ވެލިދޫ ޖޫނިއަރ ކޮލެޖް މަޝްރޫއުގެ މަސައްކަތް ކުރުމަށް އެމްޓީސީސީއަށް
މި މަޝްރޫއުގެ ދަށުން 10,276 އަކަ ފޫޓުގެ ސަރަހައްދެއްގައި 2 ކްލާސް ރޫމާއި، 1 އައިސީޓީ ލެބް ހަދާނެ
އެއްބަސްވުމުގައި ސޮއިކުރެއްވި ރަސްމިއްޔާތުގެ ތެރެއިން
ނ. ވެލިދޫ ޖޫނިއަރ ކޮލެޖް މަޝްރޫއުގެ މަސައްކަތް ކުރުމަށް އެމްޓީސީސީއާއި ހަވާލުކޮށްފިއެވެ.
ބުރާސްފަތި ދުވަހު ބޭއްވި ޚާއްސަ ރަސްމިއްޔާތެއްގައި މި އެއްބަސްވުމުގައި ވަނީ ސޮއިކޮށްފައެވެ. މި އެއްބަސްވުމުގައި އެމްޓީސީސީގެ ފަރާތުން ސޮއިކުރެއްވީ ސީއީއޯ އާދަމް އާޒިމްއެވެ. އަދި މިނިސްޓްރީ އޮފް ހަޔަރ އެޑިޔުކޭޝަންގެ ފަރާތުން ސޮއިކުރެއްވީ މިނިސްޓަރ ޑރ. އިބްރާހިމް ހަސަންއެވެ.
އެމްޓީސީސީން ބުނީ 2,724 މީހުންގެ އާބާދީއެއް އޮންނަ ވެލިދޫ ރައްޔިތުން އާއްމުކޮށް ހަރަކާތްތެރި ވަނީ ފަތުރުވެރިކަމުގެ ދާއިރާގައި ކަމަށެވެ. އެގޮތުން މަތީ ފަންތީގައި ހިންގަމުންދާ 7 ރިސޯޓެއް މި އަތޮޅުގައި މިހާރުވެސް އޮތުމާއެކު ގިނަ ރައްޔިތުންތަކެއް ވަޒީފާ އަދާކުރަމުން ދަނީ މި ރިސޯޓްތަކުގައި ކަމަށެވެ. ވެލިދޫގައި އެކަށީގެންވާ އާބާދީއެއް އޮތުމާއެކު ތައުލީމް ހާސިލް ކުރަމުންދާ ބޮޑު އާބާދީއެއްވެސް އޮންނަކަން އެމްޓީސީސީން ފާހަގަކޮށްފައިވެއެވެ.
އެހެންކަމުން ވެލިދޫ ޖޫނިއަރ ކޮލެޖް މަޝްރޫއުގެ މަސައްކަތް ނިމުމާއެކު ރަށުގައި ތިބެގެން ކިޔެވުމުގެ ފުރުސަތު އެތަކެއް ޒުވާނުންނަކަށް ފަހިވެގެން ދާނެ ކަމަށް އެމްޓީސީސީން ބުނެއެވެ. އަދި މިކަމުގެ ސަބަބުން ރަށުގެ އުފެއްދުންތެރިކަން އިތުރުވެ ތައުލީމީ ގާބިލު ޒުވާން ޖީލެއް އުފެދިގެންދާނެ ކަމަށް އެމްޓީސީސީން ބުނެއެވެ.
މި މަޝްރޫއުގެ ދަށުން 10,276 އަކަ ފޫޓުގެ ސަރަހައްދެއްގައި 2 ކްލާސް ރޫމާއި، 1 އައިސީޓީ ލެބާއ،ި 1 ލައިބްރަރީއާއި 2 ވޯރކްޝޮޕް އިމާރާތް ކުރުމުގެ މަސައްކަތް ހިމެނެއެވެ.
އެމްޓީސީސީއާ މި މަޝްރޫއު ހަވާލުކޮށްފައިވަނީ 11.91 މިލިއަން ރުފިޔާއަށް 270 ދުވަސް ތެރޭ ނިންމާ ގޮތަށެވެ.
