ދެކުނު އެފްރިކާ މީހަކު ގެނައި މަސްތުވާތަކެއްޗާ ގުޅިގެން ދިވެއްސަކަށް އުމުރު ދުވަހުގެ ޖަލު ހުކުމެއް އިއްވައިފިއެވެ.

މި މައްސަލައަކީ ޖޫން 17، 2022ގެ ހެނދުނުގެ ވަގުތެއްގައި ދޯހާ މަގުން ވެލާނާ އިންޓަރނޭޝަނަލް އެއަރޕޯޓަށް އައި ގަތަރު އެއަލައިންސްގެ ފްލައިޓަކުން، ދެކުނު އެފްރިކާގެ ރައްޔިތެއްކަމަށްވާ ޒަމެކިލެ ލެސިއާ އޮންޔެޗެ ރާއްޖެއަށް އައިއިރު އެތެރެ ކުރި މަސްތުވާތަކެތި ބަލައި ދިޔަ މީހެއްގެ މައްސަލައެވެ.

މީގެ ކުރިން މި މައްސައާއި ގުޅިގެން ޒަމެކިލެއަށް 12 އަހަރާއި 6 މަސް ދުވަހުގެ މުއްދަތަކަށް ޖަލަށްލުމާއެކު 1 ލައްކަ ރުފިޔާއިން ޖޫރިމަނާކޮށްފައިވެއެވެ.

މި މައްސަލައާއި ގުޅޭ 3 ދިވެއްސެއް އެރޭ ހައްޔަރު ކުރިއެވެ. އެއީ އޭނާ އެތެރެކުރި މަސްތުވާތަކެތިި ބަލައި ދިޔަ ގ. ކަރަންކާ އަހުމަދު ތައިފް ރިޟްވާން އާއި ނިހާލް މުހައްމަދު އަދި ހަމްދޫން މުހައްމަދުއެވެ.

މި މައްސަލައިގެ ހުލާސާގައި ބުނެފައިވަނީ ޒަމެކިލެ ލެސިއާ ހުރި، ހުޅުމާލެ ރިޕްލް ބީޗް ގެސްޓްހައުސްގެ 201 ކޮޓަރިއަށް ގޮސް އެތަނުން މަސްތުވާތަކެތި ހިފައިގެން ތައިފް ހިނގައިގެން ވަގުތު ފުލުހުން ތައިފް ހުއްޓުވައި އެ އަޅާފައި ހުރި ޖޫސްޕެކެޓްތައް ބަލައި ފާސްކޮށްފައިވާކަމަށެވެ.

ބަލައި ފާސްކުރުމުގެ ތެރޭގައި 896.087 ގްރާމް ހުރި ޖުމްލަ 83 ކޮކޭން ބުލެޓް ހުއްޓެވެ. ތައިފް ގެސްޓްހައުސްއަށް ގޮސްފައިވަނީ މ. ނިބިލިގާ ނިހާލް މުހައްމަދު އާސިމް ކިޔާ މީހަކާއެކުއެވެ. މި ދެމީހުން ފުލުހުން ހައްޔަރުކޮށް ސުވާލުކުރުމުން އެ ކޮތަޅު ގެންދަން ޖެހޭތަން އެނގޭނީ މއ. ސީނަރީވިޔު ހަމްދޫން މުހައްމަދަށް ކަމަށް ފުލުހުން ގާތުގައި ބުނެފައިވެއެވެ. އަދި އެ ދެމީހުން ދިން މައުލޫމާތާއި ފުލުހުންގެ އިންޓެލިޖެންސަށް ލިބުނު މައުލޫމާތުގެ އަލީގައި، ހަމްދޫން ރިޕްލް ބީޗް ގެސްޓްހައުސްގެ ބޭރުގެ ބީޗްގައި ހުރިކަމުގެ މައުލޫމާތު ލިބިގެން ފުލުުހުން އޭނާ ހައްޔަރުކޮށްފައިވެއެވެ.

މި މައްސަލައާއި ގުޅިގެން 3 މީހުންގެ މައްޗަށް ވެސް އުފުލާފައިވަީ ޖަދުވަލު 1 ގައިވާ މަސްތުވާއެއްޗެއް ޓްރެފިކް ކުރުމުގެ ދައުވާއެވެ. ތައިފް އަދި ނިހާލް ޖަދުވަލު 1 ގައިވާ މަސްތުވާއެއްޗެއް ޓްރެފިކް ކުރުމުގެ ދައުވާ ސާބިތު ނުވާކަމަށް ކަނޑައަޅާފައިވެއެވެ. އަދި ކުށުގެ މާއްދީ ރުކުނާއި މައުނަވީ ރުކުން އެކަށީގެންވާ މިންވަރެއްގެ ޝައްކެއްނެތި ހަމްދޫންގެ މައްޗަށް ދައުލަތުން ސާބިތުކޮށްދީފައިވާތީ، ހަމްދޫންގެ މައްޗަށް ކުށް ސާބިތުވާ ކަމަށް ވަނީ ކަނޑައަޅާފައެވެ.

ޖަދުވަލު 1 ގައިވާ މަސްތުވާތަކެތި ޓްރެފިކްކުރުމުގެ ކުށުގެ އަދަބަކީ އެއްލައްކަ ރުފިޔާއާއި ދިހަ މިލިއަން ރުފިޔާއާއި ދެމެދުގެ އަދަދަކުން ޖޫރިމާ ކުރުމެވެ.

މި މައްސަލައިގެ ހުކުމްގައި ބުނެފައިވަނީ މަސްތުވާތަކެއްޗާ ބެހޭ ގާނޫނުގެ 111 ވަނަ މާއްދާގެ (ހ) ގެ ދަށުން އަހުމަދު ތައިފް ރިޟްވާނާއި ނިހާމް މުހައްމަދު އާސިމްގެ މައްޗަށް ޕީޖީ ކޮށްފައިވާ ޖަދުވަލު 1 ގައިވާ މަސްތުވާއެއްޗެއް ޓްރެފިކްކުރުމުގެ ކުށުގެ ދައުވާ ސާބިތުނުވާ ކަމަށެވެ. އަދި ހަމްދޫން މުހައްމަދު ޖަދުވަލު 1 ގައިވާ މަސްތުވާއެއްޗެއް ޓްރެފިކް ކުރުމުގެ ކުށުން ކުށްވެރިވެއްޖެކަމަށް ހުކުމުގައި ބުނެފައިވެއެވެ. އަދި މި މައްސަލައިގެ ހާދިސާއަށް ބަލާއިރު، ފައިސާގެ މުއާމަލާތެއް ހިންގާފައިވާކަން އެނގެން ނެތުމާއި، ހަމްދޫންގެ އަތުން ގިނަ އަދަދެއްގެ ފައިސާ ފެނިފައި ނުވާތީ އެންމެ ކުޑަ ޖޫރިމަނާއެއް ކަނޑައަޅާފައިވެއެވެ.

އަދި އުގޫބާތެއްގެ ގޮތުން ހަމްދޫން އުމުރަށް ޖަލަށްލުމާއެކު އެއްލައްކަ ރުފިޔާއިން ވަނީ ޖޫރިމަނާކޮށްފައެވެ. އަދި 17 އޮގަސްޓް 2023ން ފެށިގެން 12 މަސް ދުވަހުގެ ތެރޭގައި މީރާއަށް ދެއްކުމަށް ހުކުމްކޮށްފައިވެއެވެ.