އީގަލްސްއާ ދެކޮޅަށް އަބަހާނީ ވަރުގަދަކުރަން ބިދޭސީ ފަސް ކުޅުންތެރިން ހޯދައިފި
މާޒިޔާގެ ކުރީގެ ފޯވަޑް ސްޓެވާޓް ވެސް އީގަލްސްއާ ދެކޮޅަށް ކުޅޭނެ
އޭއެފްސީ ކަޕްގައި އަބަހާނީ ލިމިޓެޑާ ދެކޮޅަށް ސެޓެވާޓް (39) މާޒިޔާ އަށް ކުޅެނީ: އީގަލްސް އާ ދެކޮޅަށް ކުޅޭނެ --- ފައިލް ފޮޓޯ
އޭއެފްސީ ކަޕް ފުޓްބޯޅަ މުބާރާތުގެ ޕްރިލިމިނަރީގައި ރާއްޖޭގެ ކްލަބް އީގަލްސްއާ ވާދަކުރަން ބަނގްލަދޭޝްގެ ޑާކާ އަބަހާނީ ޓީމު ވަރުގަދަކޮށްފި އެވެ.
އަންނަ ބުދަ ދުވަހު ބަނގްލަދޭޝްގައި ކުޅޭ މެޗަށް އަބަހާނީން ވަނީ ލޯނު އުސޫލުން ބިދޭސީ ފަސް ކުޅުންތެރިން ހޯދައިފަ އެވެ. މިއާއެކު އެ ޓީމުގައި ޖުމަލަ ހަތް ބިދޭސީ ކުޅުންތެރިން އެބަތިއްބެވެ.
އަލަށް ގެނެސްފައިވަނީ ޗިޓަގޮން އަބަނާނީ އަށް ކުޅުނު މިސުރުގެ މިޑްފީލްޑަރަކާއި ނައިޖީރިއާގެ ފޯވަޑަކާއި މުހައްމަދަން ސްޕޯޓިން އަށް ކުޅުނު އުޒުބަކިސްތާނުގެ މިޑްފީލްޑަރަކާއި ފޯޓިސް އެފްސީ އަށް ކުޅޭ ބްރެޒިލްގެ ޑިފެންޑަރަކާއި ޝައިހް ޖަމާލް ދަންމޮންޑީއަށް ކުޅޭ ސެއިން ވިންސެންޓްގެ ފޯވަޑް ކޯނެލިއަސް ސްޓެވާޓެވެ. މީގެ ތެރެއިން ސްޓެވާޓަކީ ރާއްޖޭގެ މާޒިޔާ އާއި ޓީސީ އަށް ކުރިން ކުޅެ ގިނަ ގޯލުތަކެއް ޖަހާފައިވާ ކުޅުންތެރިއެކެވެ.
އަބަހާނީއަށް މި ކުޅުންތެރިން ގެނައީ އެ ޓީމުގައި ނައިޖީރިއާގެ ފޯވަޑަކާއި ސީރިއާގެ ޑިފެންޑަރަކު ވެސް ތިއްބަ އެވެ. ނަމަވެސް އީގަލްސްއާ ދެކޮޅަށް ކުޅެން ބިދޭސީ ކުޅުންތެރިން ހޯދި ނަމަވެސް ބަނގްލަދޭޝްގެ އެއްވެސް ކުޅުންތެރިއަކު އަލަށް އަބަހާނީ އަށް ގެނެސްފައިނުވެ އެވެ.
އަބަހާނީގެ ކޯޗު މާރިއޯ ލެމޯސް ބުނީ އޭއެފްސީ ކަޕަށް ޓީމު ވަރުގަދަ ކުރީ އޭނާގެ ޓީމާއި އީގަލްސް އަކީ ވެސް މާބޮޑު ތަފާތެއްވެސް ހަމަހަމަ ދެ ޓީމަށްވުމުން ކަމަށެވެ.
މިދިޔަ އަހަރުގެ ލީގުގެ ދެ ވަނަ ޓީމުގެ ހައިސިއްޔަތުން އޭއެފްސީކަޕުގައި ކުޅޭ އީގަލްސް ޓީމުގައި ބިދޭސީ ހަތަރު ކުޅުންތެރިން އެބަތިއްބެވެ. ބަނގްލަދޭޝް އަށް ދިއުމަށް އީގަލްސް މިއަދު ފުރާނެ އެވެ.
