އަނިޔާގެ ޝިކާރައަށްވެފައިވާ މާލީ ތަނަވަސްކަން ނެތް އަންހެނުންނަށް ބޭނުންވާ ޤާނޫނީ އެހީތެރިކަން ހިލޭ ފޯރުކޮށްދެނީ
މި އެއްބަސްވުމުގެ މަގުސަދަކީ އަދުލު އިންސާފު ހޯދުމުގައި ހުރަސްތައް ހުރުމުން އެ ކަންކަމުގައި އެހީތެރިކަން ފޯރުކޮށްދިނުން
އެއްބަސްވުމުގައި ސޮއިކުރި ހަފްލާގެ ތެރެއިން
އަންހެނުންނާއި ކުޑަކުދިންނަށް ކުރިމަތިވާ ގެވެށި އަނިޔާއާއި ޖިންސީ އަނިޔާ އަދި ފުރައްސާރަކުރުމުގެ މައްސަލަތަކާއި، ކުޑަކުދިންގެ ޙަޟާނަތުގެ މައްސަލަތަކާއި، މި ބާވަތުގެ އެހެނިހެން މައްސަލަތަކުގައި މާލީ ތަނަވަސްކަން ނެތް އަންހެނުންނަށް ބޭނުންވާ ގާނޫނީ އެހީތެރިކަން ހިލޭ ފޯރުކޮށްދިނުމާ ގުޅޭގޮތުން ޒުލޭޚާ އެންޑް އެސޯސިއޭޓްސް އެލްއެލްޕީއާއި ބްރިޖިންގ ދަ ކޮމިއުނިޓީސް މޯލްޑިވްސްއާ ދެމެދު އެއްބަސްވުމެއްގައި ސޮއިކޮށްފިއެވެ.
މިއެއްބަސްވުމުގައި ސޮއިކޮށްފައިވަނީ އަންގާރަ ދުވަހުގެ ރޭ މިކަމަށް ބޭއްވި ޚާއްސަ ހަފްލާއެއްގައެވެ.
އެސްއެމްއީ ހަބްގައި ބޭއްވި ބައްދަލުވުމެއްގައި ޒުލޭޚާ އެންޑް އެސޯސިއޭޓްސް އެލްއެލްޕީގެ ފަރާތުން މިއެއްބަސްވުމުގައި ސޮއިކުރެއްވީ މެނޭޖިންގ ޕާރޓްނަރ ޒުލޭޚާ އިބްރާހީމްއެވެ. ބްރިޖިންގ ދަ ކޮމިއުނިޓީސް މޯލްޑިވްސްގެ ފަރާތުން ސޮއިކުރެއްވީ އެގްޒެކިއުޓިވް ޑިރެކްޓަރ އިބްރާހީމް މުހައްމަދުއެވެ.
މި އެއްބަސްވުމުގެ މަގުސަދަކީ ގެވެށިއަނިޔާއާއި ޖިންސީ އަނިޔާ އަދި ފުރައްސާރަކުރުމުގެ މައްސަލަތަކާއި، ކުޑަކުދިންގެ ޙަޟާނަތުގެ މައްސަލަތަކާއި، މި ބާވަތުގެ އެހެނިހެން މައްސަލަތައް މުޖުތަމައުގައި އިތުރުވަމުންދާއިރު، މާލީ ތަނަސްކަން ނެތުމުގެ ސަބަބުން އަނިޔާ ލިބޭ ފަރާތްތަކުގެ ހައްގުތައް ކަށަވަރުކުރުމާއި އަދުލު އިންސާފު ހޯދުމުގައި ހުރަސްތައް ހުރުމުން އެ ކަންކަމުގައި އެހީތެރިކަން ފޯރުކޮށްދިނުމެވެ.
އެގޮތުން މި ބާވަތުގެ މައްސަލަތަކުގައި ތަހުގީގު އަދި ކޯޓު މަރުހަލާގައި ބޭނުންވާ ގާނޫނީ އެހީތެރިކަން އެ ފަރާތްތަކަށް ފޯރުކޮށްދެވޭނެއެވެ.
