މާލޭގެ ރައްޔިތުންނަށް ގޯތި ދިނުމުގެ ސިޔާސަތު ހުށަހެޅުމާއެކުހެން ހުރިހާ ސިޔާސީ ޕާޓީތަކުންވެސް ވަނީ މި ސިޔާސަތާ ދެކޮޅު ހަދާފައި
ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމު
މާލެ ރަށްވެހިންނަށް ގޯތި ދިން ބަޔަކު ގޯތި ހަދަންވެސް އެހީތެރިވެދޭނެކަމަށާއި އެހެން ބަޔަކަށް އެކަމެއް ނުވާނެކަމަށް ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމު ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި މާލޭގެ ރަށްވެހިންނަށް ގޯތި ދިނުމާއި ގުޅޭގޮތުން ވާހަކަފުޅު ދައްކަވަމުން މީކާއީލު ވިދާޅުވީ މާލޭގެ ރައްޔިތުންނަށް ގޯތި ލިބިގެންދިޔުމަކީ އެތައް ޒަމާނަކު އެކަމަށް އެދުނު ރައްޔިތުންގެ މޫނުމައްޗަށް ހިނިތުންވުން ގެނުވިކަމެއްކަމަށެވެ. މާލޭގެ ރަށްވެހިންނަށް ގޯތި ދެއްވާނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވައުދުވެވަޑައިގެންނެވި ހިސާބުންވެސް އަދި ރިޔާސީ ބަޔާނުގައި އެވާހަކަ ވިދާޅުވުމުންވެސް ވާދަވެރި ފަރާތްތަކުން ބުނަމުންދިޔައީ އެއީ ނުވާނެކަމެއްކަމަށް މީކާއީލް ފާހަގަކުރެއްވިއެވެ.
ނަމަވެސް މިހާރު ގޯއްޗަށް ޝަރުތުހަމަވި ފަރާތްތަކުގެ މެދުގައި ގުރުނެގުން ކުރިޔަށްދާއިރު މި ސަރުކާރު ނިމިގެންދާއިރު ރައްޔިތުންގެ އަތަށް ގޯތީގެ ރަޖިސްޓްރީ ލިބޭނެކަމަށް މީކާއީލް ވިދާޅުވިއެވެ.
ގޯތި ދިން އިރު ބަލާފައިވަނީ މާލީ ތަނަވަސްކަމަށް ނޫންކަމަށާއި ގޯތިލިބުން ހައްގު މީހުންނަށްކަމަށް މީކާއީލް ވިދާޅުވިއެވެ. އެހެންކަމުން ގޯތި ހަދަން ބޭނުންވާ ފަރާތްތަކަށް މިސަރުކާރުން ލުއި ގޮތްތަކެއް ހައްދަވައިދެއްވާނެކަމަށް މީކާއީލް ވިދާޅުވިއެވެ.
މީކާއީލް ވިދާޅުވީ މިއަހަރުގެ ރިޔާސީ އިންތިޚާބުގައި ވޯޓުލުން ވަރަށް މުހިންމުކަމަށާއި މާލޭގެ ރައްޔިތުންނަށް އެމްޑީޕީން ހޯދައިދީފައިމިވާ ފުރުސަތު ދެމެހެއްޓެމަށްޓަކައި ވެސް ވޯޓުލާންޖެހޭކަމަށެވެ. މާލޭގެ ރައްޔިތުންނަށް ގޯތި ދިނުމުގެ ސިޔާސަތު ހުށަހެޅުމާއެކުހެން ހުރިހާ ސިޔާސީ ޕާޓީތަކުންވެސް ވަނީ މި ސިޔާސަތާ ދެކޮޅު ހަދާފައިކަމަށާއި ނަމަވެސް މި ސިޔާސަތު ދެމެހެއްޓި ހަމައެކަނި ޕާޓީއަކީ އެމްޑީޕީ ކަމަށް މީކާއީލް ވިދާޅުވިއެވެ.
