ދެ ވަނަ މެޗުގައި ވެސް ލަންކާ އިން ރާއްޖެ ބަލިކޮށްފި

ރަޙުމަތްތެރިކަމުގެ ދެ ވަނަ މެޗުގައި ވެސް ސްރީލަންކާ އިން ދިވެހިރާއްޖެ ބަލިކޮށްފި އެވެ.

ރާއްޖޭގެ ޤައުމީ އަންހެން ޓީމާ ދެކޮޅަށް ސްރީލަންކާ އިން އާދިއްތަ ދުވަހުގެ ރޭ ކުޅުނު މެޗު ކާމިޔާބު ކުރީ ތިން ސެޓު އެއް ސެޓުންނެވެ. މެޗުގެ ފުރަތަމަ ސެޓު ލަންކާ އިން ކާމިޔާބު ކުރީ 25-17 އިންނެވެ. ނަމަވެސް ޖެހިގެން އައި ދެ ވަނަ ސެޓުގައި ރާއްޖެ އިން ވަނީ ލަންކާއާ ދެކޮޅަށް ރަނގަޅު ފައިޓެއް ދީފަ އެވެ. ރާއްޖެ އިން ދެ ވަނަ ސެޓު ކާމިޔާބު ކުރީ 24-26 އިންނެވެ. ނަމަވެސް ޖެހިގެން ދެން ކުޅުނު ދެ ވަނަ ސެޓުގައި ވެސް ލަންކާ އިން ވަނީ ރަނގަޅު ލީޑެއްގައި އޮވެ ސެޓުތައް ކާމިޔާބުކޮށްފަ އެވެ. ތިން ވަނަ ސެޓު ލަންކާ އިން ކާމިޔާބު ކުރީ 25-17 އިންނެވެ. އަދި ހަތަރު ވަނަ ސެޓު ކާމިޔާބު ކުރީ 25-14 އިންނެވެ.

ރާއްޖެ އިން ލަންކާއާ ދެކޮޅަށް ކުޅުނު ފުރަތަމަ މެޗުން ބަލިވީ ސީދާ ތިން ސެޓުންނެވެ. އެ މެޗުގެ ދެ ވަނަ ސެޓުގައި ރާއްޖޭގެ ޒުވާން ކުޅުންތެރިޔާ ނަރީމާ އިދުރީސް (ނަންނި)ގެ ކަކުލަށް ލިބުނު އަނިޔާގެ ސަބަނުން ވަނީ ބަދަލުކޮށްފަ އެވެ. އެ އަނިޔާގެ ސަބަބުން ދެ ވަނަ މެޗުގައި ނަންނި ނުކުޅެ އެވެ.

މިއީ މި މަހުގެ ފަހުކޮޅު މަޑަގަސްކަރައިގައި ފެށުމަށް ހަމަޖެހައިފައިވާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ތައްޔާރުވުމުގެ ގޮތުން ޤައުމީ ޓީމުން ކުޅެމުން އަންނަ މެޗުތަކެކެވެ. މި މެޗުތަކުގެ ކުރިން ޤައުމީ ޓީމުތައް ވަނީ ތައިލެންޑުގައި ފަރިތަކުރުންތައް ކުރިއަށް ގެންގޮސްފަ އެވެ.