މިދިޔަ 2 އަހަރެއްހާ ދުވަހަކީ ހީވެސް ނުކުރާ ފަދަ ބަދަލުތަކެއް މަރްޔަމްގެ ހަޔާތަށް ކުރިމަތިވެގެން ދިޔަ ދުވަސްތަކެކެވެ. އަފްޣާނިސްތާނުގެ ވެރިކަން، ތާލިބާނުންގެ މުށުތެރޭގައި ފިއްތާލިފަހުން މި ވޭތުވެދިޔަ 24 މަހެއްހާ ދުވަހަކީ މަރްޔަމް ފަދަ އެތައް އަންހެނުންނެއްގެ ދިރިއުޅުން އެގޮތް މިގޮތަށް ބަދަލު ވެގެން ދިޔަ ދުވަސްތަކެކެވެ.
ޢުމުރުން 27 އަހަރުގެ މަރްޔަމަކީ، އަފްޣާނިސްތާނުގައި ތާލިބާނުންގެ ސަރުކާރެއް ގާއިމުކުރިއިރު، ތައުލީމީ ދާއިރާގެ ބައިނަލްއަގުވާމީ މަޝްރޫއެއްގެ ޑޭޓާބޭސް އޮފިސަރެއްގެ ގޮތުގައި މަސައްކަތްކުރަމުން ދިޔަ ޒުވާނެކެވެ. ވަކި ހިސާބަކުން މަޝްރޫއު ހުއްޓާލަން ޖެހުމާއެކު މަރްޔަމްގެ ވަޒީފާވެސް ގެއްލުނީއެވެ.
ހަރުދަނާ ޒުވާނެއްގެގޮތުގައި ދިރިއުޅުމަށް މަރްޔަމްގެ ހިތުގައި އޮތް އަޒުމު މަރެއްނުވެއެވެ. އޭނާގެ މިސްރާބު ދެން ބަދަލުކޮށްލީ އަންހެން ކުދިންނަށް ޚާއްސަ ޕްރައިވެޓް ސްކޫލެއްގެ ޓީޗަރެއްގެ ގޮތުގައި މަސައްކަތްކުރުމާ ދިމާއަށެވެ. އެކަމުގައިވެސް އޭނާއަށް ދެމިހުރެވުނީ އަހަރެއްހާ ދުވަހަށެވެ. ހައި ސްކޫލްތަކާއި ޔުނިވަރސިޓީތަކުގެ ދޮރުތައް އަންހެން ދަރިވަރުންނަށް ތާލިބާނު ސަރުކާރުން ބަންދުކުރީއެވެ.
މަރްޔަމަކީ މާ ފަސޭހައިން އުއްމީދު ނަގާލާ މީހެއް ނޫނެވެ. އޭނާ ދެން މަސައްކަތް ފެށީ އަމިއްލައަށް ފަހާ ތަނެއް ހުޅުވައިގެން އާމްދަނީއެއް ހޯދޭތޯއެވެ. އެކަން ފެށީ މީގެ ހައެއްކަ މަސް ކުރިންނެވެ. އޭނާއާއެކު ކުރިން މަސައްކަތްކުރި 15 މީހަކު މުވައްޒަފުންގެ ގޮތުގައި ނަގައިގެންނެވެ. ތާލިބާނުން ވެރިކަމަށް އެރުމާއެކު އެމީހުންގެ ވަޒީފާތައްވެސް ގެއްލުނީއެވެ.
އަހަރެން ދުވަހަކުވެސް ފަސް އެނބުރިއެއް ނުބަލަން. އުއްމީދު ކަނޑައެއް ނުލަން. ދިރިއުޅުމައިގެން ކުރިއަށްދަނީ. އަންހެނުންނަށް ޔުނިވަރސިޓީތަކާ ސްކޫލުތައް ތާލިބާނުން ބަންދުކުރިއަސް، އަހަރެމެންގެ ސިކުނޑިއަކަށް ހުރަހެއް ނޭޅޭނެ. އަހަރެމެންގެ ސިކުނޑި ބޭނުންކޮށްގެން އެމީހުންނާ ދެކޮޅަށް ތެދުވެވޭނެ. ލިބެން އޮތް ފުރުސަތުތައް ދޫކޮށްލައިގެން ނުވާނެ. ހުރަސްތަކަކީ އުޒުރަކަށް ހަދާ، އެކަންކަން އެގޮތުގަ ދޫކޮށްލައިގެން ނުވާނެ.މަރްޔަމް؛ އަފްޣާން ޒުވާނެއް
އަފްޣާނިސްތާނުގެ ސަގާފީ ހެދުންތަކާއި ހިޖާބު ފަދަ އަންނައުނު ފަހަން އޭނާގެ މުވައްޒަފުންނަށް ދަސްކޮށްދެނީވެސް ޚުދު މަރްޔަމެވެ. ފެހުމުގެ ހުނަރަށް މަރްޔަމް ފަރިތަވީ މީގެ 4 އަހަރު ކުރިން އޭނާ ހެދި 1 އަހަރު ދުވަހުގެ ފަހާ ކޯހެއްގެ އެހީގައެވެ.
މަރްޔަމާއި އޭނާގެ މުވައްޒަފުންގެ އުފެއްދުންތައް މިއަދު ވިއްކަނީ އޮންލައިން ޕްލެޓްފޯމެއްގައެވެ. ދޭސީ އަދި ބިދޭސީ ކަސްޓަމަރުންނަށެވެ.
މަރްޔަމް ބުނާގޮތުގައި އޭނާގެ ގާތުން ޚިދުމަތް ހޯދާ ކަސްޓަމަރުންގެ އަދަދު އިތުރުވެގެންދިޔައީ ކުޑަ ދުވަސްކޮޅެއްގެ ތެރޭގައެވެ. ކުރިއަށް އޮތް ތަނުގައިވެސް ވިޔަފާރި އިތުރަށް ފުޅާވެގެންދާނެ ކަމާމެދު މަރްޔަމް ޝައްކެއް ނުކުރެއެވެ. ޖަރުމަނުވިލާތާއި އެމެރިކާ އަދި ކެނެޑާފަދަ ގައުމުތަކަށް އޭނާގެ ވިޔަފާރީގެ ގޮފިތައް ފުޅާކުރުމަކީ މިއަދު މަރްޔަމް ދެކެމުންދާ ފޮނި ހުވަފެނެކެވެ. އެކަން ކުރަން ގަސްތުކުރަނީ އެ ގައުމުތަކުގައި ދިރިއުޅޭ އޭނާގެ އާއިލާގެ މެންބަރުންގެ އެހީއާ އެކުގައެވެ.
ތާލިބާނުން އަހަރެމެންގެ ގައުމަށް ވެރިވެގެންފާނެއޭ އަހަރެން ދުވަހަކުވެސް ހިއެއްނުކުރަން. އެހެން އުޅެމުން ގޮސް އެއްދުވަހަކު އެމީހުން އެއޮތީ ކުރި ހޯދާފަ. އަންހެނުންނާ ދެކޮޅަށް އަޅާ ހުރަސްތައް، ދުވަހަކަށްވުރެ ދުވަހެއް އެ ދަނީ އިތުރުވަމުން. ގިނަ މައްސަލަތަކެއް ދަނީ ކުރިމަތިވަމުން. ތާލިބާނުން ނަސްރުގެ ދުވަހުގެ ގޮތުގަ ފާހަގަ އެ ކުރާ ދުވަހަކީ، އަފްޣާނިސްތާނުގެ އެތައް ބައެއްގެ ދިރިއުޅުމަށް އައި އެންމެ ހިތްދަތި ދުވަސް.ހުސްނާ؛ އަފްޣާން ޒުވާނެއް
2021 ވަނަ އަހަރުގެ އޯގަސްޓް މަހުގެ 15 ވަނަ ދުވަހު، އަފްޣާނިސްތާނުގެ ވެރިކަންކުރާ ކާބުލް ތެރެއަށް ތާލިބާނުންގެ ފައުޖުތައް ވަދެގެން ދިއުމާއެކު އެތައް ބައެއްގެ ދިރިއުޅުން ބަދަލުވިއެވެ. އެމެރިކާގެ ތާއީދު އޮތް އަފްޣާން ސަރުކާރުގެ ރައީސްކަމުގައި ހުންނެވި އަޝްރަފު ޣަނީ، ގައުމު ދޫކުރައްވައި ފިއްލެވުމާއި، ހުޅަނގުގެ އެއްބާރުލުމާއެކު، އެތައް އަހަރެއްގެ މަސައްކަތުން އަފްޣާނިސްތާނުގައި ވަރުގަދަކުރަމުން ދިޔަ އެ ގައުމުގެ އަސްކަރިއްޔާ ރޫޅިގެންދިޔަ ހިސާބުން އެތައް ބައެއްގެ ދިރިއުޅުން އެފުށް މިފުށަށް ޖެހިގެން ދިޔައެވެ.
މާ ރަނގަޅު އިހުސާސްތަކެއް ނޫން ކުރެވެނީކީ. މި ދުވަހާމެދު އަހަރެން އުފަލެއް ނުވޭ. މިއަދު ތާލިބާނުން މި ގައުމުގަ ވެރިކަން އެ ހިންގަނީ ރައްޔިތުންގެ މަސްލަހަތަށް ބަލައިގެންނެއް ނޫން. އަންހެނުންނާމެދު އެހާ ނޭދެވޭ ގޮތަކަށް އެމީހުން ވިސްނަންވީ ކީއްވެ ކަމެއް މަށަކަށް ހަމަ އެއްގޮތަކަށްވެސް ނުވިސްނުނު. އެމީހުން އެބުނަނީ އާންމުންނަށް ސަލާމަތާ ރައްކާތެރިކަން ހޯދައިދެވިއްޖޭ. އެކަމަކު، ވަކި ބޮޑު ސަލާމަތަކާ ރައްކާތެރިކަމެއް ހޯދައިދެވިފައެއް ނެތް.ޚަދީޖާ؛ އަފްޣާނިސްތާނުގެ ދޮށީ އުމުރުގެ މީހެއް
ހުޅަނގުގެ ތާއީދު އޮތް ސަރުކާރުތަކުން އަފްޣާނިސްތާނުގައި ވެރިކަން ހިންގި ވިއްސަކަށް އަހަރު ދުވަހަކީ އަފްޣާނިސްތާނުގެ އަންހެނުން، އިންތިހާ މިނިވަންކަމާއި ހައްގުތަކުގެ އުފާ ހާސިލުކުރަމުން ދިޔަ ދުވަސްތަކެކެވެ. ނަމަވެސް، ގައުމުގެ ވެރިކަމާ ތާލިބާނުން ހަވާލުވިފަހުން، އެ ހުރިހާ ކަމަކީ މާޒީކަމުގައި ވެއްޖެއެވެ.
އދ.ން ސިފަކުރާގޮތުގައި މި ދުވަސްވަރަކީ ކައިރި މާޒީގައި އަފްޣާނިސްތާނު ދެކެފައި ނުވާފަދަ ސުލްހަ މަސަލަސްކަން އެ ގައުމަށް ވެރިވެފައި އޮތް ދުވަސްވަރެކެވެ. ނަމަވެސް، އާންމު ރައްޔިތުންނަށް އަމާޒުކޮށްގެން ހަމަލާތައް ދެއެވެ. ބައެއް ހަމަލާތަކުގެ ޒިންމާ އުފުލަނީ ތާލިބާނުންގެ އިދިކޮޅު، ވަރުގަދަ ޓެރަރިސްޓް ޖަމާއަތެއް ކަމަށްވާ އައިސިސްއިންނެވެ.
