ފަރެސްމާތޮޑާ ރައްޔިތުން އެދޭ ތަރައްގީ ގެނެސްދޭނެ ކަމުގެ ޔަގީންކަން ރައީސް ދެއްވައިފި
9 އޯގަސްޓު 2023 | ބުދަ 08:07ޔޫތް ސެންޓަރެއް ތަރައްގީ ކުރާނެ
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު
ގދ. ފަރެސްމާތޮޑާ ރައްޔިތުން އެދޭ ތަރައްގީ ގެނެސްދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ދެއްވައިފިއެވެ.
"އުފާވެރި އަމާންރާއްޖެ" ކެމްޕޭނަށް ފަރެސްމާތޮޑާ "ބަނދަރު ބައްދަލުވުން" ގައި ވާހަކަފުޅުދައްކަވަމުން ރައީސް ސާލިހު ވިދާޅުވީ ރާއްޖޭގެ ކޮންމެ ރަށަކަށް ބޭނުންވާ ކަންކަން އެނގިވަޑައިގަންނަވާ ކަމަށާއި، ރައްޔިތުން ބޭނުންވާ ކަންކަމުގެ ލިސްޓު އެބައޮތް ކަމަށެވެ. އަދި ރައްޔިތުން އެ ބޭނުންވާ ބަދަލު ކޮންމެ ރަށަކަށް ވެސް ކުރިއަށް އޮތް ފަސް އަހަރު ދުވަހުގެ ތެރޭގައި ގެނެސްދެއްވާނެ ކަމުގެ ޔަގީންކަން ރައީސް ދެއްވިއެވެ.
ފަރެސްމާތޮޑާއަށް އިޝާރާތް ކުރައްވައި ރައީސް ސާލިހު ވިދާޅުވީ ކުރިއަށް އޮތް ފަސް އަހަރު ދުވަހުގެ ތެރޭގައި އެރަށުގައި ތަރައްގީގެ ގިނަ މަޝްރޫއުތައް ކުރިއަށް ގެންދަވާނެ ކަމަށެވެ.
އެގޮތުން ވަސީލަތްތަކާއެކު ޔޫތް ސެންޓަރެއް ތަރައްގީ ކުރުމާއި، ބަނދަރުބޮޑުކޮށް ނެރުފުންކޮށް ރައްޔިތުން މޫދަށް އެރޭނެ ރަނގަޅު ފެންވަރުގެ ތަނެއް ބީޗެއް ހެދުމާއި، ހެލްތް ސެންޓަރަށް ބޭނުންވެފައިވާ އައު އިމާރާތް އެޅުމާއި، މަސްވެރިންނަށް ފަސޭހައިން އައިސް ލިބޭ ގޮތަށް އައިސް ޕްލާންޓެއް ބަހައްޓައިދެއްވާނެ ކަމަށް ރައީސް ސާލިހު ވިދާޅުވިއެވެ. އަދިބޮޑު ހުކުރު މިސްކިތެއް ގާއިމްކޮށްދިނުމާއި، އެއާޕޯޓު ސަރަހައްދުގައި ސިޓީ ހޮޓެލްއެއް ތަރައްގީ ކުރުމާއި، ކަޅައިދޫ އަދި ފަރެސްމާތޮޑާ އެއްކޮށް ހިއްކާ އެރަށުގައި ފްލެޓް ނުވަތަ ރޯ ހައުސް އަޅައިދެއްވާނެ ކަމަށް އެމަނިކުފާނު ވިދާޅުވިއެވެ.
މަސްވެރިކަމުގެ ސިނާއަތަށް އަލިއަޅުއްވާލައްވައި ރައީސް ސާލިހު ވިދާޅުވީ މަހުގެ އަގު މިއަދުވެސް ބޮޑުކުރެވިދާނެ ކަމަށާއި، ނަމަވެސް ބޭރަށް ވިއްކަން ޖެހެނީ އެއަށްވުރެ މާ ކުޑަ އަގެއްގައި ކަމަށެވެ. މިސިނާއަތް ކުރިއެރުވުމަށް ބޮޑު ބަދަލެއް ގެންނަން ޖެހޭ ކަމަށް ރައީސް ސާލިހު ވިދާޅުވިއެވެ. ރައީސް ސާލިހު ވިދާޅުވީ ފުރަތަމަ ކަމަކަށް މަސްވެރިން ބާނާ މަސް ތާޒާކަމާއެކު ގަނެވޭނެ ގޮތަށް އެ އިންތިޒާމްތައް ހަމަޖައްސަންޖެހޭ ކަމަށާއި، މަސްފަސޭހައިން ގަނެވޭނެ ކަލެކްޓަރ ވެސަލްތަކެއް ރާއްޖޭގެ އެކި ސަރަހައްދުތަކުގައި ހުންނަންޖެހޭ ކަމަށެވެ. އަދި ކަޅުބިލަމަހުގެ މަސްވެރިކަން އެއްކޮށް ޕްރައިވެޓް ސެކްޓަރއަށް ދޫކޮށްލުން ރަނގަޅު ނޫން ކަމަށް އެމަނިކުފާނު ވިދާޅުވިއެވެ.
ރައީސް ސާލިހު ވިދާޅުވީ ރާއްޖޭގެ މަސްވެރިކަމުގެ ސިނާއަތަކީ ވަރަށް ބޮޑު ސިނާއަތެއް ކަމަށާއި، މުޅި ރާއްޖޭގައި 17000ށް ވުރެ ގިނަ މަސްވެރިން ހަރަކާތްތެރިވަމުންދާ ކަމަށެވެ. އަދި މަސައްކަތް ކުރަމުންދަނީ ހުރިހާ މަސްވެރިންގެ ކަންބޮޑުވުންތަކަށް ހައްލު ގެނެސްދިނުމަށް ކަމަށް އެމަނިކުފާނު ވިދާޅުވިއެވެ.
