އެމްއެންޑީއެފްގެ ޚާއްސަ އަސްކަރީ ތަމްރީނުތަކެއް ގިރިފުށީގައި މާދަމާ ކުރިއަށް ގެންދަނީ

މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް)ގެ ޚާއްސަ އަސްކަރީ ތަމްރީނުތަކެއް ކ.ގިރިފުށީގައި ހޮނިހިރު ދުވަހު ކުރިއަށް ގެންދާނެ ކަމަށް ޑިފެންސް މިނިސްޓްރީން ބުނެފިއެވެ.

ޑިފެންސް މިނިސްޓްރީން ބުނީ އެމްއެންޑީއެފުން ކުރިއަށްގެންދާ އަސްކަރީ ތަމްރީނުތަކެއް 2023 އޮގަސްޓް 12 އަދި 13 ވަނަ ދުވަހުގެ 18:00 އިން 23:59 އަށް ގިރިފުށީގައި ކުރިއަށްގެންދާ ކަމަށެވެ.

މިނިސްޓްރީން ބުނީ މި ތަމްރީނުތަކުގައި ބޭނުންކުރާ ބަޑީގެ ވަޒަން ދަތުރުކުރާނީ ގިރިފުށީގެ ފަޔަރިން ރޭންޖްއިން ހުޅަނގު ދެކުނު ފަރާތުން 4500 މީޓަރ ދުރުމިނަށް ކަމަށެވެ. އަދި ވަޒަން ދަތުރުކުރާނެ އުސްމިނަކީ 200 މީޓަރު ކަމަށެވެ. އަދި މިކަމަށް ސަމާލުވުމަށް ވަނީ އަންގާފައެވެ.

އެމްއެންޑީއެފުން ދޭތެރެ ދޭތެރެއިން މާލެސަރަހައްދުގައި ޚާއްސަ ތަމްރީންތައް ކުރިއަށް ގެންދެއެވެ. އެހެންކަމުން ޓްރާންސްޕޯޓު މިނިސްޓްރީން ވެސް އެސަރަހައްދުތަކުން ދަތުރުކުރާ ފަރާތްތަކުން ސަމާލުވުމަށް އަންގައެވެ. މިފަހުން ވެސް ޅ.މާފިލާފުށީގައި އަސްކަރީ ތަމްރީންތަކެއް ކުރިޔަށް ގެންގޮސްފައިވެއެވެ.