މާފުށިން ގޯތި ލިބުނު މީހުންގެ ލިސްޓު އާއްމުކޮށް ޝަކުވާ ހުށަހެޅުމުގެ ފުރުސަތު ހުޅުވާލައިފި
15 އޯގަސްޓު 2023 | އަންގާރަ 02:09ޝަކުވާ ހުށަހެޅުމުގެ ފުރުސަތު ހުޅުވާލާފައިވަނީ މި މަހުގެ 24 އާ ހަމައަށް
މާފުށީގައި އަލަށް ހިއްކި ސަރަހައްދު، ގޯތި ދޫކުރަނީ މި ސަރަހައްދުން
ކ. މާފުށިން ދިރިއުޅުމަށްޓަކައި ދޫކުރަން ނިންމި ބަންޑާރަ ގޯތި ލިބުނު މީހުންގެ ވަގުތީ ލިސްޓު އާއްމުކޮށް، ޝަކުވަ ހުށަހެޅުމުގެ ފުރުސަތު ހުޅުވާލައިފިއެވެ.
މާފުށި ހިއްކި ބިމުން ގޯއްޗަށް އެދުމުގެ ފުރުސަތު އެންމެ ފުރަތަމަ ހުޅުވާލީ މިދިޔަ މާޗު މަހުގެ 30 ވަނަ ދުވަހުއެވެ. އޭރު އާންމު ކުރި އުސޫލަށް ބަދަލުތަކެއް ގެނައުމާއެކު އަލުން އެ ފުރުސަތު އޭޕްރިލް މަހު ހުޅުވާލިއެވެ. މާފުށިން ދޫކުރަން ނިންމާފައިވަނީ 2000 އަކަފޫޓުގެ 308 ބަންޑާރަ ގޯއްޗެވެ. މި ގޯތިތައް ލިބޭ މީހުންގެ ވަގުތީ ލިސްޓުގައި ހިމެނެނީ މާފުށީގައި ރަޖިސްޓްރީވެފައިވާ ފަރާތްތައް އެކަންޏެވެ.
އެންމެ ފުރަތަމަ ގޯއްޗަށް އެދުމުގެ ފުރުސަތު ހުޅުވާލިއިރު ކޮންމެ ރަށެއްގެ މީހަކަށް ވެސް ކުރިމަތިލެވޭ ގޮތަށް ކައުންސިލުން ފުރުސަތު ދިނެވެ. ނަމަވެސް ފަހުން މާފުށީގެ ރަށްވެހި ނޫން މީހެއް ނަމަ 30 ޕޮއިންޓް އުނިކުރާ ގޮތަށް ގަވާއިދަށް އިސްލާހު ގެނައެވެ.
ވަގުތީ ލިސްޓުގައި 308 މީހަކަށް ގޯތި ލިބޭއިރު އެ ލިސްޓަށް ޝަކުވާ ހުށަހެލުމުގެ ފުރުސަތު ހުޅުވާލާފައިވަނީ މި މަހުގެ 24 ވަނަ ދުވަހުގެ މެންދުރު 2:00 އާ ހަމައަށެވެ. ލިޔުމުން ޝަކުވާ ހުށަހަޅަން ޖެހޭނީ ރަސްމީ ގަޑިތަކުގައި މާފުށި ކައުންސިލް އިދާރާއަށް ނުވަތަ އީމެއިލް މެދުވެރިކޮށެވެ.
މާފުށީ ހިއްކި ބިމުން ގޯތި ދޭ މީހުންގެ ކިބައިގައި ހުންނަންޖެހޭ ޝަރުތުތަކުގެ ތެރޭގައި ރާއްޖޭގެ އެއްވެސް ރަށަކުން ބަންޑާރަ ގޯއްޗެއް ނުވަތަ އަމިއްލަ ގޯއްޗެއް ނުވަތަ އެފަދަ ގޯއްޗަކުން 600 އަކަ ފޫޓަށްވުރެ ބޮޑު ބައެއް ލިބިފައިވާ މީހަކަށް ނުވުމާއި ސަރުކާރުން ހަދާފައިވާ އިމާރާތެއް ނުވަތަ ފްލެޓެއް އެމީހެއްގެ ނަމުގައި ރަޖިސްޓަރީވެފައިވާ ފަރާތަކަށް ނުވުމާއި، އެފަދަ ތަނެއް އަމިއްލަ ނަމުގައި އޮތްނަމަ އެތަން ދޫކޮށްލާ ނުވަތަ ވިއްކާލާފައިވާތާ 2 އަހަރު ދުވަހަށްވުރެ ގިނަ ދުވަސް ވެފައިވާ ފަރާތަކަށްވުން ހިމެނެއެވެ.
ބަންޑާރަ ގޯތި ދޫކުރުމަށް ނިންމާފައިވަނީ މާފުށީގައި އަލަށް ހިއްކާފައިވާ 25 ހެކްޓަރުގެ ބިމުންނެވެ. އެއީ މާފުއްޓާ ކައިރިން އެ ރަށު ފަޅުން ހިއްކި ބިމެކެވެ. މި ބިމާ މާފުއްޓާ ގުޅުވާލާނީ ކޯޒްވޭއަކުންނެވެ.
