އިންޑިއާ ސަރުކާރުން ހަނޑޫ އެކްސްޕޯޓް މަޑުޖައްސާލުމާއެކު، 12 އަހަރު ތެރޭ ނުވާ މިންވަރަށް އަގުތައް އުފުލިއްޖެ

ދުނިޔޭގެ އިރުން ހުޅަނގަށް އަދި އުތުރުން ދެކުނަށް ބަލާއިރުއިރުވެސް ހަނޑުލަކީ 3.5 ބިލިއަން މީހުންގެ މައިގަނޑު ކޭމުގެ އެންމެ މުހިންމު ހިއްސާއެވެ. އެއީ ދުނިޔޭގެ އާބާދީގެ ގާތްގަނޑަކަށް 2 ބައިކުޅަ 1 ބައި ހާ މީހުންނެވެ. އޭޝިއާއާއި ލެޓިން އެމެރިކާ އަދި އެފްރިކާގެ ބައެއް ހިސާބުތަކުގެ މީހުންނަށް ހަނޑުލަކީ ވަކިން ޚާއްޞަ އެއްޗެކެވެ.

ދުނިޔޭގެ ބާޒާރަށް އެކްސްޕޯޓް ކުރާ ހަނޑުލަށް ބަލާއިރު އެއް ޤައުމެއްގެ އަތުގައި އެންމެ ބޮޑު ކޮންޓްރޯލެއް އޮންނަނީ އަވަށްޓެރި އިންޑިއާގެ އަތުގައެވެ. ބައިނަލްއަޤުވާމީ ބާޒާރަށް އެކްސްޕޯޓް ކުރާ ހަނޑޫ ޝިޕްމަންޓްތަކުގެ 40 ޕަސެންޓަށް ވުރެ ބޮޑުބައެއް ހިއްސާ ކުރަނީ އިންޑިއާ އެވެ. ނަމަވެސް މިއަދު ދުނިޔެއަށް ކުރިމަތިލާން ޖެހިފައި ވާ މޫސުމީ ނޭދެވޭ ބަދަލުތަކުގެ ގަދަ އޮއެވަރުން އިންޑިއާއަށްވެސް ސަލާމަތް ނުވެވި، ހަނޑަލުގެ އުފެއްދުންތެރިކަން ހީނަރުވެ، އެ ޤައުމުން ހަނޑު އެކްސްޕޯޓް ކުރުން ވަނީ މަޑުޖައްސާލާފައެވެ.

އިންޑިއާގެ ބާޒާރުތަކުގައި ހަނޑުލުގެ ސަޕްލައި ތިޔާގިކޮށް އަގުތައް ކޮންޓްރޯލް ކުރުމަށް އެޅި މި ފިޔަވަޅުގެ ނޭދެވޭ އަސަރު، ބައިނަލްއަޤުވާމީ ބާޒާރުތަކުން މިހާރު ވަނީ ފެންނަން ފަށާފައެވެ. ވަކި ފެންވަރެއް ގެ ހަނޑޫ އެކްސްޕޯޓް ކުރުން މަނާ ކުރުމަށް އިންޑިއާ ސަރުކާރުން ނިންމި ނިންމުމާއެކު، މިދިޔަ 12 އަހަރު ދުވަހުގެ ތެރޭގައި ނުދާހާ މައްޗަށް، ދުނިޔޭގެ ބާޒާރުގައި ހަނޑުލުގެ އަގުތައް ވަނީ އުފުލިފައެވެ. ބާސްމަތީ ނޫން ދެން ހުރި ހުރިހާ ބާވަތެއްގެ ހުދު ހަނޑޫ އެކްސްޕޯޓް ކުރުން މަނާކޮށް، އިންޑިއާ ސަރުކާރުން ޖުލައި 20 ވަނަ ދުވަހު ނެރުނު އަމުރާއެކު، ދުނިޔޭގެ ކާބޯތަކެއްޗާއި ދަނޑުވެރިކަމާ ބެހޭ އިދާރާ (އެފްއޭއޯ)ގެ އޯލް ރައިސް ޕްރައިޒް އިންޑެކްސް ވަނީ 2.8 ޕަސެންޓަށް އުފުލިފައެވެ. މިއީ މިދިޔަ 12 ވަރަކަށް އަހަރު ދުވަހުގެ ތެރޭގައި ރެކޯޑް ކުރެވިފައި ނުވާހާ މަތީ މިންވަރެކެވެ.

އިންޑިއާގެ ވެރިކަން ކުރާ ނިއުދިއްލީގައި ހަނޑުލުގެ ވިޔަފާރި ކުރާ މީހުންގެ ވާހަކަތައް ހުރި ގޮތަށް ބަލާއިރު، އާންމު ގޮތެއްގައި ޖޫންއިން ސެޕްޓެމްބަރު މަހުގެ ނިޔަލަށް ދެމިގެންދާ ވިއްސާރަ މޫސުމުގެ ކުރިން، އިންޑިއާގެ ބާޒާރުތަކުގައި ބާސްމަތީ ނޫން ހުދު ހަނޑުލުގެ ރީޓެއިލް އަގު އުޅުނީ ކިލޯއެއް 15 ރުޕީޒްއާއި 65 ރުޕީޒްއާ ދެމެދުގައެވެ. މޫސުމީ ވިއްސާރައިގެ ދުވަސްވަރަށް، ކޮންމެ ކިލޯއަކުން އެވަރޭޖުކޮށް 4 ރުޕީޒްއާއި 5 ރުޕީޒްއާ ދެމެދުގެ މިންވަރެއް ވަނީ ބޮޑުވެފައެވެ.

ހަނޑޫ އެކްސްޕޯޓް ކުރުން މަނާކޮށް، ގުދަނުގައި ހުރި ބައެއް ޝިޕްމަންޓަށް ބާޒާރަށް ނެރުމާއެކު، އިންޑިއާގެ ބާޒާރުތަކުގައި ހަނޑުލުގެ އަގުތައް މިހާރު ވަނީ ކޮންޓްރޯލް ވާން ފަށާފައެވެ.

2007 ވަނަ އަހަރާއި 2008 ވަނަ އަހަރާ ދެމެދުވެސް އިންޑިއާއިން ވަނީ ހަނޑޫ އެކްސްޕޯޓް ކުރުން މަޑުޖައްސާލާފައެވެ. އެފަހަރު ދުނިޔޭގެ ބާޒާރުތަކުގެ އަގުތަކަށް އައި ބަދަލަށް ބަލާއިރު، 6 މަހެއްހާ ދުވަހުގެ ތެރޭގައި، ހަނޑުލުގެ އަގު 2 ގުނަ މައްޗަށް އަރައިގެންދިޔައެވެ.

ބައިނަލްއަޤުވާމީ މާލީ އިދާރާ (އައިއެމްއެފް)އިން ދަނީ ހަނޑޫ އެކްސްޕޯޓް ކުރުމާ ދެކޮޅަށް އިންޑިއާގެ ސަރުކާރުން އަޅަމުން ދާ ފިޔަވަޅުތައް އުވާލުމަށް ހިތްވަރު ދެމުންނެވެ. ހަނޑޫ އެކްސްޕޯޓް ކުރުމަށް އިންޑިއާ ސަރުކާރުން ހުރަސް އަޅަމުން ދާނަމަ، ދުނިޔޭގެ އެހެން ހިސާބުތަކުގައިވެސް ހަނޑުލުގެ އަގަށް ނޭދެވޭ އަސަރުތައް ފޯރާ، ރައްދުގައި ފިޔަވަޅުތަކެއް އެޅުން އެކަށީގެންވާ ކަމުގެ އިންޒާރުވެސް އައިއެމްއެފްއިން ވަނީ ދީފައެވެ.