ކެންޑިޑެސީ އަނބުރައި ގެންދިއުމުގެ ފުރުސަތު، މާދަމާ ނަން ތަރުތީބުކުރުމާ ހަމައަށް

މިއަހަރުގެ ރިޔާސީ އިންތިޚާބުގައި ވާދަކުރުމަށް ނަން ހުށަހަޅުއްވާފައިވާ ފަރާތްތަކުން ކެންޑިޑެސީ އަނބުރައި ގެންދެވުމުގެ ފުރުސަތު، މާދަމާ ނަން ތަރުތީބު ކުރުމާ ހަމައަށް ހުޅުވާލައިފިއެވެ.

އިލެކްޝަންސް ކޮމިޝަނުގެ ނައިބު ރައީސް އިސްމާއީލް ހަބީބު "ރާއްޖެ އެމްވީ"އަށް ވިދާޅުވީ، ނަން އަނބުރައި ގެންދިއުމުގެ ފުރުސަތު ދިން ނަމަވެސް މިހާތަނަށް އެއްވެސް ބޭފުޅަކު އެކަމަށް އެދިވަޑައިގެންފައި ނުވާކަމަށެވެ. އަދި ބުދަ ދުވަހުގެ ހަވީރު 4:30އާ ހަމައަށް، ކެންޑިޑެސީ އަނބުރާ ގެންދެވޭނެ ކަމަށްވެސް އޭނާ ވިދާޅުވިއެވެ.

މިއަހަރުގެ ރިޔާސީ އިންތިޚާބަކީ މިހާތަނަށް ރިޔާސީ އިންތިޚާބެއްގައި އެންމެ ގިނަ ބަޔަކު ވާދަކުރައްވާ އިންތިޚާބެވެ. އެގޮތުން އަށް ބޭފުޅަކު ވަނީ ސުންގަޑިއިރު ހަމަވިއިރު ފޯމު ހުށަހަޅުއްވާފައެވެ. މީގެ ތެރޭގައި އެމްޑީޕީ، ޕީއެންސީ، ދަ ޑިމޮކްރެޓްސް، ޖުމްހޫރީ ޕާޓީ، އަދި އެމްއެންޕީގެ ފަރާތުން ވާދަކުރައްވާ ކެންޑިޑޭޓުންނާއި އަމިއްލަ ގޮތުން ވާދަކުރައްވާ ތިން ކެންޑިޑޭޓުން ހިމެނެއެވެ. އީސީން ވަނީ ހުރިހާ ބޭފުޅުންގެ ކެންޑިޑެސީ ބަލައިގެންފައެވެ.

މިއަހަރުގެ ރިޔާސީ އިންތިޚާބުގައި ވާދަކުރައްވަނީ ރައީސުލްޖުމްހޫރިއްޔާ އަދި އެމްޑީޕީގެ ކެންޑިޑޭޓު އިބްރާހީމް މުހައްމަދު ސާލިހާއި، ޕީއެންސީގެ ކެންޑިޑޭޓް ޑރ. މުހައްމަދު މުއިއްޒުއާއި، ދަ ޑިމޮކްރެޓްސްގެ ކެންޑިޑޭޓް އިލްޔާސް ލަބީބާއި، ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހީމާއި، އެމްއެންޕީގެ ކެންޑިޑޭޓު މުހައްމަދު ނާޒިމް، އަދި އަމިއްލަ ގޮތުން ވާދަކުރައްވާ ކެންޑިޑޭޓުން ކަމަށްވާ އަހުމަދު ފާރިސް މައުމޫނާއި އުމަރު ނަސީރާއި ހަސަން ޒަމީލެވެ.

މިއަހަރުގެ ރިޔާސީ އިންތިޚާބު އަންނަ މަހުގެ ނުވަވަނަ ދުވަހު ބާއްވާއިރު، ވާދަކުރައްވާ ބޭފުޅުންގެ ކެންޑިޑޭޓް ނަންބަރު ތަރުތީބުކުރުން، ބުދަ ދުވަހުގެ ހަވީރު 4:30ގައި ކުރިއަށްދާނެއެވެ. މި އިންތިޚާބުގައި 282،395 މީހުންނަށް ވޯޓު ލުމުގެ ހައްގު ލިބެއެވެ.