ބޮޑުފޮޅުދޫ ކައުންސިލް ރައީސާއެކު އިތުރު 63 މީހަކު އެމްޑީޕީއަށް
ކައުންސިލް ރައީސް އާއި ކައުންސިލް މެމްބަރެއް އެމްޑީޕީއަށް ސޮއި ކުރެއްވި
ބޮޑުފޮޅުދޫ ކައުންސިލް ރައީސް އެމްޑީޕީއަށް ސޮއި ކުރުން
އއ. ބޮޑުފޮޅުދޫ ކައުންސިލްގެ ރައީސް ޝުޖާއު އާދަމް އާއި އެ ރަށުގެ އިތުރުން 63 މީހަކު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އާ ގުޅިއްޖެއެވެ.
ބޮޑުފޮޅުދޫ ކައުންސިލްގެ ރައީސްއަކީ އެ ރަށޫގައި ޕީޕީއެމްގެ ހަރަކާތްތައް ހިންގެވުމުގައި އިސްކޮށް ހަރަކާތްތެރިވަމުން ގެންދެވި ބޭފުޅެކެވެ. އޭނާއާއެކު ބުދަ ދުވަހު ކައުންސިލް މެމްބަރު މުޙައްމަދު ނާޝިޒު ވެސް ވަނީ އެމްޑީޕީއަށް ސޮއި ކޮށްފައެވެ. މި ފޯމުތައް ބުދަ ދުވަހު ބޭއްވި ޖަލްސާގައި އެމްޑީޕީގެ ރިޔާސީ ކެންޑިޑޭޓް, ރައީސް އިބްރާހިމް މުޙައްމަދު ޞާލިހާ ވަނީ ހަވާލުކޮށްފައެވެ.
އެމްޑީޕީއަށް ސޮއި ކުރައްވައި ބޮޑުފޮޅުދޫ ކައުންސިލްގެ ރައީސް ޝުޖާއު ވިދާޅުވީ އެ ރަށަކީ ތރައްގީއަށް ފެންބޮވައިގެންފައިވާ ރައްޔިތުން އުޅޭ ރަށަކަށްވާއިރު ކުރީ ސަރުކާރުތަކުގައި އާދޭސް ކުރިއިރު ވެސް ރަށަށް ހިދުމަތް ކޮށްފައިނުވާ ކަމަށެވެ. ނަމަވެސް ރައީސް ޞާލިހަކީ ތަފާތު ކުރުމެއް ނެތި ޚިދުމަތް ކޮށްދެއްވާ ވެރިއެއް ކަމަށް އޭނާ ވިދާޅުވިއެވެ.
ރައީސް ޞާލިހަކީ ވެވަޑައިގަންނަވާ ވައުދުފުޅުތައް ރަނުން ރަނަށް ފުރިހަމަކޮށްދެއްވާ ރައިސެއްކަން ފާހަގަކުރައްވައި ޝުޖާއު ވިދާޅުވީ އެ ރަށުގެ ސިއްހީ މަރުކަޒުގައި މިހާރު ލެބޯޓްރީގެ ޚިދުމަތް ވެސް ފެށިފައިވާ ކަމަށެވެ.
މީގެ އިތުރުން ރައްޔިތުންގެ އުއްމީދާ ގުޅިފައިވަނީ ރައީސް ޞާލިހާ ކަމަށާއި އެމަނިކުފާނަށް ދެވަނަ ދައުރެއް ދިނުމަށް ރައްޔިތުން ތިބީ ކެތް މަދުވެފައި ކަމަށް ވެސް ޝުޖާއު ވިދާޅުވިއެވެ.
