"ލޯ ހުޅުވާލުމާއި އެކު، ފުރަތަމަ ވެސް ފެނުނު މަންޒަރަކީ އަނދަމުންދިޔަ ބިޔަ އަލިފާންގަނޑު"

މާލޭ ދެކުނު ފަރާތު ކުރީގެ އެއް ނަންބަރު ކުނިކޮށި ހިމެނޭ ސަރަހައްދުގައި ހުރި ނީލަން ފިހާރައިގައި ރޯވި އަލިފާންގަނޑު ރޯވެ އަނދަމުން ދިޔަ މަންޒަރު ސިފަކޮށްދެމުން އެ މަންޒަރު ފެނުނު ބިދޭސީ އެއް ކަމަށްވާ ރާޖަން ކުމާރު ބުނީ ހޯމަ ދުވަހު، އޭނާ އަށް ހޭލެވުމާއި އެކު ކުޑަ ދޮރުން ބޭރަށް ބަލާލި ވަގުތު ލިބުނީ ކުއްލި ސިހުމެއް ކަމަށެވެ. ފެނުނު ނުތަނަވަސް މަންޒަރާއި އެކު ނިދި މުޅިން ގެއްލުނުކަން އޭނާގެ ވާހަކައިން އެނގުނެވެ. އަލިފާނުގެ ހާދިސާ ހިނގި ސަރަހައްދުގައި ހުރި ރެއިންބޯ ކޮންސްޓްރަކްޝަންގެ އެކޮމޮޑޭޝަން ބްލޮކެއްގައި ދިރިއުޅެމުން ދިޔަ ބިދޭސީ އަކު އޭނާ އަށް ފެނުނު މަންޒަރުތައް ސިފަކޮށްދިނީ ބިރުވެރި މަންޒަރެއްގެ ގޮތުގައެވެ.

ބަލަބަލާ ހުއްޓާ ހާމަ އަށް ފެންނަން ހުރި އަލިފާންގަނޑު ފެތުރި، ކެކި އުތުރެމުން އައި މަންޒަރު ފެނުމާއި އެކު ދިމާވެގެން އުޅެނީ ކުޑަ ހާދިސާއެއް ނޫންކަން އޭނާ އަށް އިސާހިތަކު އެނގުނެވެ. ލިބުނު ހާސްކަން އިތުރުވީ މުޅި ތަނުގެ ވަށައިގެން ފަތުރާލާފައި އޮތް ކަޅު ދުމުގެ ނުސާފުކަމާއި އެކުގައެވެެ.

ކުމާރު ބުނި ގޮތުގައި ނިދިން ހޭލެވުމާއި އެކު އޭނާ ބެލީ އެ ބްލޮކްގައި ތިބި އެންމެންގެ ސަމާލުކަމަށް އަލިފާނުގެ ހާދިސާ ގެނެވޭތޯއެވެ. އެގޮތުން އެ ބްލޮކްގައި ދިރިއުޅެމުން ދިޔަ އެންމެންގެ ސަމާލު ކަމަށް އެ ހާދިސާ ގެނައީ "ފަޔަރ އެލާމް"ގެ އެހީގައެވެ. ފަޔަރ އެލާމް ޖެއްސުމަށް ފަހު އޭނާ ދިޔައީ އެ ބްލޮކްގައި ތިބި އެންމެންނަށް ގޮވާ، ތެދުކުރުމުގެ މަސައްކަތް ކުރަމުންނެވެ. ވެފައި ހުރި ހާސްކަން ހަނދާން ނައްތާލީ އެކުގައި މަސައްކަތް ކުރާ އެކުވެރިންގެ ސަލާމަތާއި މެދު އެވަގުތު އޭނާގެ ހިތުގައި އުފެދުނު ސުވާލުތަކާއި އެކުގައެވެ. އެ ވަގުތު އޭނާ ބެލީ ނިދާފައި ތިބި އެކުވެރިންނަށް އެހީތެރިވެވޭނެ ގޮތެއް ހޯދޭތޯއެވެ.

އެ ވަގުތު އޭނާ ދެއްކި އަވަސް ވިސްނުމާއި ކެރުން ވެގެންދިޔައީ، އޭނާ އާއި އެކު އެ ބްލޮކްގައި ދިރިއުޅެމުންދިޔަ އެންމެން ސަލާމަތުން އެ ތަނުން ނުކުތުމަށް ލިބުނު ފުރުސަތަކަށެވެ. ނިދާފައި ތިބި ގިނަ އަަދަދެއްގެ ބިދޭސީންގެ ނިދި މަހްރޫމްކޮށްލީ ފަޔަރ އެލާމްގެ ގަދަ އަޑުފައްގަނޑެވެ. އެއާއި އެކު ޖެހިގެން އައި 5 ވަރަކަށް މިނިޓަކީ އެ ބްލޮކްގައި ދިރިއުޅުނު 130 އެއްހާ މީހުން ހާސްކަމާއި ކަންބޮޑުވުމުގައި ހޭދަކުރި ވަގުތުތަކެކެވެ. އެ ވަގުތަކީ ފަތިސް ވަގުތަށް ވުމާއި އެކު ގިނަ މަސައްކަތްތެރިން ތިބީ އެވަގުތު ނިދާފައެވެ. އޭރު ގިނަ މީހުންނަށް ވެގެން އުޅޭ ގޮތް ސާފެއް ނުވެއެވެ. އެހެންނަމަވެސް ވެެގެން އުޅޭ ގޮތް ސާފުކޮށްދޭނެ ވަގުތެއް އޭރަކު ނެތެވެ.

އެ ބިދޭސީން ކިޔާދިން ގޮތުގައި ކޮންމެ މީހަކު ވެސް ކޮންމެހެން ބޭނުންވާ ޒަރޫރީ އެއްޗެހި އަތު ޖެހުނު މިންވަރަކުން ދަބަހަށް އަޅައިގެން އަވަހަށް ބެލީ އެ އެކޮމޮޑޭޝަން ބްލޮކް ހުސްކުރެވޭތޯއެވެ. އެންމެން ސަލާމަތުން ބޭރަށް ނުކުމެވުނު ނަމަވެސް ހާސްކަން ކުޑަވާ ގޮތެއް ނުވިއެވެ. އެ މަންޒަރު ދުށް އިތުރު ބިދޭސީ އަކު "ރާއްޖެ އެމްވީ" އަށް ކިޔާދިން ގޮތުގައި އަލިފާންފަނޑު ރޯވެ މައްޗަށް އަރަމުން ދިޔަ އިރު ބާރު އަޑުފައްގަނޑެއް އިވުނެވެ.

މިއީ އަލިފާނުގެ ހާދިސާގައި ހާލުގައި ޖެހުނު މީހުންގެ ތެރޭގައި ހިމެނޭ ރެއިންބޯ ކޮންސްޓްރަކްޝަންގެ 133 ލޭބަރުންގެ ވާހަކައެވެ. "ރާއްޖެ އެމްވީ" އާއި ވާހަކަދެއްކި ބައެއް ބިދޭސީން ވަނީ އެ މީހުންނަށް އެހާ އަވަަހަށް އެކޮމޮޑޭޝަން ބްލޮކުން ނުކުމެވުނީ ރާޖަން ކުމާރުގެ ހިއްވަރުގެ ސަބަބުން ކަމަށް ބުނެފައެވެ. އެ މީހުން ވަނީ ރާޖަން ހުރިހާ އެންމެންނަށް ގޮވާ، މީހުން ހޭލައްވަން އުޅުނު ގޮތް ސިފަކޮށްދީފައެވެ.

ރެއިންބޯގެ ލޭބަރުން އެ ކުންފުނީގެ އެހެން އެކޮމޮޑޭޝަން ބްލޮކްތަކަށް ބަދަލުކޮށްފައިވާކަމަށް އެ ކުންފުންޏާއި ހަވާލާދީ އެންޑީއެމްއޭ އިން ބުނެއެވެ. އަދި ކުންފުނީގެ ފަރާތުން ވަނީ އެ ފަރާތްތަކަށް ބޭނުންވާ އެހީތެރިކަން ވަގުތުން ފޯރުކޮށްދީފައެވެ.

އެމްއެންޑީއެފް އިން ބުނީ ނީލަން ފިހާރާގައި އަލިފާނުގެ ހާދިސާއެއް ހިނގީ ފަތިހު 5:43 އެހާއިރު ކަމަށެވެ. މީގެ އިތުރުން ރޯވި އަލިފާންގަނޑު ކޮންޓްރޯލްކުރެވުނީ 08:30 އެހާއިރުކަމަސް ބުނެފައި ވެއެވެ. މި ހާދިސާގައި ސިޓީ ކައުންސިލްގެ އެކޮމޮޑޭޝަން ބްލޮކެއްގައި ރޯވެ ބޭނުން ނުކުރެވޭ ވަރަށް އަނދާފައި ވާއިރު އެ ތަނަކީ 160 އަށް ވުރެ ގިނަ ބިދޭސީން ދިރިއުޅުނު ތަނެކެވެ. މިހާދިސާގައި އެއްވެސް މީހަކަށް އަނިޔާވެފައި ނުވާކަމަށް ކަމާއި ބެހޭ އިދާރާތަކުން ބުނެއެވެ.

މިފަދަ ނުރައްކާތެރި ޙާދިސާ އެއް ހިނގައި ދިޔަ އިރު އަނެއްކާވެސް ދައްކަން އޮތީ އެއް ވާހަކައެކެވެ، ހާދިސާ ހިނގި ނީލަން ފިހާރަ ހުރީ މިފަދަ ހާދިސާ އެއް ހިނގައިފި ހާލަތެއްގައި ނުރައްކާ ބޮޑުވާ ގޮތަށް ކަމެވެ. މިފަދަ ކަންކަން އެހާ ސީރިއަސްކޮން ނުނަގާ، އާއްމު ދިރިއުޅުމުގައި އުޅެނިކޮށް ކޮންމެ ފަހަރަކު ދިވެހިން ނިދިން ހޭލައްވާލަނީ މިފަދަ ނުރައްކާތެރި ހާދިސާތަކެވެ. އެހެންނަމަވެސް ހިތާމައަކީ ސަލާމަތާއި ރައްކާތެރިކަމަށް ދުރާލާ ފިޔަވަޅު އަޅާ، މިފަދަ ހާދިސާތަކުން ފިލާވަޅު ލިބިގަންނަ މަންޒަރު ނުފެންނަކަމެވެ. ދެރަކަމަކީ ދެ ތިން ދުވަހަކު މިވާހަކަ މީސްމީޑިއާގައި ކުރާ ސައްލާ އަކަށް ފަހު އެ ވާހަކަ އޮބިގެންދާ ކަމެވެ.