޅުވީ ކުރިން ގަޑިއިރަކު ގުރުލާން ގެނައީ 40 މީހުން ކަމަށާއި މިހާރު ގަޑިއިރަކު 60 މީހުން ގެންނަ ކަމަށެވެ. އާރިފް ވަނީ ގުރުލުމުގެ އިންތިޒާމްތައް އާއްމުންނަށް ވީހާވެސް ފަސޭހަ ގޮތަކަށް ހަމަޖައްސަވަން އިސްކަން ދެއްވާފައިވާކަން ފާހަގަކުރައްވާފައެވެ.
އާރިފް ރާއްޖެއެމްވީ އަށް ވިދާޅުވީ ގުރުއަތުލުން ކުރިއަށް ދަނީ ކޮންމެ ސައިޒެއްގެ ގޯއްޗަކަށް ފޮއްޓެއް ބަހައްޓައިގެން ކަމަށެވެ. މީގެ ކުރިން، ދެދުވަސް ވަންދެން ގަލޮޅު ދަނޑުގައި މަސައްކަތް ކުރިއަށް ގެންދިއުމަށް ފަހު އޭގެ ފަހުން ހެންވޭރު ދަނޑުގައި ގުރުއަތުލުން ކުރިއަށް ގެންދަން ވިސްނެވި ކަމަށް އޭނާ ވިދާޅުވިއެވެ. ނަމަވެސް ގުރުއަތު ނަގާ ސަރަހައްދުގައި ހުރި ޓެންޓު ފަދަ ތަކެތި ބަދަލުކުރުމަކީ ފަސޭހަކަމަކަށް ނުވާތީ ފަހުން ނިންމީ ގަލޮޅު ދަނޑުގައި ގުރުއަތުލުން ކުރިއަށް ގެންދަން ކަމަށް އާރިފް ވިދާޅުވިއެވެ.
އޭގެ އިތުރުން 2050، 1250 އަދި 1650ގެ ފޮށިތައް ފިޔަވާ އެހެން ފޮށިތަކުގައި މިހާރު ނުނެގި ހުރީ ވަރަށް މަދު ބޭފުޅުންގެ ގުރު ކަމަށް ވެސް އޭނާ ވިދާޅުވިއެވެ. އާރިފް ވިދާޅުވީ ވަޑައިނުގަންނަވާ ބޭފުޅުންގެ ގުރުއަތުލުން ކުރިއަށް ގެންދާނީ ހުރިހާ ފޮއްޓެއްގެ ގުރުލުން ނިމުމުން މީޑިއާގެ ހާޒިރުގައި ކަމަށެވެ.
ބިންވެރިޔާ ސްކީމްގެ ދަށުން ގޯއްޗަށް އެދުމަށް ފުރުސަތު ހުޅުވާލީ މިދިޔަ އަހަރުގެ ޖޫން މަހުއެވެ. މި ފުރުޞަތުގައި 23000 އަށްވުރެ ގިނަ މީހުން ވަނީ ފޯމު ހުށަހަޅާފައެވެ. އޭގެ ތެރެއިން ޝަރުތު ހަމަވާ ދާއިމީ ލިސްޓްގައި 19639 މީހުންގެ ނަން ވަނީ ހިމަނާފައެވެ. މީގެތެރިން މި ދައުރުގައި ގޯތި ދޭނީ 18955 މީހުންނަށެވެ.
ބިންވެރިޔާ ސްކީމުގެ ދަށުން ގޯތިލިބޭ ބޭފުޅުންގެ ގުރު ނެންގެވުމަށް ވަޑައިގެންނެވުމުގެ ކުރިން، ޕޯޓަލްއަށް ލޮގިން ވެލައްވާ އެ ބޭފުޅަކު ވަޑައިގަންނަވަންޖެހޭ ތާރީހާއި ވަގުތު ޔަގީން ކުރައްވަން ޕްލޭނިން މިނިސްޓްރީން ވަނީ އިލްތިމާސްކުރައްވާފައެވެ.
މީގެ އިތުރުން މިދައުރުގައި ގޯތި ނުދެވޭ 684 މީހުންނަށް ބިން އިތުރަށް ހަމަޖެހުމުން ގޯތި ދިނުމަށް ވަނީ ހަމަޖެހިފައެވެ.
