ފަހުވަގުތު ޖެހި ލަނޑާއެކު، އަބަހާނީން އީގަލްސް ބަލިކޮށްފި
16 އޯގަސްޓު 2023 | ބުދަ 13:59އަބަހާނީ މެޗުން މޮޅުވީ 2-1ގެ ނަތީޖާއަކުން
އަބަހާނީއާއި އީގަލްސް ބައްދަލުކުރި މެޗުގެ ތެރެއިން
އޭއެފްސީ ކަޕް ފުޓްބޯޅަ މުބާރާތުގެ ޕްރިލިމިނަރީ ބުރުގައި ފަހުވަގުތު ޖެހި ލަނޑާއެކު ބަންގަލްދޭޝްގެ އަބަހާނީ ލިމިޓެޑުން ރާއްޖޭގެ ކްލަބް އީގަލްސް ބަލިކޮށްފިއެވެ.
ބަންގްލަދޭޝްގެ ސިލްހެޓްގައި މިއަދު ކުޅުނު މެޗުން އަބަހާނީ މޮޅުވީ 2-1ގެ ނަތީޖާއަކުންނެވެ. މެޗުގައި ފުރަތަމަ ލީޑު ނެގީވެސް އަމިއްލަ ދަނޑުގައި ކުޅުނު އަބަހާނީންނެވެ. މެޗުގެ 21 ވަނަ މިނެޓުގައި އެ ޓީމަށް ކުރިހޯދައިދިނީ، ކުރިން ރާއްޖޭގެ ޓީސީ ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަނަށް ކުޅެފައިވާ ސެއިން ވިންސެންޓްގެ ފޯވާޑް، ކޮނޭލިއަސް ސްޓެވާޓް (ކޯނޭ)އެވެ.
މެޗުގެ ގިނަ ވަގުތު ބޯޅަ ހިފަހައްޓައިގެން މޮޅަށް ކުޅެފައިވަނީ ބަންގްލަދޭޝްގެ ޓީމުންނެވެ. އެ ޓީމަށް ވަނީ ލަނޑު ޖަހާނެ ގިނަ ފުރުސަތުތަކެއްވެސް ލިބި، ބޭނުން ނުހިފިފައެވެ. މެޗުގެ 63 ވަނަ މިނެޓުގައި އީގަލްސްއަށް ނަތީޖާ ހަމަހަމަކޮށްދިނީ ޓީމުގެ ކެޕްޓަން އަހުމަދު ރިޒްވާން (ރިޒޭ)އެވެ. މެޗުގެ 89 ވަނަ މިނެޓުގައި އަބަހާނީ މޮޅުކޮށްދިން ލަނޑު ޖަހައިދިނީ ޑެނީލޯ އޮގަސްޓޯއެވެ.
އީގަލްސްއާއި އަބަހާނީން ވަނީ މި މެޗަށް ވަރަށް ބޮޑަށް ތައްޔާރުވެފައެވެ. އެގޮތުން ދެ ޓީމުންވެސް ވަނީ ބިދޭސީ ފަސް ކުޅުންތެރިން ހިމަނާފައެވެ. 2021 ވަނަ އަހަރުގެ މުބާރާތުގެ ޕްރިލިމިނަރީ ދެވަނަ ބުރުގައިވެސް މި ދެ ޓީމު ބައްދަލުކުރަން ޖެހުނެވެ. ނަމަވެސް، އަބަހާނީއަށް ދަތުރުކުރުމަށް ދަތިވުމުން އީގަލްސްއަށް ވަނީ މެޗު ލިބިފައެވެ.
ޕްލޭ-އޮފްގައި އަބަހާނީ ކުޅެން ޖެހޭނީ އިންޑިއާގެ މޯހަން ބަގާންއާއި ނޭޕާލްގެ މަޗިންދުރަ އެފްސީ ކުޅެގެން މޮޅުވާ ޓީމަކާއެވެ.
