ވޯޓު ފޮށި ބެހެއްޓުމަށް ކަނޑައެޅިފައިވާ އަދަދަށް މީހުން ހަމަނުވެގެން، ރަޖިސްޓްރީ ބާތިލުވާ މީހުން އަލުން ރަޖިސްޓްރީވުމަށް ހުޅުވާލައިފި
އޮގަސްޓު 13ގެ ހެނދުނު 08:30ން ފެށިގެން އޮގަސްޓު 14ގެ މެންދުރު ފަހު 04:00ގެ ނިޔަލަށް ވަނީ ރަޖިސްޓްރީކުރުމުގެ ފުރުސަތު ހުޅުވާލާފައި
އިލެކްޝަންސް ކޮމިޝަން
ވޯޓުލުމަށް ރަޖިސްޓްރީކުރި ނަމަވެސް، ވޯޓު ފޮށި ބެހެއްޓުމަށް ކަނޑައެޅިފައިވާ އަދަދަށް މީހުން ހަމަނުވެގެން، ރަޖިސްޓްރީ ބާތިލުވާ މީހުން އަލުން ރަޖިސްޓްރީވުމަށް، އިލެކްޝަންސް ކޮމިޝަން (އީސީ)ން ހުޅުވާލައިފިއެވެ.
އީސީން ބުނީ، ރިސޯޓުތަކާއި، ސިނާއީ މަސައްކަތްކުރާ ތަންތަނާއި، ރާއްޖެއިން ބޭރުގައި ވޯޓު ލުމަށްޓަކައި ވޯޓުފޮށި ބެހެއްޓުމަށް ހަމަޖެހިފައިވާ ވޯޓު ފޮށިތަކަށް ރަޖިސްޓްރީވެފައިވާ ފަރާތްތަކުގެ އަދަދު، ކަނޑައެޅިފައިވާ އަދަދަށްވުރެ މަދުވުމުން އެ ވޯޓު ފޮށިތައް ނުބެހެއްޓުމަށް ވަނީ ނިންމާފައި ކަމަށެވެ. އެހެންކަމުން މި ފޮށިތަކުގައި ރަޖިސްޓްރީކޮށްފައިވާ މީހުން، މިހާރު ފޮށި ބެހެއްޓުމަށް އިއުލާނު ކުރެވި، ފޮށި ބެހެއްޓޭނެކަން ކަށަވަރުވެފައިވާ ތަންތަނަށް ރަޖިސްޓަރީ ކުރުމުގެ ފުރުސަތު އޮގަސްޓު 13ވާ އާދީއްތަ ދުވަހުގެ ހެނދުނު 08:30ން ފެށިގެން އޮގަސްޓު 14ވާ ހޯމަ ދުވަހުގެ މެންދުރު ފަހު 04:00ގެ ނިޔަލަށް ހުޅުވާލާފައިވާކަމަށެވެ.
ރާއްޖޭގައި ބަހައްޓާފައި ހުރި 19 ފޮއްޓަކާއި ރާއްޖެއިން ބޭރުގައި ބަހައްޓާފައި ހުރި 4 ފޮއްޓަކަށް ރަޖިސްޓްރީވި މީހުންނަށް އަލުން ރީރަޖިސްޓްރީވުމުގެ ފުރުސަތު ވަނީ ހުޅުވާލާފައެވެ.
މި މުއްދަތުގެ ތެރޭގައި ރަޖިސްޓްރީ ވެފައިވާ ތަން ބަދަލުކުރެވޭނީ، މި އިއުލާނުގައިވާ ފޮށިތަކަށް ވޯޓު ލުމަށް ރަޖިސްޓަރީކޮށްފައިވާ ފަރާތްތަކަށް އެކަންޏެވެ.
ރަޖިސްޓްރީވުމަށް އެދި ހުށަހަޅާނީ އޮންލައިންކޮށް، އިލެކްޝަންސް ކޮމިޝަންގެ ރީ-ރަޖިސްޓްރޭޝަން ޕޯޓަލް މެދުވެރިކޮށް ނުވަތަ މާލެ ފިޔަވައި މީހުން ދިރިއުޅޭ އެހެން ހުރިހާ ރަށަކުން އެރަށެއްގެ ކައުންސިލް އިދާރާއިންނާއި އައްޑޫ ސިޓީ އަދި ފުވައްމުލަކު ސިޓީގެ އަވަށްތަކުގެ އޮފީސްތަކުންނާއި ކުޅުދުއްފުށި ސިޓީގެ ކައުންސިލް އިދާރާއިންނެވެ. މާލޭގައިނަމަ، އިންތިޚާބާބެހޭ މަރުކަޒު (ދަރުބާރުގެ)އިންނެވެ. އަދި ރީ-ރަޖިސްޓަރީވުމަށް އެދޭ ފޯމު ކޮމިޝަންގެ ވެބްސައިޓުންނާއި ކައުންސިލް އިދާރާތަކުން ލިބެން ހުންނާނެއެވެ.
ރާއްޖެއިންބޭރުގައިނަމަ ފޯމު ދޫކުރުމާއި ބަލައިގަތުމުގެ އިންތިޒާމް ހަމަޖެހިފައިވަނީ ރާއްޖެއިން ބޭރު ގައުމުތަކުގައި ހުންނަ ދިވެހިރާއްޖޭގެ ކޮންސިއުލޭޓް އޮފިސްތަކުންނާއި ދިވެހިރާއްޖޭގެ ހައިކޮމިޝަންތަކުންނާއި ދިވެހިރާއްޖޭގެ އެމްބަސީ ތަކުން، ކޮންމެ ދުވަހެއްގެ ހެނދުނު އެގައުމެއްގެ ގަޑިން 10:00ން ހަވީރު 03:00ށެވެ.
