65 ރިސޯޓާއި ބޭރުގެ 5 ޤައުމެއްގައި ވޯޓު ފޮށި ބަހައްޓަން ނިންމައިފި

މިއަހަރުގެ ރިޔާސީ އިންތިޚާބުގައި 65 ރިސޯޓަކާއި ރައްޖޭން ބޭރުގެ 5 ޤައުމެއްގައި ވޯޓު ފޮށި ބަހައްޓަން އިލެކްޝަންސް ކޮމިޝަނުން ނިންމައިފިއެވެ.

އެ ކޮމިޝަނުގެ ނައިބު ރައީސް ހޯމަ ދުވަހުގެ ރޭ ކުރެއްވި ޓްވީޓެއްގައި ވިދާޅުވީ 65 ރިސޯޓެއްގައި ވޯޓުފޮށި ބެހެއްޓުމަށް ބޭނުންވާ އަދަދަށް މީހުން ރީ ރަޖިސްޓްރީ ކޮށްފައިވާ ކަމަށެވެ. އަދި ބޭރުގެ ޤައުމުތަކުގެ ތެރެއިން އިންޑިއާ އާއި ސްރީލަންކާ އާއި މެލޭޝިއާ އާއި އިނގިރޭސިވިލާތް އަދި ޔޫއޭއީން ވެސް ބޭނުންވާ އަދަދަށް ރީ ރަޖިސްޓްރީ ކޮށްފައިވާ ކަމަށް ވަނީ ބުނެފައެވެ.

މިއާއެކު ވޯޓު ފޮށިތައް ބަހައްޓާނީ އިންޑިއާގެ ޓްރިވެންޑްރަމާއި ސްރީލަންކާގެ ކޮލަމްބޯ އާއި މެލޭޝިއާގެ ކުއަލަލަމްޕޫރާއި އިނގިރޭސިވިލާތުގެ ލަންޑަން އަދި ޔޫއޭއީގެ އަބޫދާބީގައެވެ. ވޯޓު ފޮށި ބަހައްޓާނެ ރިސޯޓުތައް އަދި ހާމައެއް ނުކުރެއެވެ.

މިއަހަރުގެ ރިޔާސީ އިންތިޚާބު އަންނަ ސެޕްޓެމްބަރު މަހުގެ ނުވަ ވަނަ ދުވަހު ބާއްވާއިރު މި އިންތިޚާބަށް ކުރިމަތިލާން ހުޅުވާލި ފުރުސަތުގައި ސުންގަޑި ހަމަވިއިރު ކުރިމަތިލެއްވީ އަށް ބޭފުޅެކެވެ. އެއީ އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އާއި ޕީއެންސީގެ ރިޔާސީ ކެންޑިޑޭޓް ޑރ. މުހަައްމަދު މުއިއްޒު އާއި އެމްއެންޕީގެ ރިޔާސީ ކެންޑިޑޭޓް މުހައްމަދު ނާޒިމު އާއި ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބު އާއި ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހީމާއި އަމިއްލަ ގޮތުން ވާދަކުރައްވާ ކެންޑިޑޭޓުން ކަމަށްވާ އުމަރު ނަސީރު އާއި އަހުމަދު ފާރިސް މައުމޫން އަދި ހަސަން ޒަމީލު އެވެ.

މިއަހަރުގެ އިންތިޚާބުގައި ވޯޓުލުމުގެ ޙައްޤު 282،672 މީހަކަށް ލިބެއެވެ.