ވާދަވެރި އަލް ހިލާލް ބަލިކޮށް، އަލް ނަސްރުން ޢަރަބް ކުލަބު ޗެމްޕިއަންސް ކަޕް ކާމިޔާބުކޮށްފި އެވެ.

ހޮނިހިރު ދުވަހުގެ ރޭ ކުޅުނު ފައިނަލް މެޗު އަލް ނަސްރުން ކާމިޔާބު ކުރީ 2-1 އިންނެވެ. މެޗުގައި އެ ޓީމުގެ ދެ ލަނޑު ވެސް ޖެހީ ކެޕްޓަން ރޮނާލްޑޯ އެވެ. މެޗުގައި ފުރަތަމަ ލަނޑު ޖަހައި ކުރި ހޯދީ އަލް ހިލާލުންނެވެ. އޭގެ ކުރިން ދެ ޓީމަށް ވެސް ވަނީ ލަނޑު ޖަހާނެ ރަނގަޅު ފުރުސަތުތަކެއް ލިބި ބޭކާރުވެފަ އެވެ. އަލް ހިލާލުން މެޗުގައި ލީޑު ނެގީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ހަ ވަނަ މިނެޓުގައި އެ ޓީމަށް ލީޑު ނަގައިދިނީ މިކޭލް އެވެ. އޭގެ ފަހުން މެޗުގެ 74 ވަނަ މިނެޓުގައި އަލް ނަސްރަށް ނަތީޖާ ހަމަހަމަ ކޮށްދިނީ ރޮނާލްޑޯ އެވެ. މެޗުން އަލް ނަސްރު މޮޅުކޮށްދިން ލަނޑު ރޮނާލްޑޯ ޖެހީ މެޗުގެ ފުރިހަމަ ވަގުތު ހަމަވެ، އިތުރަށް ކުޅުނު ދެ ހާފުގެ ތެރެއިން ފުރަތަމަ ހާފުގަ އެވެ.

މުބާރާތުގެ އެންމެ ގިނަ ލަނޑު ޖެހި ކުޅުންތެރިޔަކަށް ރޮނާލްޑޯ ހޮވުނުއިރު، އެންމެ މޮޅު ގޯލް ކީޕަރަކީ އެ ޓީމުގެ ނަވާފް އަލަޤިދީ އެވެ. މިއީ ޕޯޗުގަލްގެ ކެޕްޓަންކަން ވެސް ކުރަމުން އަންނަ ރޮނާާލްޑޯ އަލް ނަސްރަށް ބަދަލުވެ، އެ ކުލަބާއެކު ހޯދި ފުރަތަމަ ތައްޓެވެ. ރޮނާލްޑޯ ވަނީ މިހާތަނަށް ޖުމުލަ އަލް ނަސްރަށް ކުޅެދިން 25 މެޗުގައި 20 ލަނޑު ޖަހައިފަ އެވެ.

އަލް ނަސްރުން ރޮނާލްޑޯގެ ސޮއި ހޯދުމާއެކު، ސައުދީގެ ކުލަބުތަކުން އަންނަނީ ޔޫރަޕުގެ ގިނަ ކުޅުންތެރިން ހޯދަމުންނެވެ. ރޮނާލްޑޯ އަށް ފަހު، ކުރިއަށް އޮތް ސީޒަނަށް އަލް ނަސްރުން ވެސް ވަނީ ވަރުގަދަ ކުޅުންތެރިންގެ ސޮއި ހޯދައިފަ އެވެ. އޭގެ ތެރޭގައި ބަޔާން މިއުނިކަށް ކުޅެމުން އައި ސެނެގާލްގެ ސަޑިއޯ މާނޭގެ އިތުރުން ސެކޯ ފޮފާނާ، މާސެލޯ ބްރޮޒޮވިޗް އަދި އެލެކްސް ޓެލާސް ފަދަ ކުޅުންތެރިން ހިމެނެ އެވެ.