ފަނޑިޔާރު ހުސްނުއްސުއޫދުގެ ބަހުގެ ހޫނު ޙަމަލާތަކެއް ޖޭއެސްސީއަށް
ޖޭއެސްސީގެ ވަކީލު ވަނީ އެ ސުވާލަށް މިވަގުތު ޖަވާބުދާރީވާން ދަތިކަމަށް ވިދާޅުވެފައި
ޖޭއެސްސީން 10 ފަރާތެއްގެ މައްޗަށް ރައްދުވާގޮތަށް އިސްތިއުނާފުކޮށްފައިވާ މައްސަލައިގެ އަޑުއެހުން
ސުޕްރީމް ކޯޓުގެ ފަނޑިޔާރު ހުސްނުއްސުއޫދުގެ ބަހުގެ ހޫނު ޙަމަލާތަކެއް ޖުޑީޝަލް ސަރވިސް ކޮމިޝަން (ޖޭއެސްސީ) އަށް އަމާޒު ކުރައްވައިފިއެވެ.
ފަނޑިޔާރު ސުއޫދު އެމޭރުމުން ވާހަކަ ދައްކަވާފައިވަނީ ޖޭއެސްސީން 10 ފަރާތެއްގެ މައްޗަށް ރައްދުވާގޮތަށް އިސްތިއުނާފުކޮށްފައިވާމައްސަލައެއްގެއަޑުއެހުމުގައެވެ.
ފަނޑިޔާރު ހުސްނުއްސުއޫދު ވަނީ މި މައްސަލައިގެ ޚުސޫމާތު ފެށިގެން އައި އިރު މައްސަލަ ރައްދުވާ ފަރާތެއްގެ ގޮތުގައި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން އޮވެފައި، ފަހުން މައްސަލަ ރައްދުވާ ފަރާތް ޖުޑީޝަލް ސަރވިސް ކޮމިޝަނަށް ބަދަލުވީ ކީއްވެތޯ ސުވާލު ކުރައްވާފައެވެ.
އެ ސުވާލާއި ގުޅިގެން ޖޭއެސްސީގެ ވަކީލު ވިދާޅުވީ، ޑީޖޭއޭއަކީ އަމިއްލަ ނަމުގައި ދައުވާ ކުރުމާއި ދައުވާ ލިބިގަތުމުގެ ޙައްޤު ލިބިގެންވާ އިދާރާއެއް ނޫން ކަމަށާއި، ވުމާއެކު، މި މައްސަލައިގައި ޑީޖޭއޭ ތަމްސީލު ކުރާނީ ޖޭއެސްސީން ކަމަށެވެ.
މި މައްސަލައިގައި ޖޭއެސްސީއަށް ދައުވާ ރައްދުވުމާމެދު މައްސަލައެއް ނެތްކަން ހައިކޯޓުގެ މަރުޙަލާގައި ކުރިއަށް ދިޔަ ވަގުތީ އަމުރާ ގުޅޭ މައްސަލައެއްގައި ހައިކޯޓުން ނިންމާފައި އޮތްކަމަށްވެސް ޖޭއެސްސީގެ ވަކީލު ވިދާޅުވިއެވެ.
މި މައްސަލަ ޖޭއެސްސީއަށް ރައްދުވުމާމެދު މައްސަލައެއް އޮތްކަމަށް ދެކިވަޑައިނުގަންނަވާކަމަށް ކޮމިޝަނުގެ ވަކީލު ވިދާޅުވިއެވެ.
އެހެންނަމަވެސް ޤާނޫނުއަސާސީގެ 155-157ށް ބަޔާންކޮށްފައިވަނީ ކޯޓުތަކުގެ އިދާރީ ކަންކަމާ ގުޅޭ ޤަވާއިދު ހެދުމަކީ ކޯޓުތަކަށް ލިބިގެންވާ ބާރެއް ނޫންތޯ ފަނޑިޔާރު ހުސްނުއްސުއޫދު ސުވާލު ކުރެއްވިއެވެ.
މި މައްސަލައިގައި ހިމެނޭ ފަރާތްތަކުންވެސް ވަނީ ޑީޖޭއޭއަށް ރައްދުވާ މި މައްސަލައިގައި ޖޭއެސްސީން ވަކާލާތު ކުރާތީ ހައިކޯޓުގައިވެސް އެ ނުކުތާ ނަންގަވާފައިވާނެކަމަށް ވިދާޅުވެފައެވެ.
އެކަމާ ގުޅޭގޮތުން ޖޭއެސްސީގެ ވަކީލު ވިދާޅުވީ، ޤާނޫނުތަކާއި، ޖުޑީޝަލް ސަރވިސްގެ ޤާނޫނަށް ބަލާއިރުވެސް، ޕޮލިސީ ލެވެލްގައި އެ ކަންކަން ނިންމުމުގެ ބާރު އޮންނަނީ ޖޭއެސްސީއަށް ކަމަށެވެ.
އެހިސާބުން ފަނޑިޔާރު ސުއޫދު ވަނީ ދޮޅުއަހަރުވެގެންދާއިރު، ސުޕްރީމް ކޯޓަށް ސެކެޓަރީ ޖެނެރަލަކު އައްޔަނު ނުވެގެން ދިއުމުގެ ޒިންމާ ނަގަންޖެހޭނީ ކާކުތޯ ސުވާލު ކުރައްވާފައެވެ.
ފަނޑިޔާރު ސުއޫދު ވަނީ 2 އަހަރުވެގެންދާއިރު، ސުޕްރީމް ކޯޓަށް އިދާރީ އިސް މުވައްޒަފަކު ލިބޭނީ ކޮން ދުވަހަކުތޯ ސުވާލު ކުރައްވާފައެވެ.
ޖޭއެސްސީގެ ވަކީލު ވަނީ އެ ސުވާލަށް މިވަގުތު ޖަވާބުދާރީވާން ދަތިކަމަށް ވިދާޅުވެފައެވެ.
އެއަށްފަހު ދެން ކުރިއަށްދިޔައީ ހުށައެޅިފައިވާ މައްސަލައާ ގުޅޭގޮތުން މައްސަލައިގައި ހިމެނޭ ފަރާތްތަކުން ވާހަކަ ދެއްކުމެވެ. އަދި ޝަރީއަތުގެ ވަގުތު ހަމަވުމުން އަޑުއެހުން ވަނީ ނިންމަވާލައްވާފައެވެ.
