އާސެނަލްގެ މާކީނިއޯސް ނަންޓޭސް އަށް

އާސެނަލަށް ކުޅެމުން އަަންނަ ބްރެޒިލްގެ ޒުވާން ކުޅުންތެރިޔާ، މާކަސް މާކީނިއޯސް ލޯނު އެއްބަސްވުމެއްގެ ދަށުން ފްރާންސް ލީގުގެ ނަންޓޭސް އަށް ބަދަލުވެއްޖެ އެވެ.

އުމުރުން 20 އަހަރުގެ ކުޅުންތެރިޔާ އެންމެ ފުރަތަމަ އާސެނަލާ ގުޅުނީ 2022 ވަނަ އަހަރު އެވެ. އެ ކުލަބާއެކު އޭނާ ވަނީ ދިގު މުއްދަތެއްގެ އެއްބަސްވުމެއްގައި ސޮއިކޮށްފަ އެވެ. އޭގެ ފަހުން އާސެނަލަށް ހަ މެޗު ކުޅެދީ އެއް ލަނޑު ޖެހުމަށްފަހު، މިއަހަރުގެ ޖަނަވަރީ މަހު ވަނީ ލޯނު އެއްބަސްވުމެއްގެ ދަށުން ނޯވިޗް ސިޓީ އަށް ބަދަލުވެފަ އެވެ. އެ ކުލަބުގައި ހޭދަ ކުރި މުއްދަތުގައި އޭނާ ވަނީ 11 މެޗު ކުޅެ، އެއް ލަނޑު ޖަހައިފަ އެވެ. ނަމަވެސް އައު ސީޒަނަށް އޭނާ ވަނީ ލޯނު އެއްބަސްވުމެއްގެ ދަށުން ނަންޓޭސް އަށް ބަދަލުވެފަ އެވެ. އެ ކުލަބުގައި މާކީނިއޯސް ބޭނުން ކުރާނީ 10 ނަންބަރު ޖާޒީ އެވެ. އައު ސީޒަންގެ ނިޔަލަށް އޭނާ އެ ކުލަބުގައި މަޑުކުރާނެ ކަމަށް ރިޕޯޓުތައް ބުނެ އެވެ.

ބްރެޒިލްގެ ޒުވާން އުމުރުފުރާތަކުގެ ޤައުމީ ޓީމަށް ކުޅެފައިވާ މާކީނިއޯސް އޭނާގެ ސީނިއާ ކެރިއަރު ފެށީ އެ ޤައުމުގެ ސައު ޕައުލޯ އިންނެވެ. އާސެނަލުން އޭނާ ހޯދީ ސައު ޕައުލޯގައި އޭނާ ދެއްކި މޮޅު ކުޅުމުގެ ސަބަބުންނެވެ.