ސެމީގެ ކުރިން މާޓިނޯ އަށް އޮތް ކަންބޮޑުވުމަކީ މެސީ!

އެމެރިކާ ލީގްސް ކަޕްގެ ސެމީ ފައިނަލްގެ ކުރިން އޮތް ހަމައެކަނި ކަންބޮޑުވުމަކީ ކެޕްޓަން ލިއޮނަލް މެސީ އަށް އަނިޔާވެދާނެ ކަމުގެ ބިރު ކަމަށް އެ ޓީމުގެ ކޯޗު ޖެރާޑޯ މާޓިނޯ ބުނެފި އެވެ.

ސެމީ ފައިނަލް މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން މާޓިނޯ ބުނީ، ފަރިތަކުރުންތަކުގެ ތެރެއިން ކޮންމެ ވެސް ކަމެއް ދިމާވި ކަމަށާއި، ނަމަވެސް ސީދާ މަންޒަރު އޭނާ އަށް ނުފެންނަ ކަމަށެވެ. ނަމަވެސް މެސީ އަށް އަނިޔާވެއްޖެ ނަމަ ހުރިހާ ކުޅުންތެރިންނަށް ވެސް ވަރަށް ބޮޑު ޝޮކަކަށް ވާނެ ކަމަށް އޭނާ ވަނީ ބުނެފަ އެވެ. ސަބަބަކީ މީގެ ކުރިން މެސީ އާއެކު ކުޅުންތެރިންގެ ކިބައިގައި އޮތް އުފެދިފައި އޮތް ވަރުގަދަ ރޫހު ކަމަށް އޭނާ ވަނީ ފާހަގަކޮށްފަ އެވެ. މާޓިނޯ ބުނީ އޭނާގެ އުންމީދަކީ މެސީ އަށް އަނިޔާ ނުވުން ކަމަށާއި، ސެމީ މެޗުގައި އެންމެ މުހިންމު ކުޅުންތެރިޔަކަށް ވާނީ ވެސް އޭނާ ކަމަށެވެ.

މިއާމީގައި މިހާތަނަށް މެސީ ދައްކާފައިވާ ކުޅުމާ ގުޅޭ ގޮތުން މާޓިނޯ ބުނީ، އެއީ މާ ބޮޑު ތަފްސީލަކަށް ދާން ޖެހޭނެ ކަމެއް ނޫން ކަމަށެވެ. ސެމީ އަށް މިއާމީ އައުމުގައި މެސީ ބޮޑު ދައުރެއް އަދާކޮށްފައިވާ ކަމަށާއި، ފައިނަލާ މިއާމީއާ ދެމެދު އޮތް އުންމީދަކީ މެސީ ކަމަށް ވެސް އޭނާ ދެކެ އެވެ. އެހެންކަމުން މެސީ އަކީ ސެމީ މެޗަށް ވަރަށް މުހިންމު ކުޅުންތެރިޔެއް ކަމަށް އޭނާ ވަނީ ބުނެފަ އެވެ.

ސެމީގެ ކުރިން ޓީމުގެ ފަރިތަކުރުންތަކާމެދު ވެސް މާޓިނޯ ވަރަށް ބޮޑަށް ހިތްހަމަޖެހެ އެވެ. އޭނާ ބުނީ ކޮންމެ ކުޅުންތެރިޔެއްގެ ފަރާތުން ވެސް ފެންނަނީ އެއް ޓީމެއްގެ ގޮތުގައި އޮތް މަންޒަރު ކަމަށާއި، އެކަމުން ހިތްވަރު ލިބޭނެ ކަމަށެވެ. ސެމީ މެޗުގައި ވެސް ކުޅޭނީ ކުރީ މެޗުތަކާ އެއްގޮތަށް، އެޓޭކުކޮށް މިއާމީ ކޮޅަށް މެޗު އަނބުރާލަން ކަމަށް އޭނާ ވަނީ ބުނެފަ އެވެ.

މިއާމީ އާއި ފިލަޑެލްފިއާ ބައްދަލު ކުރާ ސެމީ މެޗު އޮންނާނީ ބުދަ ދުވަހުގެ ފަތިހު ހަތަރެއް ޖަހާއިރު އެވެ.