ސްކޫލްތައް އިމާރާތްކުރުމުގެ ދާއިރާއަށް އެމްޓީސީސީ ނުކުތުމަކީ ތާރީޚީ ކަމެއް - އާޒިމް
މި މަސައްކަތް ހަވާލުކުރީ 9 މަސްދުވަހުގެ ތެރޭގައި ނިންމާގޮތަށް
ނ. ވެލިދޫ ޖޫނިއަރ ކޮލެޖް ތަރައްގީކުރުމުގެ މަޝްރޫއުގެ މަސައްކަތް ހަވާލުކުރުމުގެ ރަސްމިއްޔާތު
ސްކޫލްތައް އިމާރާތްކުރުމުގެ ދާއިރާއަށް އެމްޓީސީސީ ނުކުތުމަކީ ތާރީޚީ ކަމެއް ކަމަށް، އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް އެފަދައިން ވިދާޅުވީ ނ. ވެލިދޫ ޖޫނިއަރ ކޮލެޖް ތަރައްގީކުރުމުގެ މަޝްރޫއުގެ މަސައްކަތް ހަވާލުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
އޭނާ ވިދާޅުވީ އެމްޓީސީސީއަކީ ޢުމްރާނީ ތަރައްގީގެ މަޝްރޫއުތަކުގައި ސަރުކާރާއި އާއްމުންގެ އިތުބާރު ހޯދާފައިވާ ކުންފުންޏެއް ކަމަށެވެ. އެހެންނަމަވެސް އެ ކުންފުނިން ސްކޫލްތައް ތަރައްގީކުރުމުގެ މަސައްކަތް ކޮށްފައި ނުވާކަން އާޒިމް ފާހަގަކުރެއްވިއެވެ. އާޒިމް ވަނީ އެ މަޝްރޫއު އެމްޓީސީސީއާ ހަވާލުކުރުމުން އެކަމަށްޓަކައި ޝުކުރު ދަންނަވާފައެވެ.
ވެލިދޫގައި ޖޫނިއަރ ކޮލެޖް ތަރައްގީކުރުމަށް އެމްޓީސީސީއާ ހަވާލުކުރައްވާފައިވަނީ 9 މަސްދުވަހުގެ ތެރޭގައި ނިންމާގޮތަށް، 11.91 މިލިއަން ރުފިޔާއަށެވެ. މިކަމަށްޓަކައި ބޭއްވި ރަސްމިއްޔާތުގައި ހަޔަރ އެޑިއުކޭޝަންގެ ފަރާތުން ސޮއިކުރެއްވީ މިނިސްޓަރ ޑރ. އިބްރާހީމް ހަސަންއެވެ. އަދި އެމްޓީސީސީގެ ފަރާތުން ސޮއިކުރެއްވީ ސީއީއޯ އާދަމް އާޒިމްއެވެ. ވެލިދޫ ޖޫނިއަރ ކޮލެޖަކީ ސްމާޓް ކްލާސްރޫމްތަކާއި އައިސީޓީ ލެބޯޓްރީއަކާއި ލައިބްރަރީއެއް ހިމެނޭ ގޮތަށް ގާއިމްކުރާ ތަނެކެވެ. އެ ތަނުގައި ވޮކޭޝަނަލް ޕްރޮގްރާމްތައް ހިންގުމަށް ޚާއްސަ މަލްޓިޕަރޕަސް ވޯކްޝޮޕްތައް ތަރައްގީކުރުމަށްވަނީ ހަމަޖެހިފައެވެ.
