"ބިންވެރިޔާ ސްކީމް"ގެ ދަށުން ގޯތި ލިބޭ މީހުންނަށް ދޫކުރާ ގޯތިތަކުގެ ގުރުއަތުލުން މިއަދު ފަށައިފިއެެވެ.

ގަލޮޅު ދަނޑުގައި ގުރުއަތުލުން ފަށާފައި ވަނީ މިއަދު މެންދުރު 12:15 އެހާއިރެވެ. ޕްލޭނިން މިނިސްޓްރީން ވަނީ ގޯތި ލިބޭ މީހުން ގުރުއަތު ނެގުމަށް ދާންޖެހޭ ގަޑިތައް ޕޯޓަލް މެދުވެރިކޮށް އެ މީހުންނަށް އަންގާފައެވެ. މިއަދާއި މާދަމާ ގުރުއަތު ނެގުން ކުރިއަށްގެންދަން ހަމަޖެހިފައި ވަނީ ގަލޮޅު ދަނޑު ގައެވެ. އަދި ބުރާސްފަތި ދުވަހުން ފެށިގެން ގުރުއަތު ނެގުން ކުރިއަށް ގެންދާނީ ހެންވޭރު ދަނޑުގައެވެ. ގުރުއަތު ނެގުމުން ގޯތި ލިބޭ ތަނާއި ޕްލޮޓް ނަމްބަރު އެނގިގެންދާނެއެވެ. ރައީސް އިބްރާހީމް މުހައްމަދު ޞާލިހް ވަނީ މިދައުރު ނިމުމުގެ ކުރިން ގޯތި ތަކުގެ ރަޖިސްޓްރީ ދެއްވާނެ ކަމަށް ވިދާޅުވެފައެވެ.

މާލެ ރައްޔިތުންނަށް ގޯތި ދެނީ ހުޅުމާލޭގެ އިތުރުން ގުޅިފަޅު އަދި ގިރާވަރު ފަޅުންނެވެ. "ބިންވެރިޔާ' ސްކީމުގެ ދަށުން ގޯއްޗަށް ޝަރުތު ހަމަވާ 18،955 މީހުންގެ ނަން ދާއިމީ ލިސްޓުގައި ވަނީ ހިމަނާފައެވެ.