ރީ-ރަޖިސްޓްރޭޝަންގެ މުއްދަތު މިރޭ 10:00ށް އިތުރުކޮށްފި

އަންނަ މަހު ބާއްވަ ރިޔާސީ އިންތިޚާބުގައި ރަށްވެހިވެފައިވާ ރަށް ނޫން އެހެން ރަށެއްގައި ވޯޓުލާން ބޭނުންވާ ފަރާތްތަކަށް ރީ ރަޖިސްޓްރީވުމުގެ ފުރުސަތު މިރޭ 10:00ށް އިތުރުކޮށްފައިވާ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.

އީސީގެ ނާއިބު ރައީސް އިސްމާއީލް ހަބީބް ވިދާޅުވީ މިއަދަކީ ރީ-ރަޖިސްޓަރީ ކުރުމުގެ އެންމެ ފަހު ދުވަސް ކަމަށާއި، މިރޭ 10 ޖަހަންދެން ރީ-ރަޖިސްޓަރީ ކުރުމުގެ މަސައްކަތް ހިނގަމުންދާނެ ކަމަށެވެ. އަދި ވޯޓުލުމުގެ ހައްގު ލިބިފައިވާ ކޮންމެ މީހަކުވެސް 1414 އަށް ގުޅައިގެން ނުވަތަ VR space ID ޖެހުމަށްފަހު 1414 އަށް މެސެޖުކޮށްގެން އެ މީހަކު މިހާރު ރަޖިސްޓަރީވެފައިވާ ތަން ޗެކުކުރުމަށް އޭނާ އެދިވަޑައިގެންނެވިއެވެ. ހަބީބު ވަނީ މިހާރު ރަޖިސްޓަރީ ވެފައިވަނީ، ވޯޓުލާ ދުވަހު ހުންނަ ރަށުގައި ނޫންކަމަށްވާނަމަ، ވޯޓުލާން ބޭނުންވާ ތަނަކަށް، އަވަހަށް ރީ-ރަޖިސްޓްރީ ކުރުމަށް އިލްތިމާސްކުރައްވާފައެވެ.

Advertisement

އީސީން ބުނީ ރީ-ރަޖިސްޓްރީވުމުގެ ވަގުތު އިތުރުކުރީ ވީހާވެސް ގިނަ ބަޔަކަށް ރީ-ރަޖިސްޓްރީވުމުގެ ފުރުސަތު ދިނުމުގެ ގޮތުން ކަމަށެވެ. ކުރިން އޮތީ ރީ ރަޖިސްޓްރީ ކުރުމަށް އީސީން ހުޅުވާލި މުއްދަތު ހޮނިހިރު ދުވަހުގެ ހަވީރު 4:00 އަށް ހަމަވާ ގޮތަށެވެ. ރިޔާސީ އިންތިޚާބަށް މިހާރު ރީ-ރަޖިސްޓްރީ ކުރެވޭނީ ފޯމު މެދުވެރިކޮށެވެ. އޮންލައިންކޮށް ރީ-ރަޖިސްޓްރީވުމުގެ ފުރުސަތު 02 އޯގަސްޓްވީ ބުދަ ދުވަހުގެ ނިޔަލަށް ވަނީ ހަމަވެފައެވެ.

ރީ ރަޖިސްޓްރޭޝަންގެ ފުރުސަތު މިރޭ 10:00ގެ ނިޔަލަށް ހަމަވާއިރު މިދިޔަ ލޯކަލް ކައުންސިލް އިންތިޚާބުގައި މާލޭގައި ވޯޓުލުމަށް ރަޖިސްޓްރީ ކުރި އެހެން ރަށްތަކުގެ މީހުން މިއަހަރުގެ ރިޔާސީ އިންތިޚާބުގައި ރަޖިސްޓްރީވެފައި އޮންނާނީ މާލޭގައެވެ. އެހެންކަމުން މި އިންތިޚާބުގައި ވެސް މާލެއަށް ވޯޓުލާ ފަރާތްތަކުން އަލުން ރަޖިސްޓްރީ ކުރާކަށް ނުޖެހޭނެއެވެ. ނަމަވެސް މާލެ ނޫން އެހެން ރަށަކަށް މިފަހަރު ވޯޓުލާނަމަ އެ ފަރާތްތަކުން ވެސް އަލުން ރަޖިސްޓްރީވާން ޖެހޭނެއެވެ.

ލޯކަލް ކައުންސިލް އިންތިޚާބުގައި މާލެ ނޫން އެހެން ރަށްތަކުގައި ރަޖިސްޓްރީވެފައިވާ މީހުން މިއަހަރުގެ ރިޔާސީ އިންތިޚާބުގައި ރަޖިސްޓްރީވެފައި އޮންނާނީ އެ މީހެއްގެ ދާއިމީ އެޑްރެހުގައެވެ.

ރީ ރަޖިސްޓްރޭޝަން ފޯމުތައް މާލޭ ފިޔަވައި މީހުން ދިރިއުޅޭ އެހެން ރަށްތަކުން ބަލައިގަންނާނީ އެރަށެއްގެ ކައުންސިލް އިދާރާއަށް އަދި އައްޑޫ ސިޓީ އާއި ފުވައްމުލަކު ސިޓީގެ އަވަށްތަކުގެ އޮފީސްތަކުންނާއި ކުޅުދުއްފުށި ސިޓީގެ ކައުންސިލް އިދާރާއަށެވެ. މާލޭގައިނަމަ، އިންތިޚާބާ ބެހޭ މަރުކަޒު ކަމަށްވާ ދަރުބާރުގެ އިން ފޯމުތައް ބަލައިގަންނާނެއެވެ. ރީ ރަޖިސްޓަރީވުމަށް އެދޭ ފޯމު އީސީގެ ވެބްސައިޓުންނާއި ކައުންސިލް އިދާރާތަކުން ލިބެން ހުންނާނެއެވެ.

ރާއްޖެއިން ބޭރުގައި ދިރިއުޅޭ ދިވެހިން ރީ ރަޖިސްޓްރީ ކުރުމަށް ފޯމު ހުށަހަޅަން ޖެހޭނީ އެ ޤައުމުތަކުގައި ހުންނަ ދިވެހި އެމްބަސީ އާއި ހައިކޮމިޝަން އަދި ކޮންސުލޭޓް މެދުވެރިކޮށެވެ.

މިއަހަރުގެ ރިޔާސީ އިންތިޚާބުގައި ވޯޓުލުމުގެ ހައްގު 282،672 މީހަކަށް ލިބޭއިރު މިހާތަނަށް ރީ- ރަޖިސްޓްރީ ކުރުމަށް އެދިފައިވަނީ 29،951 މީހެއް ކަމަށް އީސީން ވަނީ ބުނެފައެވެ.