ހަވާއީގެ މާއުއީއޭ ކިޔުނު ރަށް އަނދައި އަޅިއަށް ހަދައިލި ވަރުގަދަ އަލިފާނުގެ ހާދިސާގައި ވީ ނުވީއެއް ނޭނގި ގެއްލިފައިވާ، އާއިލާގެ 9 މެންބަރުން ފެނޭތޯ 3 ދުވަސްވަންދެން އަތްފުނާ އެޅުމަށްފަހު، ޖޫން ލަކުއެސްޓާ މިސްރާބު ޖެހީ ފެމިލީ ރިސޯސް ސެންޓަރަށެވެ.
ލަކުއެސްޓާ ބުނިގޮތުގައި މިދިޔަ ދުވަސްތަކަކީ އޭނާގެ ހަޔާތުގައި ކުރިމަތިވި އެންމެ ދަތި ދުވަސްތައް ކަމަށާއި، ހިތުގައި އަޅަމުން ދިޔަ ވޭނަކީ ބަޔާންކޮށްދެވޭނެ ވަރުގެ ވޭނެއް ނޫންކަމަށެވެ.
ލަކުއެސްޓާ ވަނީ އޭނާގެ އާއިލާއިން ގެއްލިފައިވާ 9 މީހުން ހޯދުމަށް، އެމީހުންގެ ފޮޓޯތައްވެސް ސޯޝަލް މީޑިއާގައި ހިއްސާކޮށްފައެވެ. އެމީހުން ފެނޭތޯ ވަގުތީ ހިޔާތަކަށްވެސް ދިޔައެވެ. އަތުގައި ނަސީބު ހިފާގޮތެއް އަދި ނުވެއެވެ. ފެމިލީ ރިސޯސް ސެންޓަރު ހުޅުވީ އޯގަސްޓް 12 ވަނަ ދުވަހުއެވެ. އެއީ ވަގުތީ ހިޔާތަކަށް ވަކިވަކީން ގޮސްގެން އާއިލާ މެންބަރުންގެ މައުލޫމާތު ހޯދުމުގެ ބަދަލުގައި، އެއްތަނަކުން ހުރިހާ ހިޔާއެއްގެ މައުލޫމާތު ހޯދުމުގެ ފުރުސަތު ފަހިކޮށްދޭ މަރުކަޒެކެވެ. އަދި ނަފްސާނީ ފަރުވާ ނުވަތަ ކައުންސިލިންގގެ ޚިދުމަތް ބޭނުންވާ މީހުންނަށް އެ ޚިދުމަތްވެސް ދޭ މަރުކަޒެކެވެ.
މިހާރު އަހަންނަށް ލިބެން އޮތް ހުރިހާ ވަސީލަތެއްގެ އެހީ ލިބޭނެ. ހުރިހާ ކަމެއް ކަށަވަރު ވަންދެން އަހަރެން މަސައްކަތް ކުރާނަން. ހުރިހާ ކަމެއްގެ ފަހަތުގަ އަހަރެން ހުންނާނަން. އާއިލާގެ ބޭނުންތައް ފުއްދައިދޭން، ވެވެން އޮތް ހުރިހާ އެހީއެއް ވާނަން. މަށަކީ ލަހައިނާގަ މަސައްކަތްކުރާ މީހެއް.ޖޫން ލަކުއެސްޓާ؛ މާއުއީގެ ރަށްވެއްސެއް
އާއިލާގެ މެންބަރުން ފެނުމުގެ އުއްމީދުގައި ލަކުއެސްޓާ ހުރިއިރު، އެޑް ގަޒްމެންއަށް ލިބުނީ އުފާވެރި ޚަބަރެކެވެ. ރިސޯސް ސެންޓަރުގެ އެހީތެރިކަން ހޯދިތާ މާ ގިނައިރެއް ނުވެ، އޭނާގެ ބޭބެއާއި ފަހަރީގެ ޚަބަރެއް ގަޒްމެންއަށް ލިބުނެވެ.
ގިނަ ދުވަސްތަކެއް ވަންދެން ލަހައިނާގައި ދިރިއުޅެމުން ދިޔަ ގަޒްމެން އަދިވެސް ހުރީ ލިބިފައިވާ ގެއްލުންތައް ފެނި، ޝޮކެއްގައެވެ. ރޯވަމުން ދިޔަ ގަދަފަދަ އަލިފާންގަނޑުތަކުން އޭނާގެ މުޅި އަވަށް އޮތީ އަނދައި އަޅިއަށް ވެފައެވެ.
އަދުގެ ހާލަތޭ؟ ވަރަށް ދަތި. ނިހާޔަތަށް ދަތި. މިކަހަލަ ކަމަކާ ކުރިމަތިލާން ޖެހިދާނެއޭ އަހަރެން ދުވަހަކުވެސް ހިތަކަށް ނާރާ. މިއާ އަޅާ ކިޔާލެވޭނެ ވަރުގެ ކާރިސާއެއް އަދި ނެތް.އެޑް ގަޒްމެން؛ ލަހައިނާގެ ރަށްވެއްސެއް
މާއުއީ ކައުންޓީގެ ޕްރޮސެކިއުޓިންގ އެޓަރނީ، އެންޑްރޫ މާރޓިން ވިދާޅުވީ، ކަހުލޫއީ ކޮމިއުނިޓީ ސެންޓަރުގައި ހުޅުވާފައިވާ ފެމިލީ ރިސޯސް ސެންޓަރުގެ ޚިދުމަތް ވަކި މުއްދަތެއް ނެތް ގޮތަށް އާންމުންނަށް ލިބެމުން ދާނެކަމަށެވެ.
ދާއިރާގެ ތަޖުރިބާކާރުންގެ ވާހަކަތަކާ އެއްގޮތަށް، ހަވާއީގެ ގަވަރުނަރު ޖޯޝް ގްރީންވެސް މިދިޔަ ހުކުރު ދުވަހު ވިދާޅުވީ، ވަރުގަދަ އަލިފާންގަނޑުތައް ރޯވެ، ފެތުރެމުން ގޮސްފައިވަނީ މޫސުމީ ނޭދެވޭ ބަދަލުތަކުގެ ސަބަބުން ކަމަށް ގަބޫލުކުރައްވާ ކަމަށެވެ. މި ހަފުތާގެ އާދީއްތަ ދުވަސް ނިމުނުއިރު، އަލިފާނުގެ ކާރިސާގައި މަރުވި މީހުންގެ އަދަދު ވަނީ 90އަށްވުރެ މައްޗަށް އަރާފައެވެ. މިއީ މިދިޔަ ގަރުނެއްހާ ދުވަހުގެ ތެރޭގައިވެސް އެމެރިކާ ދުށް، އެންމެ ގެއްލުން ދެނިވި އަލިފާނުގެ ކާރިސާއެވެ.
