މެންޗެސްޓަރ ސިޓީ އަށް ކުޅެމުން އަންނަ ޕޯޗުގަލްގެ އެޓޭކިން މިޑްފީލްޑަރު ބެނާޑޯ ސިލްވާ ދޫނުކުރާނެ ކަމަށް ސިޓީން ކުލަބުތަކަށް އަންގައިފި އެވެ.

ބޭރުގެ މީޑިއާތަކުގައި ބުނެފައިވާ ގޮތުން ސިލްވާ ހޯދުމުގެ ޝައުޤުވެރިކަން ގެންގުޅެނީ ސްޕެއިންގެ ބާސެލޯނާ އާއި ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އެވެ. މީގެ ތެރެއިން ސިލްވާ ހޯދުމަށް ބާސެލޯނާ އިން އަންނަނީ ގަދަ އަޅާ މަސައްކަތް ކުރަމުން ކަމަށް މީޑިއާތަކުން ބުނެ އެވެ. މިއަހަރުގެ ޖަނަވަރީ މަހުން ފެށިގެން ބާސެލޯނާ އިން އެ މަސައްކަތް ކުރަމުން އަންނައިރު، ސިލްވާ ގެނައުމަށް އެންމެ ބޭނުންވަނީ ބާސެލޯނާގެ ކޯޗު ޒަވީ ހެނާންޑޭޒް އެވެ. ނަމަވެސް ސިލްވާ އަކީ ސިޓީ އާއެކު އެއްބަސްވުމެއް ހަދާފައިވާ ކުޅުންތެރިޔަކަށް ވުމުން އެކަމުގެ ވާހަކަ ދެއްކުމަށް ޒަވީ ދެކޮޅު ހަދަ އެވެ.

މީޑިއާތަކުން ބުނެފައިވާ ގޮތުގައި ސިލްވާ ދޫކޮށްލަން ސިޓީން ބޭނުމެއް ނުވެ އެވެ. އެހެންވެ އޭނާ ހޯދުމަށް ބާސެލޯނާ އަދި ޕީއެސްޖީން ކުރަމުން އަންނަ މަސައްކަތުގައި، އޭގެ ތެރެއިން އެއްވެސް ކުލަބަކާއެކު މަޝްވަރާ ކުރަން ބޭނުންނުވާ ކަމަށްް ސިޓީން ވަނީ އަންގައިފަ އެވެ. މީގެ އިތުރުން ސިޓީން އަންނަނީ ސިލްވާ އަށް އައު އެއްބަސްވުމެއް ހުށަހެޅުމަށް ތައްޔާރުވަމުންނެވެ. ކުރިއަށް އޮތް ދުވަސްތަކުގެ ތެރޭގައި ސިޓީން އޭނާ އަށް އެއްބަސްވުން ދޭނެ އެވެ. ސިލްވާ ބެހެއްޓުމަށް ސިޓީން ބޭނުންވި ނަމަވެސް، ކުޅުންތެރިޔާގެ ފަރާތުން މިހާތަނަށް އެކަމުގައި ވަކި ގޮތެއް ނިންމާފައި ނުވާ ކަަމަށް މީޑިއާ ރިޕޯޓުތައް ބުނެ އެވެ. އެހެންކަމުން، އެކަމުގައި ވަކި ގޮތެއް ސާފު ވާނީ ސިލްވާގެ ނިންމުމެއް ހާމަވުމުންނެވެ.

މޮނާކޯ ދޫކޮށް 2017 ވަނަ އަހަރު ސިޓީ އަށް ބަދަލުވި ސިލްވާ މިހާރު އެކުލަބާއެކު ސޮއިކޮށްފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ސިޓީ އަށް ބަދަލުވެ މިހާތަނަށް އެ ކުލަބުގައި ހޭދަ ކުރި ހަ ސީޒަންގައި އޭނާ ވަނީ 306 މެޗު ކުޅެދީ 55 ލަނޑު ޖަހައިފަ އެވެ. ސިޓީ އާއެކު ސިލްވާ ވަނީ 14 ތައްޓެއް ކާމިޔާބުކޮށްފަ އެވެ. އުމުރުން 28 އަހަރުގެ ކުޅުންތެރިޔާ އަންނަނީ 2015 ވަނަ އަހަރުން ފެށިގެން ޕޯޗުގަލް ޤައުމީ ޓީމަށް ވެސް ކުޅެމުންނެވެ. މިހާތަނަށް އޭނާ ވަނީ ޤައުމީ ޓީމަށް 82 މެޗު ކުޅެދީ 11 ލަނޑު ޖަހައިފަ އެވެ. ޤައުމީ ޓީމާއެކު އޭނާ ވަނީ ޔުއެފާ ނޭޝަންސް ލީގު ކާމިޔާބުކޮށްފަ އެވެ.