އޭއެފްސީ ކަޕަށް ތައްޔާރުވުމަށް މާޒިޔާ ސްޕޯޓްސް އެންޑް ރެކްރިއޭޝަނުން ބިދޭސީ އިތުރު ކުޅުންތެރިއެއްގެ ސޮއިހޯދައިފިއެވެ.
އާދިއްތަ ދުވަހު މާޒިޔާއަށް ސޮއިކޮށްފައިވަނީ ސާބިއާގެ މިޑްފީލްޑަރެއް ކަމަށްވާ ޖޯސިކް ބްރެނިމިރް އެވެ. އުމުރުން 29 އަހަރުގެ މި ކުޅުންތެރިޔާއަކީ ސާބިއާގެ ފުރަތަމަ ޑިވިޝަނާއި މޮންޓެނެގްރޯގައި ކުޅެފައިވާ ތަޖުރިބާކާރު ކުޅުންތެރިއެކެވެ. މާޒިޔާއަށް އޭނާ ސޮއިކުރީ މި ސީޒަނުގެ ނިޔަލަށެވެ. ޑިފެންސިވް މިޑްފިލްޑަށް ކުޅޭ މި ކުޅުންތެރިޔާއަކީ ސެންޓަރ ބެކަށްވެސް ކުޅެވޭ ކުޅުންތެރިއެކެވެ.
ޔުނައިޓެޑް ވިކްޓްރީ (ޔޫވީ) އަށް ކުޅެމުން އައި ގޯލް ކީޕަރު އަލީ ނާޖިހުވެސް ވަނީ ލޯނު އެއްބަސްވުމެއްގެ ދަށުން މާޒިޔާ އާ ގުޅިފައެވެ. ޖޯސިކް ގެނައުމާއެކު، މާޒިޔާ ވަނީ ޓީމުގައި ބިދޭސީ ހަ ކުޅުންތެރިން ހަމަކޮށްފައެވެ. އެއީ މީގެކުރިންވެސް މާޒިޔާއަށް ކުޅެމުން އައި މިސްރުގެ މިޑްފީލްޑަރު ޚަލީލް ޖަމާލާއި ލިތުއޭނިއާގެ ޑިފެންޑަރު އެޑްގަރަސް ޒާސްކިސްގެ އިތުރުން، ދާދި ފަހުން ގެނައި ސާބިއާގެ ފޯވާޑް ވޮޖްސްލޭވް ބަލަބަނޮވިޗް އާއި ގާނާގެ މިޑްފީލްޑަރު ރެގަން އޮބެންގްގެ އިތުރުން ކްރޮއޭޝިއާގެ ޑިފެންޑަރު ސެބެސްޓިއަން އަންޓިޗް އެވެ. އީގަލްސްއާ ދެކޮޅަށް ކުޅުނު މެޗުގެ ފުރަތަމަ 11 ގައި ސެބެސްޓިއަން އާއި ބަލަބަނޮވިޗް ހިމަނަފައިވެއެވެ. އަދި ބަދަލު ކުޅުންތެރިއެއްގެ ގޮތުގައި ރެގަންއަށް ވަނީ ފުރުސަތު ދީފައެވެ.
އޭއެފްސީ ކަޕުގައި މާޒިޔާގެ އިތުރުން ރާއްޖެއިން ވާދަކުރަނީ ކްލަބް އީގަލްސްއެވެ. ޕްރިލިމިނަރީ ބުރުގައި ބުދަ ދުވަހު އީގަލްސް ނިކުންނާނީ ބަންގަލްދޭޝްގެ އަބަހާނީ ލިމިޓެޑާ ދެކޮޅަށެވެ.
