ނ.އަތޮޅަށްޓަކައި ކުރީގެ ރައީސް އަބްދުﷲ ޔާމީން ހެޔޮ ހިތުން ކޮށްދެއްވި އެއްވެސް ކަމެއް ނެތް ކަމަށް އެމްޑީއޭގެ ނާއިބު ލީޑަރު އަދި ކެނދިކުޅުދޫ ދާއިރާގެ ކުރީގެ މެންބަރު އަލީ މައުރޫފް ވިދާޅުވެއްޖެއެވެ.
އޭނާ އެފަދައިން ވިދާޅުވީ ނ.ލަންދޫގައި ބޭއްވި ބަނދަރު ބައްދަލުވުމުގައި ވާހަކަފުޅު ދައްކަވަމުންނެވެ.
މައުރޫފް ވިދާޅުވީ ކުރީގެ ރައީސް ޔާމީނުގެ ސަރުކާރުގައި ނ.އަތޮޅަށް ކޮށްދިން ކޮންމެ ކަމެއް ކޮށްދީފައިވަނީ މަޖުބޫރުކޮށްގެން ކަަމަށެވެ. ނަމަވެސް އެކަމުގެ އިތުރު ތަފްސީލެއް ހިއްސާކުރައްވާފައެއް ނުވެއެވެ. އަދި ނ.އަތޮޅުގައި ޕީޕިއެމްގެ "އައްޗި" ކުލަ އޮންނަން ބޭނުން ނުވާ ކަމަށް ވިދާޅުވެ އިދިކޮޅު ޕީއެންސީގެ ރިޔާސީ ކެނޑިޑޭޓް ޑރ.މުހައްމަދު މުއިއްޒު އަށް އޭނާ ވަނީ ވަރަށް ބޮޑަށް ފާޑު ވިދާޅުވެފައެވެ. އެގޮތުން ބާރު ނުފޯރާ ކެނޑިޑޭޓެއްގެ ގޮތުގައި، މީހަކު ބުނާ އެއްޗެއް ބުނުމަށް ނ.އަތޮޅަށް ވަޑައިނުގަތުމަށް އޭނާ ވަނީ މުއިއްޒު އަށް ގޮވާލައްވާފައެވެ. އިދިކޮޅު މީހުން ކެމްޕެއިންގައި އުޅޭތަން ނުފެންނަ ކަަމަށާއި ނ.އަތޮޅުގައި ވެސް އޮތީ ކޯލިޝަންގެ ކުލަތައް ކަމަށް ވެސް އޭނާ ވަނީ ވިދާޅުވެފައެވެ.
މީގެ އިތުރުން މައުރޫފް ވަނީ ރައީސް އިބްރާހީމް މުހައްމަދު ޞާލިހު އަށް ވަރަށް ބޮޑަށް ތައުރީފްކުރައްވާފައެވެ. ނ.އަތޮޅުގެ ތަރަައްްޤީއާ މެދު ރައީސް ގެންގުޅުއްވާ ވިސްނުން ރަނގަޅުކަމަށް ފާހަގަކުރައްވާ މައުރޫފް ވަނީ ރައީސް އާއި އެކުގައި ނ.އަތޮޅުގެ ރައްޔިތުން ތިބި ކަމަށް ވިދާޅުވެފައެވެ. އަދި ނ.އަތޮޅުގެ ރައްޔިތުންގެ ފަރާތުން އެދެނީ ނ.އަތޮޅުގެ ރައްޔިތުންގެ ހިތްތައް ކޯލިޝަންގެ ކުލަތަކުން ޖަރީކޮށް އެއްބުރުން އިންތިޚާބު ކާމިޔާބުކުރުމަށް ކަަމަށް އޭނާ ވިދާޅުވިއެވެ. ނ.އަތޮޅަށް ގެނެވުނު ތަރައްްޤީ އެއް ވިއްޔާ ލިބުނީ އެމްޑީޕީ އާއި އެމްޑީއޭގެ ފަރާތުން ކަމަށާއި އެ ނޫން ޕާޓީއަކުން ކުރި ކަމެއް ނުއޮންނާނެ ކަަމަށް އޭނާ ވިދާޅުވިއެވެ. ނ.އަތޮޅުގެ ރައްޔިތުންނާ މެދު ޝައްކު ނުކުރައްވާ ކަމަށް ވެސް މައުރޫފް ވަނީ ވިދާޅުވެފައެވެ.
